Mu rukiko abunganira Victoire Ingabire basabye umucamanza kububaha

Itsinda ry'abanyamategeko bunganira umunyapolitiki utavuga rumwe n'ubutegetsi bw'u Rwanda Victoire Ingabire basabye umucamanza kubaha agaciro no kububaha, mu gihe bakomeje kwiregura ku birego by'ubushinjacyaha.

Aba banyamategeko bavuze ko bababazwa no kwibutswa buri gihe ko batandukira, binubira icyo bise kwihanangirizwa no gucibwa amafaranga bya hato na hato mu gihe cy'urubanza, icyo basanga ari ukubima uburenganzira bwo kunganira uko bikwiye uregwa.

Mu iburanisha ryo ku wa kabiri, umucamanza yari yongeye kwihanangiriza umunyamategeko Gatera Gashabana ashinjwa ko yagaruye ingingo zamaze gufatwaho icyemezo n'urukiko.

Mbere y'uko iburanisha nyirizina ritangira, uruhande ruburanira Ingabire rwabanje kugaragaza icyo rwise impungenge z'uko urukiko rukunze kubashinja gutandukira.

Bavuze ko bababazwa no kwamburwa ijambo, gucyahwa cyangwa gucibwa amafaranga bivuzwe ko batandukiriye, mu gihe bo bumva ari uburyo bwo kurwana ku wo bunganira.

Urubanza rwakomeje impande zombi zumvikanye ko hagomba gushyirwa imbere imigendekere myiza y'urubanza.

Icyaha cyo kugambirira kugirira nabi ubutegetsi ni cyo cyongeye kwiharira igice kinini cy'iburanisha rya none.

Ashingiye ku mashusho y'ikiganiro Ingabire yagiranye n'umunyamakuru ukoresha urubuga rwa YouTube uba ku mugabane w'Uburayi, umunyamategeko Gashabana yavuze ko mu gihe kigera ku minota 36 nta hantu Ingabire yumvikanye ahamagarira abantu kugirira nabi ubutegetsi.

Amashusho yakiniwe mu rukiko ni kimwe mu bimenyetso ubushinjacyaha bwatanze buvuga ko Ingabire yari afite umugambi wo guhirika ubutegetsi.

Muri icyo kiganiro, Ingabire avuga ku rwandiko yateguranye na Bernard Ntaganda, na we utavuga rumwe n'ubutegetsi, bavuga ko rugaragaza icyakorwa mu rwego rwo gutegura ahazaza heza h'u Rwanda.

Uru rwandiko uregwa avuga ko yashingiye ku biganiro byabereye mu Rugwiro hagati y'umwaka wa 1998 na 1999 bivuga ku mitegekere y'u Rwanda.

Mu ngingo Ingabire yavuze ko zitubahirijwe kandi zari zarashyizwe imbere muri ibi biganiro, hari iyo guca burundu ubuhunzi. Ingabire avuga ko iyi ngingo itagezweho ndetse ko n'abatari bacye mu bari muri ibi biganiro bamaze guhunga igihugu.

Umunyamategeko Gashabana avuga ko ibyavuzwe bigomba gufatwa mu rwego rwa politiki. Avuga ko umunyapolitiki ashobora kuvuga ibintu ntibifatwe nk'icyaha kabone n'ubwo byaba bitashimishije ubutegetsi.

Avuga ku munsi wiswe 'Ingabire Day' na wo ugaragazwa nk'uburyo uregwa yari kwifashisha mu mugambi wo kugiririra nabi ubutegetsi, Gashabana yibajije impamvu uyu munsi wafatwa nk'icyaha nyamara bwari uburyo bw'abantu runaka bifuza kwibukaho ibyabaye ku muntu bakunda.

Gusa umucamanza yibukije ko itariki ya 14 y'ukwezi kwa 10 ubwayo atari icyaha, ko ikibazo ari ibyaha biwushingiyeho byagaragajwe n'ubushinjacyaha.

Havuzwe ku ishyaka rya FDU-Inkingi ryayoborwaga na Ingabire ubwo yari ku mugabane w'Uburayi, rifatwa nk'umutwe w'iterabwoba mu Rwanda.

Uyu mutwe ni umwe mu yishyize hamwe igakora ihuriro ryiswe P5 rifatwa mu Rwanda nk'umutwe w'iterabwoba.

Abunganira Ingabire bavuga ko icyemezo cyo kwinjira muri iryo huriro cyafashwe ubwo Ingabire atari agifite ububasha ku ishyaka rya FDU, bityo ko ibyakozwe bitamwitirirwa.

Ku bimenyetso by'amajwi byafashwe humvirijwe itumanaho rya Ingabire, umunyamategeko Gashabana asaba ko byateshwa agaciro kuko byafashwe mu nzira zitubahirije amategeko.

Ibyo ni nk'ibyafashwe hagati ya Ingabire n'uwitwa Cassien Ntamuhanga baganiraga ku buryo bwakoreshwa mu gutegura imyigaragambyo.

Uyu munyamategeko avuga ko abanyapolitiki babiri baganira banenga ubutegetsi batagomba gufatwa nk'abanyabyaha, kabone nubwo baba bavuga ku buryo bwakoreshwa mu gukuraho ubutegetsi binyuze mu nzira z'amahoro.

Ku munsi w'ejo ku wa kane, urubuga ruzakomeza guhabwa abunganira Ingabire bagerageza gusenya ingingo zose zatanzwe mu kirego cy'ubushinjacyaha.