'Mae e'n arwr i ddisgyblion' - athro chwaraewr ieuengaf Caerdydd

Noah Anyadike ac Owen Francis

Mae Noah Anyadike (dde) yn arwr i nifer o ddisgyblion Maes y Gwendraeth erbyn hyn, yn ôl Owen Francis

Lowri Roberts
Newyddion S4C

Mae athro pêl-droediwr 15 oed o Sir Gaerfyrddin a gafodd ei ddewis i chwarae dros dîm cyntaf Caerdydd yn dweud ei fod yn "arwr" i ddisgyblion eraill.

15 oed a 98 diwrnod oedd Noah Anyadike pan chwaraeodd ei gêm gystadleuol gyntaf dros yr Adar Gleision yn erbyn Norwich.

Anyadike yw'r chwaraewr ieuengaf erioed i chwarae dros dîm cyntaf Caerdydd a'r ieuengaf yn hanes Cwpan yr EFL - sydd hefyd yn cael ei adnabod fel Cwpan Cynghrair Lloegr, neu Gwpan Carabao.

"Ro'n i 'di troi lan i'r gêm ac roedd y manager 'di dweud wrtho fi bo fi'n dechrau - felly roedd rhaid i fi ffocysu a bod yn y mentality cywir... roedd e'n experience da i fi," meddai'r amddiffynnwr canol ifanc.

Noah Anyadike yn chwarae yn erbyn NorwichGetty Images

Mae Anyadike wedi cael ei gynnwys ar y fainc mewn gemau yn y Bencampwriaeth hefyd

Ochr yn ochr â'r pêl-droed, mae Noah yn paratoi ar gyfer ei arholiadau TGAU.

Canmol ei ymroddiad mae Owen Francis - ei athro addysg gorfforol yn Ysgol Maes y Gwendraeth.

"Sai'n deall sut mae'n neud e a bod yn onest," meddai Mr Francis.

"Wythnos diwethaf roedd gêm hwyr gyda fe a dwi'n credu oedd e gytre' tua 01:00.

"'Ware teg roedd e yn yr ysgol am 08:30 ar ôl 'ny.

"Mae'n anodd iawn i ddychmygu sut allai rhywun ifanc ddelio â'r pwysau gwaith, ond mae e'n dod i ben â hi yn rili dda."

Noah Anyadike

Mae Anyadike yn dweud ei fod yn barod i fod yn amyneddgar wrth aros am ragor o gyfleoedd gyda'r tîm cyntaf

Mae Noa wedi creu tipyn o argraff ers chwarae ei gêm gyntaf dros dîm cyntaf Caerdydd, a phlant ifanc yr ysgol bellach yn ei edmygu

"Fi 'di gweld gwahaniaeth flwyddyn yma ar ôl yr haf pan gafodd e ei gêm gyntaf dros Gaerdydd," ychwanegodd ei athro.

"Fi 'di gweld bechgyn bach ym mlwyddyn saith yn edrych lan arno fe, ac mae e'n arwr i lot ohonyn nhw nawr... sy'n braf i'r ysgol."

O ran y dyfodol, mae Anyadike yn dweud ei fod yn benderfynol o lwyddo gyda'r Adar Gleision.

"Fi moyn llwyddo, fi moyn cael mwy o opportunities gyda'r tîm cyntaf i chwarae," meddai.

"Ond, mae'n rhaid i fi fod yn amyneddgar ac aros am yr amser cywir."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Straeon perthnasol