గుడ్‌నైట్.
ఈ లైవ్ పేజీని ఇంతటితో ముగిస్తున్నాం.
ఈరోజు ముఖ్యమైన వార్తలు కొన్నింటిని ఇక్కడ చూడండి.
‘రిగ్గింగ్‌కు పాల్పడి ఎలక్షన్లు గెలిచినవారు ఇప్పుడు ఎన్నికల అక్రమాలంటూ మాట్లాడుతున్నారు’: అనురాగ్ ఠాకుర్
“రాహుల్ గాంధీ, కాంగ్రెస్ అజెండా చాలా స్పష్టంగా ఉంది. అధికారం దక్కకపోతే సమాజంలో అరాచకత్వానికి పాల్పడాలన్నట్లుగా ఉంది. అయితే, కోర్టుల ఎదుట తమ భావాలను వ్యక్తపరిచే హక్కు ప్రతి ఒక్కరికీ ఉంటుంది” అని అనురాగ్ ఠాకుర్ అన్నారు.
సారాంశం
- ప్రతిపక్ష ఎంపీలను కలవడం లేదని భారత ప్రధాన న్యాయమూర్తి జస్టిస్ సూర్యకాంత్ స్పష్టం చేశారు.
- నేడు సుప్రీంకోర్టుకు పాదయాత్రగా వెళ్లి ప్రధాన న్యాయమూర్తికి వినతి పత్రం సమర్పించనున్నట్టు విపక్ష నేత రాహుల్ గాంధీ ప్రకటించారు.
- భద్రతా కారణాలతో సోమవారం నాడు ఆరు మెట్రో స్టేషన్లను దాదాపు 10 గంటల పాటు మూసివేయనున్నట్లు దిల్లీ మెట్రో రైల్ కార్పొరేషన్ (డీఎంఆర్‌సీ) ప్రకటించింది.
- నేపాల్‌లోని మధ్య ప్రాంతంలో ఆకస్మిక వరదలు ముంచెత్తాయి. వరదల ధాటికి ఇళ్లు, వంతెనలు కొట్టుకుపోయాయి.
- నేపాల్‌లో అతిపెద్ద, సుదీర్ఘమైన పండుగ దశైన్‌ తొలి రోజు వేడుకలకు చిన్నారులు, స్థానికులు సిద్ధమవుతున్న సమయంలో గోర్ఖా జిల్లాలో ఈ వరదలు సంభవించాయి. వరదల్లో చిక్కుకున్న సుమారు 50 మందిని రక్షించినట్లు అధికారులు తెలిపారు.
- జిబూటి తీరంలో పడవ మునిగిపోవడంతో కనీసం 139 మంది వలసదారులు ప్రాణాలు కోల్పోయారని, అందులో 15 మంది పిల్లలున్నారని ఐక్యరాజ్యసమితి వలసల విభాగం తెలిపింది.
- పలువురి ఆచూకీ ఇంకా తెలియడం లేదని సంస్థ తెలిపింది.
లైవ్ కవరేజీ
మాజీ ఎమ్మెల్యేను కొట్టి చంపారు
ఫొటో సోర్స్, MOHAR SINGH MEENA
ఫొటో క్యాప్షన్, అతర్ సింగ్ భఢానా రాజస్థాన్‌లోని భరత్‌పుర జిల్లాలో మాజీ ఎమ్మెల్యే బయానా అతర్ సింగ్ భఢానాను ఆదివారం కొట్టి చంపేశారు. జైపూర్‌లోని సవాయి మాన్‌సింగ్ ఆస్పత్రిలో పోస్టుమార్టం జరిగిన అనంతరం సోమవారం ఉదయం ఆయన మృతదేహాన్ని కుటుంబసభ్యులకు అప్పగించారు.
హరియాణాలోని ఫరీదాబాద్‌లోని తమ పూర్వీకుల గ్రామంలో సోమవారం అతర్ సింగ్ భడానా అంత్యక్రియలను నిర్వహించారు.
భడానా కుటుంబ సభ్యుల ఫిర్యాదు మేరకు ఎఫ్‌ఐఆర్ నమోదు చేసినట్లు భరత్‌పుర్ ఎస్పీ రాజేశ్ మీనా సోమవారం రాత్రి తెలిపారు.
“వైర పోలీస్ స్టేషన్ పరిధిలోని భౌండా గ్రామంలో క్రషర్‌కి వెళ్లే మార్గంపై భఢానా, గ్రామస్థుల మధ్య రెండేళ్లుగా వివాదం నడుస్తోంది. క్రషర్ పనులను నిలిపివేయాలనేది గ్రామస్థుల డిమాండ్” అని రాజేశ్ మీనా తెలిపారు.
ఘటన జరిగిన నాటి నుంచి గ్రామ ప్రజలు, యువత తప్పించుకొని తిరుగుతున్నారు. చాలా ఇళ్లకు తాళాలు వేసి ఉన్నాయి. పరారీలో ఉన్నవారి కోసం గాలింపు చర్యలను ముమ్మరం చేసినట్లు వైరా పోలీస్ స్టేషన్ ఇన్‌ఛార్జ్ ధీరేంద్ర తెలిపారు. శాంతి భద్రతల నేపథ్యంలో గ్రామంలో పోలీసులను మోహరించినట్లు తెలిపారు.
ఫరీదాబాద్‌ సోనిపాలి గ్రామానికి చెందిన అతర్ సింగ్ భఢానా.. బయానా నియోజకవర్గం నుంచి భారతీయ జనతా పార్టీ తరఫున ఎమ్మెల్యేగా పనిచేశారు. అనంతరం కాంగ్రెస్ టికెట్‌పై పోటీ చేసి ఓడిపోయారు. భఢానాకు ముగ్గురు కూతుళ్లు ఒక కుమారుడు ఉన్నారు. ముగ్గురు కూతుళ్లలో ఒకరు హిమాచల్ ప్రదేశ్‌ క్యాడర్‌కి చెందిన ఐఏఎస్ అధికారి కాగా, మరో ఇద్దరు డాక్టర్లు. కుమారుడు ఫరీదాబాద్‌లో ఉంటారు. భడానా భార్య బయానాలో నివసిస్తున్నారు.
అతర్ సింగ్ భఢానా... ఆదివారం సాయంత్రం 6 గంటలకు భౌండా గ్రామంలోని క్రషర్ వద్దకు వచ్చిన సమయంలో పెద్ద సంఖ్యలో అక్కడికి చేరుకున్న గ్రామస్థులు ఆయనపై కర్రలతో దాడి చేసినట్లు ఆరోపణలు వస్తున్నాయి.
తీవ్రంగా గాయపడిన భఢానాను తొలుత వైరలోని కమ్యానిటీ హెల్త్ సెంటర్‌కి తరలించారు. అనంతరం జైపూర్‌లోని సవాయి మాన్ సింగ్ ఆస్పత్రికి తీసుకెళ్లగా, అక్కడ ఆయన మరణించినట్లు వైద్యులు తెలిపారు.
‘రిగ్గింగ్‌కు పాల్పడి ఎలక్షన్లు గెలిచినవారు ఇప్పుడు ఎన్నికల అక్రమాలంటూ మాట్లాడుతున్నారు’: అనురాగ్ ఠాకుర్
ఫొటో సోర్స్, Bharatiya Janata Party
ఫొటో క్యాప్షన్, అనురాగ్ ఠాకుర్ రాహుల్ గాంధీ సహా ఇండియా కూటమి నేతల మార్చ్ నేపథ్యంలో భారతీయ జనతా పార్టీ నేత, కేంద్ర మాజీ మంత్రి అనురాగ్ ఠాకూర్ సోమవారం విలేఖరుల సమావేశంలో మాట్లాడారు.
రాహుల్ అరాచకానికి పాల్పడుతున్నారని ఆయన ఆరోపించారు.
“రాహుల్ గాంధీ, కాంగ్రెస్ అజెండా చాలా స్పష్టంగా ఉంది. అధికారం దక్కకపోతే సమాజంలో అరాచకానికి పాల్పడాలన్నట్లుగా ఉంది. అయితే, కోర్టుల ఎదుట తమ భావాలను వ్యక్తపరిచే హక్కు ప్రతి ఒక్కరికీ ఉంటుంది” అని అనురాగ్ ఠాకుర్ అన్నారు.
“రాహుల్ గాంధీకి సైతం తన అభిప్రాయాలను వ్యక్తం చేసే హక్కు ఉంది. అయితే రాహుల్, కాంగ్రెస్ తమని తాము చట్టానికి, రాజ్యాంగ వ్యవస్థలకు మించినవారిగా భావిస్తున్నారు” అని అనురాగ్ ఆరోపించారు.
రాహుల్ గాంధీ, కాంగ్రెస్... రాజ్యాంగాన్ని విచ్ఛన్నం చేస్తున్నాయని ఆయన పేర్కొన్నారు.
“రిగ్గింగ్‌కు పాల్పడి ఎన్నికల్లో గెలిచినవారు ఇప్పుడు ఎన్నికల అక్రమాలపై మాట్లాడుతున్నారు” అని అనురాగ్ విమర్శించారు.
ఇండియా కూటమి ‘సుప్రీంకోర్ట్ మార్చ్’కు పెద్దసంఖ్యలో జనం
ఫొటో సోర్స్, REUTERS/Priyanshu Singh
ఫొటో క్యాప్షన్, ఇండియా కూటమి మార్చ్ విపక్ష ఇండియా కూటమి సోమవారం బారాఖంబా నుంచి సుప్రీం కోర్టుకు మార్చ్ చేపట్టింది.
కాంగ్రెస్ నేత, లోక్‌సభలో ప్రతిపక్ష నేత రాహుల్ గాంధీ, అఖిలేశ్ యాదవ్, నేహా బోరా సహా ఇతర ప్రతిపక్ష పార్టీలకు చెందిన నేతలు ఈ యాత్రలో పాల్గొన్నారు.
ఇండియా కూటమిలో మార్చ్‌లో జనం భారీగా కనిపిస్తున్న ఫొటోలు, వీడియోలు సోషల్ మీడియాలో షేర్ అవుతున్నాయి.
మార్చ్‌లో పాల్గొనేందుకు జనం పెద్ద సంఖ్యలో తరలి వస్తున్నారని బీబీసీ ప్రతినిధి దిల్‌నవాజ్ పాషా నిర్ధరించారు.
ఈ పాదయాత్రకు సంబంధించిన కొన్ని ఫోటోలు మీకోసం..
ఫొటో సోర్స్, REUTERS/Adnan Abidi
ఫొటో సోర్స్, Reuters
బారాఖంబా నుంచి సుప్రీంకోర్ట్‌కు విపక్ష నాయకుల పాదయాత్ర
ఫొటో సోర్స్, congress
ఫొటో క్యాప్షన్, సుప్రీంకోర్ట్‌కు రాహుల్ గాంధీ నేతృత్వంలో విపక్ష నాయకుల పాదయాత్ర చీఫ్ ఎలక్షన్ కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ ప్రతిపక్ష పార్టీలు సుప్రీంకోర్టుకు పాదయాత్ర చేస్తున్నాయి.
అక్కడి నుంచి రిపోర్ట్ చేస్తున్న బీబీసీ హిందీ విలేఖరి దిల్‌నవాజ్ పాషా ఈ పాదయాత్రకు సంబంధించిన వివరాలు తెలిపారు.
రాహుల్ గాంధీ, ప్రతిపక్ష నాయకులు ఒక బస్సు ఎక్కి బారాఖంబా మెట్రో స్టేషన్ బయట ఉన్న రోడ్డుపైకి చేరుకున్నారు.
అక్కడ కాంగ్రెస్, సమాజ్‌వాదీ పార్టీ, వామపక్ష పార్టీల కార్యకర్తలు, వందలాది మంది విద్యార్థులు ఉన్నారు.
అక్కడి నుంచి రాహుల్, విపక్ష నాయకుల పాదయాత్ర మొదలైంది.
బారాఖంబా మెట్రో స్టేషన్ నుండి మండీ హౌస్ వరకు ఉన్న రహదారిపై జనం లేరు. పోలీసులు ముందువైపు బారికేడ్లు ఏర్పాటు చేశారు. ఈ బారికేడ్ల వద్ద నిరసనకారులకు, పోలీసులకు మధ్య ఘర్షణలు జరిగే అవకాశం ఉంది.
రాహుల్ గాంధీతో పాటు కాంగ్రెస్, ప్రతిపక్షాలకు చెందిన పలువురు ఎంపీలు కూడా ఉన్నారు.
ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ బారాఖంబా నుంచి సుప్రీంకోర్టు వరకు పాదయాత్ర చేయనున్నట్లు ఇండియా కూటమి ప్రకటించింది.
జంతర్ మంతర్ ఇక నిరసనల వేదిక కాదు: దిల్లీ పోలీసులు
ఫొటో సోర్స్, Arun SANKAR / AFP via Getty Images
ఫొటో క్యాప్షన్, దిల్లీలో నిరసన ప్రదర్శనలకు చేపట్టేందుకు జంతర్ మంతర్‌కు బదులుగా మూడు ప్రత్యామ్నాయ ప్రదేశాలను ఎంపిక చేసినట్లు దిల్లీ పోలీసులు తెలిపారు. దిల్లీలో నిరసనలు, ధర్నాలు నిర్వహించడానికి నిర్దేశించిన ప్రదేశాల జాబితా నుంచి జంతర్ మంతర్‌ను తొలగించారు .
కేంద్ర హోం మంత్రిత్వ శాఖ ఏర్పాటు చేసిన కమిటీ సిఫార్సుల ఆధారంగా ఈ నిర్ణయం తీసుకున్నారు.
దిల్లీ పోలీస్ కమిషనర్ అనురాగ్ కుమార్ దీని గురించి నోటీస్ జారీ చేశారు.
జంతర్ మంతర్‌కు బదులుగా తూర్పు దిల్లీలోని రామ్‌లీలా మైదాన్, బురారీ మైదాన్, సీబీడీ మైదాన్‌లలో నిరసనలు చేపట్టవచ్చని ఆ నోటీస్‌లో తెలిపారు.
“పౌరులకు నిరసనలు, ప్రదర్శనలు నిర్వహించే హక్కును దృష్టిలో ఉంచుకుని, ప్రస్తుతం ఉన్న నిర్దేశిత స్థలాలకు ప్రత్యామ్నాయాలను సమీక్షించే బాధ్యతను హోం వ్యవహారాల మంత్రిత్వ శాఖ ఏర్పాటు చేసిన కమిటీకి అప్పగించారు” అని ఆ నోటీస్‌లో పేర్కొన్నారు.
ఈ మూడు ప్రదేశాలలో నిరసనలు, ధర్నాలు నిర్వహించడానికి విడివిడిగా స్టాండర్డ్ ఆపరేటింగ్ ప్రొసీజర్ విడుదల చేస్తామని ఆ నోటీసులో పేర్కొన్నారు.
జ్ఞానేశ్ కుమార్‌ను వదిలేది లేదు. వేచి చేస్తున్నాం: రాహుల్ గాంధీ
ఫొటో సోర్స్, Rahul Gandhi
ఫొటో క్యాప్షన్, నరేంద్రమోదీ ప్రభుత్వం జ్ఞానేశ్ కుమార్‌ను రక్షించేందుకు మిగతా వ్యవస్థలను కూడా దుర్వినియోగం చేస్తోందని రాహుల్ అన్నారు. ప్రధాన ఎన్నికల కమిషనర్ జ్ఞానేశ్ కుమార్ అవినీతి గురించి తనకు తెలుసని, ఆయన్ను వదిలేది లేదని లోక్‌సభ ప్రతిపక్ష నేత, కాంగ్రెస్ ఎంపీ రాహుల్ గాంధీ అన్నారు.
“ఇద్దరు ఎన్నికల కమిషనర్లు అడిగిన ప్రశ్నలనే మేం కూడా అడుగుతున్నాం. జ్ఞానేశ్ కుమార్ ఎందుకు రాజీనామా చేయడం లేదు? జ్ఞానేశ్ కుమార్ జీ.. మీ పరిస్థితేంటో మాకు తెలుసు. మీకు నిద్ర పట్టడం లేదు. మేం మిమ్మల్ని వదిలిపెట్టం. మీరు తప్పించుకోలేరు. మీ గతం మీ అవినీతి గురించి మాకు తెలుసు. మేం కేవలం వేచి చేస్తున్నాం” అని రాహుల్ గాంధీ అన్నారు.
దిల్లీలో నిరసనకారులపై జరుగుతున్న పోలీసు చర్యల గురించి రాహుల్ స్పందిస్తూ, ప్రభుత్వం చాలా పెద్ద తప్పు చేస్తోందని అన్నారు.
“ఓట్ల చోరీకి వ్యతిరేకంగా దిల్లీలో చాలా రోజులుగా నిరసనలు జరుగుతున్నాయి. అసలు ప్రశ్న ఏమిటంటే దిల్లీని ఎందుకు జైలుగా మార్చారు? నగరంలోకి రాకుండా ప్రజలను అడ్డుకుంటున్నారు. రైళ్లు, బస్సుల్లోనే వారిని నిలిపివేస్తున్నారు. ప్రభుత్వం చాలా పెద్ద తప్పు చేస్తోంది” అన్నారు.
బీజేపీ వ్యతిరేక ఓట్లనే తొలగిస్తున్నారు: రేవంత్ రెడ్డి
ఫొటో సోర్స్, I&PR Telangana
ఫొటో క్యాప్షన్, సోమవారం జరగనున్న ర్యాలీ కోసం దిల్లీకి చేరుకున్న రేవంత్ రెడ్డి మీడియాతో మాట్లాడారు. బీజేపీ వ్యతిరేక ఓట్లను తొలగిస్తున్నారని, స్పెషల్ ఇంటెన్సివ్ రివిజన్ (ఎస్ఐఆర్) అమలుచేసిన రాష్ట్రాలలోనే ఆ పార్టీ గెలిచిందని తెలంగాణ సీఎం రేవంత్ రెడ్డి అన్నారు.
సోమవారం జరగనున్న కాంగ్రెస్ పాదయాత్ర కోసం దిల్లీకి చేరుకున్న రేవంత్ రెడ్డి మీడియాతో మాట్లాడారు.
"ముఖ్యంగా బీజేపీని వ్యతిరేకిస్తున్నది ఎవరంటే..దళితులు, ఆదివాసీలు, గిరిజనులు, మైనార్టీలు, యువత. బీజేపీని ఓడించాలనుకున్న ప్రజల ఓటు హక్కును తొలగించడానికి కుట్ర చేశారు. జ్ఞానేశ్‌కుమార్ ఏకపక్షంగా నిర్ణయాలు తీసుకుంటున్నారని కమిషన్ సభ్యులు చెప్పారు. తప్పులు జరుగుతున్నాయని తెలిసినపుడు, ఆ అధికారిని తొలగించడానికి మోదీకి అభ్యంతరం ఏమిటి?, ఆయనకు అండగా ఎందుకు నిలబడుతున్నారు" అని రేవంత్ రెడ్డి అన్నారు.
ఒమన్ సమీపంలో భారతీయ సిబ్బంది ఉన్న ట్యాంకర్‌పై డ్రోన్ దాడి
ఫొటో సోర్స్, Fatemeh Bahrami/Anadolu via Getty Images
ఫొటో క్యాప్షన్, ఇద్దరు భారతీయులు గల్లంతైనట్లు కేంద్ర మంత్రి సర్బానంద సోనోవాల్‌ ఆదివారం రాత్రి ధ్రువీకరించారు (ప్రతీకాత్మక చిత్రం). ఒమన్ సమీపంలో భారతీయ సిబ్బంది ఉన్న ట్యాంకర్‌పై ఆదివారం డ్రోన్ దాడి జరిగింది. నౌకలో ఉన్న 11 మంది భారతీయ నావికుల్లో తొమ్మిది మందిని రక్షించగా.. మరో ఇద్దరు గల్లంతయ్యారు. ఇద్దరు నావికులు కనిపించకుండా పోయిన విషయాన్ని కేంద్ర మంత్రి సర్బానంద సోనోవాల్‌ ఆదివారం రాత్రి ధ్రువీకరించారు.
"అక్టోబర్ 11న సోహార్ యాంకరేజ్ వద్ద భారతీయ ట్యాంకర్ ఎం.టి. పెట్రో డాల్ఫిన్‌పై డ్రోన్ దాడి జరిగింది. ట్యాంకర్‌పై 11 మంది భారతీయ నావికులు ఉన్నారు. తొమ్మిది మందిని రక్షించారు, ఇద్దరు గల్లంతయ్యారు" అన్నారు.
స్థానిక తీర రక్షక దళం గాలింపు, సహాయక చర్యలు చేపట్టిందని మంత్రి వివరించారు.
గల్లంతైన వారిని గుర్తించేందుకు అవసరమైన అన్ని చర్యలు తీసుకుంటున్నామని, సహాయక చర్యలకు పూర్తి మద్దతు అందించేందుకు సంబంధిత అధికారులతో నిరంతరం సంప్రదింపులు జరుపుతున్నామని సర్బానంద సోనోవాల్‌ పేర్కొన్నారు.
విపక్ష ఎంపీలతో భేటీకి సీజేఐ సూర్యకాంత్ నిరాకరణ
ఫొటో సోర్స్, Arun Kumar/ The India Today Group via Getty Images
ఫొటో క్యాప్షన్, ప్రతిపక్ష పార్టీల ఎంపీలను కలవకపోవడానికి సీజేఐ కొన్ని కారణాలు చెప్పారు (ఫైల్ ఫోటో). విపక్ష పార్టీల ఎంపీలతో సమావేశమయ్యేందుకు భారత ప్రధాన న్యాయమూర్తి (సీజేఐ) సూర్యకాంత్ నిరాకరించారు. వారిని కలవలేకపోవడానికి కొన్ని కారణాలను సీజేఐ వివరించినప్పటికీ, లేఖ గోప్యతను దృష్టిలో ఉంచుకుని వాటిని బహిర్గతం చేసేందుకు నిరాకరించారు.
“విపక్ష నేతల లేఖ నాకు నిన్న అందింది. దానికి నిన్న రాత్రే సమాధానం ఇచ్చాను. కొన్ని కారణాలను వివరిస్తూ వారిని కలవలేనని తెలియజేశాను” అని సీజేఐ సూర్యకాంత్ సోమవారం మీడియాతో చెప్పారు.
‘వన్ నేషన్‌–వన్ ఎలక్షన్’పై ఏర్పాటైన సంయుక్త పార్లమెంటరీ కమిటీ (జేపీసీ) సుప్రీంకోర్టు పర్యటన రద్దు కావడంపై కూడా సీజేఐని ప్రశ్నించగా, ఆయన స్పందిస్తూ.. “ఆ విషయంలో కోర్టులో విరుద్ధ ప్రయోజనాల (కాన్‌ఫ్లిక్ట్ ఆఫ్ ఇంట్రెస్ట్) పరిస్థితి తలెత్తే అవకాశం ఉంది. అందుకే, మేం దీనిపై చర్చించాం. ఎలాంటి విరుద్ధ ప్రయోజనాలకైనా దూరంగా ఉండాలని నా సీనియర్ న్యాయ సహచరులు, నేను ఒకే అభిప్రాయానికి వచ్చాం” అని తెలిపారు.
సీజేఐను కలిసేందుకు సమయం కోరుతూ లోక్‌సభలో ప్రతిపక్ష నేత రాహుల్ గాంధీతో కలిసి లేఖ రాసినట్లు కాంగ్రెస్ అధ్యక్షుడు మల్లికార్జున ఖర్గే ఆదివారం తెలిపారు.
24 గంటల్లోగా నిరసనకు అనుమతి ఇవ్వకపోతే మరో ఆందోళన: సీజేపీ
ఫొటో సోర్స్, Reuters
ఫొటో క్యాప్షన్, జంతర్ మంతర్ వద్ద శాంతియుతంగా నిరసన తెలిపేందుకు తేదీ ఖరారు చేయాలని కోరుతూ పోలీస్ స్టేషన్‌కు వెళ్తున్నట్లు సీజేపీ తెలిపింది. దిల్లీలోని జంతర్ మంతర్ వద్ద శాంతియుతంగా నిరసన తెలిపేందుకు పోలీసులు 24 గంటల్లోగా అనుమతి ఇవ్వకపోతే మరో ఆందోళనకు పిలుపునిస్తామని కాక్రోచ్ జనతా పార్టీ (సీజేపీ) ప్రకటించింది.
సీజేపీ అధికారిక ఎక్స్ ఖాతాలో తెలిపిన వివరాల ప్రకారం, సోమవారం ఉదయం 10 గంటలకు పార్టీ సహ కన్వీనర్లు ఆశుతోష్ రాంకా, సౌరవ్ దాస్, సీజేపీ లీగల్ హెడ్ రత్నా సింగ్ పార్లమెంట్ స్ట్రీట్ పోలీస్ స్టేషన్‌కు వెళ్లనున్నారు.
జంతర్ మంతర్ వద్ద శాంతియుతంగా నిరసన తెలిపేందుకు తేదీ ఖరారు చేయాలని కోరుతూ పోలీస్ స్టేషన్‌కు వెళ్తున్నట్లు సీజేపీ తెలిపింది.
“మా శాంతియుత నిరసనకు తేదీ ఖరారు చేయాలని కోరుతూ పోలీస్ స్టేషన్‌కు వెళ్తాం. దిల్లీ పోలీసులు 24 గంటల్లోగా తేదీని కేటాయించాలి. లేకపోతే మేమే నిరసన తేదీని ప్రకటిస్తాం” అని పేర్కొంది.
నేహా బోరా గురించి దర్శకుడు దేవా కట్టా ట్వీట్
ఫొటో సోర్స్, Facebook/Deva Katta
ఫొటో క్యాప్షన్, దేవా కట్టా అఖిల భారత విద్యార్థి సంఘం జాతీయ అధ్యక్షురాలు నేహా బోరా గురించి టాలీవుడ్ దర్శకుడు దేవా కట్టా 'ఎక్స్' వేదికగా స్పందించారు.
"ఆమెతో మీరు ఏకీభవించవచ్చు, లేకపోవచ్చు... ఆమె పోరాట స్ఫూర్తితో మీరు మమేకం కావచ్చు, కాకపోవచ్చు... కానీ, మన రాజకీయాలు, రాజకీయ నాయకుల నేరపూరిత, నిరంకుశ పోకడలు సాధారణ విషయంగా మారిపోతుండటంపట్ల ఆమె వ్యక్తం చేస్తున్న ఆక్రోశం, ఆగ్రహాన్ని మీరు అర్థం చేసుకోలేకపోతే... అప్పుడు నిజమైన 'యాంటీ-నేషనల్’ మీరే!!" అంటూ ఆయన తన పోస్ట్‌లో పేర్కొన్నారు.
నేడు ప్రతిపక్షాల మార్చ్: భద్రతా కారణాలతో దిల్లీలో 6 మెట్రో స్టేషన్లు మూసివేత
ఫొటో సోర్స్, Getty Images
ఫొటో క్యాప్షన్, ఆరు మెట్రో స్టేషన్లను దాదాపు 10 గంటల పాటు మూసివేయనున్నట్లు దిల్లీ మెట్రో రైల్ కార్పొరేషన్ (డీఎంఆర్‌సీ) ప్రకటించింది భద్రతా కారణాలతో సోమవారంనాడు ఆరు మెట్రో స్టేషన్లను దాదాపు 10 గంటల పాటు మూసివేయనున్నట్లు దిల్లీ మెట్రో రైల్ కార్పొరేషన్ (డీఎంఆర్‌సీ) ప్రకటించింది. ఈ స్టేషన్లలో ప్రయాణికుల రాకపోకలను అనుమతించబోమని డీఎంఆర్‌సీ తెలిపింది.
“భద్రతా కారణాల దృష్ట్యా 2026 అక్టోబర్ 12న ఉదయం 6 గంటల నుంచి సాయంత్రం 4 గంటల వరకు ఈ మెట్రో స్టేషన్లలో ఎంట్రీ, ఎగ్జిట్‌లను మూసివేస్తాం” అని ఓ ప్రకటనలోపేర్కొంది.
ఆ తర్వాత భద్రతా సంస్థలు పరిస్థితిని సమీక్షిస్తాయని, అవసరాన్ని బట్టి తదుపరి సమాచారం అందిస్తామని తెలిపింది. అయితే, సంబంధిత అన్ని మెట్రో స్టేషన్లలో రైళ్లు మారేందుకు ప్రయాణికులకు అనుమతి ఉంటుందని స్పష్టం చేసింది.
మూసివేసిన ఆరు మెట్రో స్టేషన్లు:
పటేల్ చౌక్, జన్‌పథ్, రాజీవ్ చౌక్, మండీ హౌస్, సెంట్రల్ సెక్రటేరియట్, బారాఖంబా రోడ్.
మరోవైపు, ప్రధాన ఎన్నికల కమిషనర్ జ్ఞానేశ్ కుమార్ రాజీనామా చేయాలని డిమాండ్ చేస్తూ ప్రతిపక్ష పార్టీల ఎంపీలు సోమవారం మార్చ్ నిర్వహించనున్నారు.
నేపాల్: గోర్ఖా జిల్లాలో విరుచుకుపడిన వరదలు
ఫొటో సోర్స్, Sovit Shrestha / AFPTV / AFP via Getty Images
ఫొటో క్యాప్షన్, నేపాల్‌లోని గోర్ఖా జిల్లా సల్లారి చుమ్నుబ్రిలో భవనాలను ముంచెత్తుతూ ధ్వంసం చేస్తున్న వరద నీరు. నేపాల్‌లోని మధ్య ప్రాంతంలో ఆకస్మిక వరదలు ముంచెత్తడంతో ఐదుగురు గల్లంతయ్యారు. వరదల ధాటికి ఇళ్లు, వంతెనలు కొట్టుకుపోయాయి. గల్లంతైన వారి కోసం అధికారులు ఇంకా గాలిస్తున్నారు.
నేపాల్‌లో అతిపెద్ద, సుదీర్ఘమైన పండుగ దశైన్‌ తొలి రోజు వేడుకలకు చిన్నారులు, స్థానికులు సిద్ధమవుతున్న సమయంలో గోర్ఖా జిల్లాలో ఈ వరదలు సంభవించాయి. వరదల్లో చిక్కుకున్న సుమారు 50 మందిని రక్షించినట్లు అధికారులు తెలిపారు.
తాజా వరదల్లో ప్రాణనష్టంపై అధికారులు ఇంకా ఎలాంటి నిర్ధరణ చేయలేదు. అయితే, ప్రాథమిక సమాచారం ప్రకారం చుమనుబ్రి గ్రామీణ మున్సిపాలిటీ పరిధిలో అత్యధిక నష్టం జరిగింది. కనీసం రెండు గ్రామాలు పూర్తిగా కొట్టుకుపోగా, పలు వంతెనలు కూడా వరదలకు ధ్వంసమయ్యాయని ఆ మున్సిపాలిటీ చైర్‌పర్సన్ నిమా లామా తెలిపారు.
గల్లంతైన ఐదుగురు పశువుల కాపరులని భావిస్తున్నట్లు నిమా చెప్పారు. సుమారు 100 ఆవులు కూడా కనిపించడం లేదని తెలిపారు. గోర్ఖా జిల్లా వ్యాప్తంగా వందలాది మంది నిరాశ్రయులయ్యారని జిల్లా సహాయ ప్రధాన అధికారి నేత్ర ప్రసాద్ శర్మ వెల్లడించారు.
రెండు నెలల క్రితం ముంచెత్తిన భారీ వరదలు, కొండచరియలు విరిగిపడిన ఘటనల నుంచే నేపాల్ ఇంకా కోలుకోలేదు. ఆ విపత్తులో వేలాది ఇళ్లు ధ్వంసమయ్యాయి. కీలకమైన ఇంధన మౌలిక సదుపాయాలు దెబ్బతిన్నాయి.వేలమంది మరణించగా, మరికొందరు గల్లంతయ్యారు.
జిబూటి తీరంలో పడవ మునగడంతో పిల్లలు సహా 139 మంది మృతి, హఫ్సా ఖలీల్
ఫొటో సోర్స్, International Organization for Migration
ఫొటో క్యాప్షన్, ఓబాక్ ఓడరేవు పట్టణానికి ఉత్తరాన ఉన్న గుహెరె సమీపంలో వలసదారులకు సహాయం చేస్తున్న ఐఓఎం సిబ్బంది జిబూటి తీరంలో పడవ మునిగిపోవడంతో కనీసం 139 మంది వలసదారులు ప్రాణాలు కోల్పోయారని, అందులో 15 మంది పిల్లలున్నారని ఐక్యరాజ్యసమితి వలసల విభాగం తెలిపింది. పలువురి ఆచూకీ ఇంకా తెలియడం లేదని తెలిపింది.
305 మందితో జిబూటి నుంచి యెమెన్‌కు బయల్దేరిన పడవ.. గురువారం రాత్రి ఓబాక్ ఓడరేవు పట్టణం సమీపంలో తిరగబడింది.
ఈ ఘటనలో సుమారు 82 మందిని రక్షించినట్లు అంతర్జాతీయ వలసల సంస్థ (ఐఓఎం) తెలిపింది.
ఆఫ్రికా ఖండంలోని హార్న్ ఆఫ్ ఆఫ్రికా ప్రాంతం నుంచి ఏటా వేలమంది వలసదారులు ప్రాణాలకు తెగించి ఈ ప్రయాణం సాగిస్తున్నారనీ, భద్రత, ఉపాధి కోసం గల్ఫ్ దేశాలకు చేరుకోవాలనే ఆశతో ప్రమాదకరమైన మార్గంలో వెళ్తున్నారని ఐఓఎం తెలిపింది.
గుడ్ మార్నింగ్
బీబీసీ తెలుగు లైవ్ పేజీ అప్‌డేట్లకు స్వాగతం,
నేను బీబీసీ ప్రతినిధి వద్ది ప్రభాకర్. మధ్యాహ్నం 2 గంటల వరకు ముఖ్యమైన వార్తలను మీకు అందిస్తాను.
నిన్నటి లైవ్ పేజీ కోసం ఈ లింక్‌ను క్లిక్ చేయండి.
