100% வரி விதிக்க வகை செய்யும் சட்டம் பற்றிய டிரம்ப் முடிவால் இந்தியா நிம்மதி

ரஷ்யா மீது விதிக்கப்பட்ட பல்வேறு பொருளாதார தடைகளை நிறுத்தி வைக்க அமெரிக்க அதிபர் டொனால்ட் டிரம்ப் தனது அதிகாரத்தைப் பயன்படுத்தியுள்ளார்.

யுக்ரேன் மீதான போருக்காக ரஷ்யாவைத் தண்டிக்கும் நோக்கில் இந்தத் தடைகளுக்கு அமெரிக்க நாடாளுமன்றம் சமீபத்தில் ஒப்புதல் அளித்திருந்தது.

இந்தச் சட்டத்தின்படி, ரஷ்யாவிடம் கச்சா எண்ணெய் வாங்கும் ஐந்து பெரிய நாடுகளில் இருந்து அமெரிக்காவுக்கு இறக்குமதி செய்யப்படும் அனைத்துப் பொருட்களுக்கும் 100 சதவீத வரி விதிக்க டிரம்புக்கு 30 நாட்கள் அவகாசம் அளிக்கப்பட்டிருந்தது.

பல்வேறு ரஷ்ய அமைப்புகள் மீது பொருளாதார தடைகள் விதிப்பதுடன், ரஷ்யாவின் எரிசக்திப் பொருட்கள் அனைத்தையும் அமெரிக்காவுக்கு இறக்குமதி செய்வதற்கு 500 சதவீத வரி விதிப்பதற்கும் இந்தச் சட்டம் வழிவகுத்தது. இந்த விதிகளை நடைமுறைப்படுத்துவதற்கான ஒரு மாத காலக்கெடு அக்டோபர் 18-ஆம் தேதியுடன் முடிவடைய இருந்தது.

இந்தச் சட்டத்தை நடைமுறைப்படுத்துவதில் இருந்து விலக்கு அளிப்பதன் மூலம், ரஷ்யாவின் எரிசக்திப் பொருட்களை அதிக அளவில் வாங்கும் நாடுகளான சீனா, இந்தியா, துருக்கி ஆகியவற்றுடன் ஏற்படக்கூடிய மோதலை டிரம்ப் தவிர்க்க முயன்றுள்ளதாகக் கூறப்படுகிறது.

வெள்ளிக்கிழமை இரவு வெளியிட்ட நிர்வாக உத்தரவில், சில தடைகளை நிறுத்தி வைப்பது அமெரிக்காவின் தேசிய நலனுக்கு உகந்தது என்று டிரம்ப் குறிப்பிட்டார்.

செப்டம்பரில் இந்தத் தடைகள் தொடர்பான மசோதாவில் டிரம்ப் கையெழுத்திட்டிருந்தார். இந்தத் தடைகள் ஞாயிற்றுக்கிழமை முதல் அமலுக்கு வரவிருந்தன.

அமெரிக்காவில் நவம்பர் மாதம் நடைபெறவுள்ள தேர்தலுக்கு முன், அந்நாட்டில் எரிசக்தி விலைகளைக் குறைப்பதற்காக ரஷ்யாவிடம் இருந்து டீசல் இறக்குமதி செய்ய அமெரிக்கா திட்டமிட்டுள்ளதாக டிரம்ப் கூறிய சில நாட்களுக்குப் பிறகு இந்த நடவடிக்கை எடுக்கப்பட்டுள்ளது. இந்தத் தேர்தல், அமெரிக்க நாடாளுமன்றத்தின் கட்டுப்பாடு எந்தக் கட்சியிடம் இருக்கும் என்பதைத் தீர்மானிக்கும்.

டிரம்பின் இந்தத் திட்டம் நாடாளுமன்ற உறுப்பினர்களிடையே அதிர்ச்சியை ஏற்படுத்தியுள்ளது. இரு முக்கியக் கட்சிகளையும் சேர்ந்த உறுப்பினர்கள் இதற்கு எதிர்ப்பு தெரிவித்துள்ளனர்.

இந்தியாவுக்கு பெரும் நிம்மதி

இந்தச் சட்டம் இந்தியாவுக்கு அச்சுறுத்தலாகப் பார்க்கப்பட்டது. குறிப்பாக, ரஷ்யாவுடன் வர்த்தக ஒப்பந்தங்களை மேற்கொள்வதற்கான முயற்சிகளிலும் டிரம்ப் ஈடுபட்டு வரும் நிலையில், இந்தியா மீது அழுத்தம் கொடுப்பதற்கான அவரது அதிகாரத்தை இந்தச் சட்டம் அதிகரித்திருக்கும்.

2026 ஆகஸ்ட் மாதம் வரை, ரஷ்யாவிடம் இருந்து அதிக அளவில் கச்சா எண்ணெய் வாங்கும் நாடுகளில் சீனாவுக்கு அடுத்தபடியாக இந்தியா இரண்டாவது இடத்தில் இருந்தது. எனவே, அமெரிக்கா விதிக்கக்கூடிய வரிகளால் இந்த இரண்டு ஆசிய நாடுகளும் அதிகம் பாதிக்கப்பட வாய்ப்பிருந்தது.

2022 டிசம்பர் முதல் 2026 ஆகஸ்ட் வரை, ரஷ்யாவின் மொத்த கச்சா எண்ணெய் ஏற்றுமதியில் சீனாவின் பங்கு 50 சதவீதமாகவும், இந்தியாவின் பங்கு 37 சதவீதமாகவும் இருந்தது.

இந்த மசோதா நிறைவேற்றப்பட்ட உடனேயே இந்திய வெளியுறவு அமைச்சகம் ஓர் அறிக்கையை வெளியிட்டது.

இந்த விவகாரம் குறித்து அமெரிக்காவிடம் எடுத்துரைத்துள்ளதாகவும், இதனால் இருதரப்பு உறவுகள் மட்டுமின்றி சர்வதேச எரிசக்திச் சந்தையிலும் ஏற்படக்கூடிய தாக்கம் குறித்துத் தனது கவலையைத் தெரிவித்துள்ளதாகவும் அந்த அறிக்கையில் கூறப்பட்டிருந்தது.

2026 ஜூலை மாதத்துக்கான சமீபத்திய தரவுகளின்படி, இந்தியாவின் கச்சா எண்ணெய் இறக்குமதியில் 51 சதவீதத்துக்கும் அதிகமான பங்கை ரஷ்யா கொண்டிருந்தது. ஹோர்மூஸ் நீரிணை வழியாக எண்ணெய் போக்குவரத்து பாதிக்கப்பட்டுள்ள நிலையில், குறுகிய காலத்திற்குள் ரஷ்ய எண்ணெய் மீதான சார்பை இந்தியாவால் கணிசமாகக் குறைப்பது கடினமாக இருக்கலாம்.

அமெரிக்காவில் உள்ள ஓர் இறக்குமதியாளர் இந்தியாவிலிருந்து 20 டாலர் மதிப்புள்ள ஆடைகளை வாங்குகிறார் என்று வைத்துக்கொள்வோம். அந்தப் பொருட்களுக்கு 100 சதவீத இறக்குமதி வரி விதிக்கப்பட்டால், அமெரிக்க எல்லையில் கூடுதலாக 20 டாலர் வரியாகச் செலுத்த வேண்டும்.

இதனுடன் உள்நாட்டுப் போக்குவரத்துச் செலவு, சில்லறை விற்பனையாளர்களின் லாப வரம்பு, பிற வரிகள் ஆகியவையும் சேர்க்கப்படும். அதே பொருளை வேறொரு நாட்டிலிருந்து மிகக் குறைந்த இறக்குமதி வரியில் பெற முடிந்தால், இந்தியாவிலிருந்து அதிக விலை கொடுத்து வாங்க வேண்டிய அவசியம் இருக்காது.

இந்தியா அமெரிக்கச் சந்தையைச் சார்ந்திருப்பதைக் குறைக்க முயன்று வருகிறது. ஆனால், அது அவ்வளவு எளிதானதல்ல.

சுதந்திர வர்த்தக ஒப்பந்தங்கள் அமெரிக்கச் சந்தைக்கு மாற்றாக அமைய முடியாது. இருப்பினும், பிற முக்கியச் சந்தைகளில் நுழைவதற்கான செலவைக் குறைக்க அவை உதவக்கூடும்.

ஆனால், வரிச் சலுகைகள் மட்டுமே அந்தச் சந்தைகளில் நுழைவதற்கான வாய்ப்பை உறுதிசெய்யாது. இந்திய ஏற்றுமதியாளர்கள் போக்குவரத்து மற்றும் சரக்குக் கையாளும் வசதிகளில் முதலீடு செய்ய வேண்டும். தொழில்நுட்ப மற்றும் பொருள் தரநிலைகளைப் பூர்த்தி செய்ய வேண்டும், தங்களது தயாரிப்புகளின் வடிவமைப்புகளை மாற்றியமைக்க வேண்டும் மற்றும் விநியோகக் கட்டமைப்புகளையும் உருவாக்க வேண்டும். அமெரிக்கச் சந்தையில் இடம்பிடிக்க அவர்களுக்கு உதவிய திறன்களே இங்கும் தேவைப்படும்.

ஏற்றுமதிச் சந்தைகளைப் பல்வகைப்படுத்துவதற்கும் ஓர் எல்லை இருப்பதாக நிபுணர்கள் கூறுகின்றனர். ஓர் நிறுவனம் அமெரிக்கச் சந்தையைச் சார்ந்திருப்பதை 60 சதவீதத்திலிருந்து குறைத்து, ஐரோப்பியச் சந்தையை 60 சதவீதம் சார்ந்திருக்கத் தொடங்கினால், புவியியல் அடிப்படையில் அதன் சந்தை விரிவடைந்துள்ளது. ஆனால், அதன் வர்த்தக உத்தியில் பெரிய மாற்றம் ஏற்படவில்லை.

சந்தைகளைப் பல்வகைப்படுத்துவது என்பது ஏற்றுமதி செய்யும் நாடுகளை மாற்றுவது மட்டுமல்ல; வாடிக்கையாளர்களின் எண்ணிக்கையையும் பல்வேறு பிரிவுகளையும் விரிவுபடுத்துவதாகும்.

அமெரிக்காவில் எதிர்ப்புகள் அதிகரிக்கலாம்

அமெரிக்காவின் இந்தத் தடைகள் தொடர்பான சட்டத்துக்கு, மறைந்த குடியரசுக் கட்சி செனட்டர் லிண்ட்சே கிரஹாமின் பெயர் சூட்டப்பட்டுள்ளது. தெற்கு கரோலினாவைச் சேர்ந்த அவர், ஜூலை 11-ஆம் தேதி உயிரிழப்பதற்கு முன்பு, வாஷிங்டனில் யுக்ரேனுக்கு ஆதரவாகக் குரல் கொடுத்த முக்கியமானவர்களில் ஒருவராக இருந்தார்.

ரஷ்யாவின் பொருளாதாரத்தை இலக்காகக் கொண்ட இந்தச் சட்டம், ரஷ்ய எண்ணெய் மற்றும் எரிவாயுவை அதிக அளவில் வாங்கும் ஐந்து நாடுகளுக்கு, குறிப்பாகச் சீனா மற்றும் இந்தியாவுக்கு, 100 சதவீதம் வரை இறக்குமதி வரி விதிக்க டிரம்புக்கு விரிவான அதிகாரங்களை வழங்குகிறது.

ரஷ்ய அதிபர் விளாதிமிர் புதின், அந்நாட்டின் மூத்த அரசு அதிகாரிகள், வங்கிகள் மற்றும் பிற நிதி நிறுவனங்கள் மீதும் இந்தச் சட்டம் தடைகளை விதிக்கிறது.

ஏற்கெனவே நடைமுறையில் உள்ள தடைகளைத் தவிர்ப்பதற்குப் பயன்படுத்தப்படும் எண்ணெய்க் கப்பல்களை உள்ளடக்கிய ரஷ்யாவின் 'நிழற்படை' மீதும் நடவடிக்கை எடுக்க இது வழிவகுக்கிறது.

அக்டோபர் 18-ஆம் தேதி அமலுக்கு வரவிருந்த இந்தப் புதிய சட்டத்தை நடைமுறைப்படுத்துமாறு வலியுறுத்தி, இரு முக்கிய அமெரிக்கக் கட்சிகளையும் சேர்ந்த 20 நாடாளுமன்ற உறுப்பினர்கள் வியாழக்கிழமை டிரம்புக்குக் கடிதம் எழுதினர்.

கடந்த வாரம், ரஷ்ய அதிபர் புதினுடன் தொலைபேசியில் பேசியதாகவும், மாஸ்கோவிலிருந்து டீசல் வாங்க ஒப்புக்கொண்டதாகவும் டிரம்ப் அறிவித்தார்.

இந்த நடவடிக்கையை அமெரிக்காவின் நட்பு நாடுகள் விமர்சித்தன. இது யுக்ரேனுக்கு எதிரான போரில் ரஷ்யாவுக்கு உதவக்கூடும் என்று அவை கவலை தெரிவித்தன.

யுக்ரேன் அதிபர் ஸெலென்ஸ்கி, இந்த ஒப்பந்தத்தை புதினுக்கு வழங்கப்படும் பரிசு என்று வர்ணித்தார். மேலும், "முடிவுக்குக் கொண்டுவரப்பட வேண்டிய ஒரு போரில் செய்யப்படும் முதலீடு இது" என்றும் அவர் கூறினார்.

- இது, பிபிசிக்காக கலெக்டிவ் நியூஸ்ரூம் வெளியீடு