Warar dheeraad ah oo ka soo kordhay markabka shidaalka qaada ee gacanta ugu jira burcad badeedda Soomaalida

Qoysaska dhibanayaasha afduubka lagu haysto ee markabka Honor 25 ee burcad badeeda Soomaalidu qafaasheen ayaa ka codsaday madaxweynaha Indonesia Prabowo Subianto inuu si deg deg ah uga hadlo kiiska markabka oo ay la socdeen 17 shaqaale ah oo afar ka mid ah ay u dhasheen dalka Indonesia, walina ay gacanta ugu jiraan burcad badeeda, sida laga soo xigtay wakaaladda wararka Indonesia ee Antara.

"Waxaan caawimaad weydiisanayaa Mr. Prabowo, waxaana u waydiisanayaa cunugeyga. Cunugaygu hadda waxa uu ku sugan yahay xaalad u baahan caawimo Mr. Prabowo" ayay tiri Sitti Aminah oo ah hooyada dhashay Kabtanka Markabka Honor oo la yiraahdo Ashhari Samadikun, mar ay hadleysay Axaddii.

Waxa ay rajaynaysaa in dawladda Indonesia oo adeegsanaysa madaxweynaha ay ka jawaabto dhacdadan oo ay fiiro gaar ah u yeelato afduubka markabka saliidda siday ee ka soo shiraacday dalka Cumaan ee hadda ku sugan biyaha Soomaaliya.

"Mr. Prabowo, madaxweynaheenow, fadlan i caawi, mudane, aad ii caawi mudane, waxaa gacanta ku haya burcad badeed Soomaali ah muddo dhowr maalmood ah" ayey tiri ayadoo ku hadlaysay hadal rajo keeni kara.

Dhanka kale, xaaska dhibbanaha, Santi Sanjaya (26) ayaa ka sheekeysay waqtiyadii ay ninkeeda iyo shaqaalihii la socday ay afduubteen burcad badeedda Soomaalida. Waxay kula xiriirtay wicitaan muuqaal ah Talaadadii (Abriil 20) markay ahayd 7:30 p.m.

Inkastoo isgaarsiintu go'an tahay, haddana waxay isku dayday inay dib u wacdo, telifoonkuna weli waa uu shaqaynayey, laakiin wax jawaab ah lagama helin. Jawigii ayaa kacsanaa, markaasuu go'aansaday in uu telefoonka dhigo.

"Telefoonkiisu wali waa shaqaynayey laakiin kama uusan jawaabin, saacado yar ka dibna ma shaqeynin, ka dib, markii iigu dambeysay ee aan la xiriiro wicitaan muuqaal ah wuxuu ahaa habeenkii xalay, wuxuu ii sheegay inuu fiican yahay oo uu ku jiro markabka" ayey tiri.

Si kastaba ha ahaatee, wuxuu sheegay in xaaladda markabka dushiisa ay marar badan is beddeshay. Mararka qaarkood haddii budhcad-badeeddu ay dareemaan khatar, xaaladdu waxay noqon doontaa mid kacsan, oo saameynaysa bedqabka nafsaaniga ah iyo badbaadada markabka.

"Ninkaygu wuxuu kaloo codsaday in la caawiyo, anigoo rajeynaya in dowladdu ay caawin doonto. Qoyskayagu sidoo kale waxay rajeynayaan in dowladdu ay ku caawiso inay si nabad ah ugu soo laabtaan dalkooda" ayay tiri.

Santi ayaa sheegtay in ninkeeda uu ahaa kabtanka markabka tan iyo Janaayo 2026. Qandaraaskiisa waxaa la qorsheeyay inuu dhaco marka markabka uu yimaado. Kadib wuxuu qorsheynayey inuu dib ugu laabato Gowa, South Sulawesi, Indonesia.

Burcad badeeddu waxay 21kii Abriil, 2026ka afduubteen markabka Honor 25 oo ku gooshayay calanka dalka Cumaan, xilli uu marayay biyaha Soomaaliya.

Khariidadda maraakiibta ayaa sidoo kale muujisay in markabku uu ku wareegayay biyaha u dhow Marinka Hormuz, ka hor inta uusan dib u soo noqon 2-dii Abriil, isagoo u socday dhinaca koofurta Soomaaliya.

Markabkan oo hadda ay gacanta ku hayaan burcad-badeed, isla markaana ay saarnaayeen 17 shaqaale ah — 10 Pakistani ah, 4 Indonesian, 1 Hindi, 1 Sri Lankan iyo 1 Myanmar ah — ayaa la sheegay inuu ku sugan yahay meel u dhow xeebaha Soomaaliya, inta u dhaxaysa magaalooyinka kalluumeysiga ee Xaafuun iyo Bander Beyla.