Who be di victims of Kempton Park murders for South Africa as authorities discova fifth bodi

Police for South Africa don discova di deadi bodi of anoda woman for Kempton Park area, Gauteng.

Di bodi of 38-year-old jogger Elizabeth "Tsontso" Moselakgomo wey police announce on Monday, 14 September go make am di fifth bodi dem go discovei for Kempton Park, especially for Rhodesfield area for Gauteng, in di past two months.

Her disappearance bin spark one nationwide call as kontri pipo beg for help in finding her.

Acting National Commissioner of di South African Police Service (SAPS), Lieutenant General Puleng Dimpane tok say preliminary investigation wey detectives gada show say di circumstances wey surround di five deaths dey similar.

E say di women dey half naked wit visible bruising and for di same area.

"Dem find di bodis of di women half-naked and wit visible bruising, and di discovery sites dey located within di same vicinity".

Oga Dimpane don rule out di possibility say di deaths dey linked to a serial killer, even though investigation still dey go on.

Who be di victims?

Di first victim na one 37-year-old woman wey authorities discover her body near R21 on 15 July.

Police neva confam her identity yet, but dem say dem find her naked and e be like say she bin dey restrained wit cable ties.

Justice, Crime Prevention and Security say dem don arrest one suspect and e dey for custody.

"For dis case, our investigators don already make progress, and one suspect currently dey for custody. Dem arrest di suspect on 17 July 2026. Di investigation into dis mata dey continue".

On 24 August, authorities discover di second body, one 32-year-old woman, near di R21. Dem also find her partially clothed.

Di third body, na dat of one unidentified woman, wey dem discover on 10 September 2026.

Police say di body bin dey advanced state of decomposition and dem find her naked. "At dis stage, we neva fit formally establish her identity. Di identification process dey ongoing," police tok.

Di fourth body, na dat of one 38-year-old woman wey dem discover on 12 September for Rhodesfield for di back of one hotel for di area.

Di woman bin dey wear sports clothing and dem find her partially clothed.

Her identity still dey subject to formal confirmation by di family through di mortuary identification process, authorities tok.

Di fifth body na dat of 38-year-old Elizabeth "Tsontso" Moselakgomo. Police say her family identify her on Monday for di Germiston mortuary.

Moselakgomo bin go missing afta one afternoon run on 9 September for Rhodesfield, Kempton Park.

Her disappearance bin raise concerns for di area, as authorities bin put out resources to search for her.

Wetin authorities dey do

Di police don arrest one pesin in connection wit di discovery of di first body for July, and e still dey for custody.

Meanwhile, di police don set up one task team to investigate di murders but these grim discoveries and Moselakgomo death don spark renewed outrage and fear among South Africans.

Di Acting National Commissioner of di police don order di team to investigate these cases and determine weda di incidents dey related.

Di task team go include detectives from specialised units, wey include di Murder and Robbery Unit, di Investigative Psychology Unit, plus oda relevant disciplines and resources required to urgently advance di investigation.

Gauteng Deputy Provincial Commissioner, Major General Mbuso Khumalo go lead di team, wey im work na to find di pesin wey dey responsible for these deaths.

However, police say preliminary information show say di circumstances wey surround di deaths dey similar.

"While investigations still dey go on, SAPS for dis stage neva confam say di deaths dey linked to a serial killer, police dey very concerned about di similarities and e reach for dem to issue public warning and intensify investigations," di police tok for statement.

Police don also ask women for Kempton Park area to avoid walking or running alone "particularly for isolated areas".

Dem also advise women to avoid secluded spaces, remain vigilant and, if possible, travel or exercise in groups.

South Africans react to di death of di women

Tributes don dey pour in for di avid runner, wey pipo sabi well well as "Tsontso" afta police confam her death.

South Africans also share di fear and anxiety women often dey feel for di kontri.

One jogger wey sabi Moselakgomo through dia running club tell BBC say di discovery of di five bodies dey "very scary".

"E dey sad to know say evri woman in South Africa… no fit just go outside. You no fit just enta shop and buy flowers… becos you are always in danger," Keamo Sefularo tok.

Sefularo, say Moselakgomo disappearance dey "heavy for di club".

Di 29-year-old also ask weda Moselakgomo go "still dey hia if maybe she bin get one small community to run wit [or] one or three pipo"?

"As we always say, wen we go out for runs, safety dey in numbers," she tok.

Lesedi Ledwaba, for one post on X, say: "Women no dey free if we gatz calculate wia, wen and wit whom we fit walk, run or exist safely".

Advocacy group Women for Change say di discovery of these bodies was angering.

"Wetin be di purpose of having a protective service like di police if we gatz make sure… we dey [protect] ourselves," di group Merlize Jogiat ask.

Jogiat mostly blame poor implementation of laws wey dem pass for di failure to curb di issue and she say "pressure in numbers" from citizens fit be di solution.

Moselakgomo family don thank di public for di support in searching for di mother of dia daughter wey leave behind one child. Dem also hail her eight-year-old daughter for raising di alarm about her disappearance.

Authorities neva identify di remaining bodies.