Six-year-old pikin, vice principal dey among pipo gunmen kpai for Kogi as Edo receive advisory on planned attack

Three-year-old pikin and one school principal dey among di three pipo wey gunmen kpai on Wednesday, 10 June, wen dem attack Govment Secondary School, for Iluke Bunu for Kabba-Bunu Local Govment Area of Kogi State, northcentral Nigeria.

Kingsley Fanwo wey be di Kogi State Commissioner for Information and Communications confam di attack for im X page.

"Kogi State Govment don receive wit deep sadness di report of terrorist attack on Iluke Community for Bunu District of Kabba-Bunu Local Govment Area by criminal elements wey bin disguise demsefs in military uniforms in desperate attempt to deceive residents and perpetrate dia evil act," e tok.

E say di attack lead to di death of three members of di community.

According to Fanwo, military personnel and local security forces intervene and prevent di attackers from carrying out mass abduction of students.

"Reports available to govment indicate say di bandits disrupt ongoing Waec examination and don already begin to march students into di bush wen security operatives engage dem in fierce gun battle," e add.

Fanwo say di security personnel rescue all di students unharmed and return dem to safety.

E say during di operation, security forces neutralise one of di bandits, while several odas escape wit gunshot injuries.

"Govment dey closely monitor di situation for di affected community and dey work wit relevant security agencies to strengthen security presence for di area," e tok.

"Make e dey clearly stated say Kogi State no go submit to terror. Criminal elements wey dey seek to undermine di peace and security of our state go continue to meet a determined, coordinated, and uncompromising response from security agencies and di govment," e add.

On dia part, di Kogi State Police Command say di pipo wey di gunmen kpai na Ganiyu Anifowose, di vice principal of UBE Secondary/Primary School, Iluke; Mr. Sunday Jacob Alhassan, aged 70 years; and one Sunday Ayele, aged 6 years.

Di police command say dem dey make evri effort to gbab di gunmen.

Kidnapping of schoolchildren for Nigeria don increase in recent times. Schoolchildren and teachers wey gunmen kidnap for Borno and Oyo states still dey for kidnappers den almost one month afta dem abduct dem.

DSS alert NSCDC sake of planned abduction of schoolchildren for Edo State

Meanwhile, di Department of State Services (DSS) don alert di Nigerian Security and Civil Defence Corps (NSCDC) sake of planned mass abduction of schoolchildren by suspected bandits for Edo State.

Dem send di alert inside one security advisory wey dem date June 5, 2026 and addressed to di Edo State commandant of di NSCDC.

Inside di advisory wey B. Agada sign for di state director of di DSS, di agency say intelligence wey dey available to dem indicate say plans dey by suspected bandits to target schoolchildren for di state.

"Intelligence wey di Command get indicate plans by suspected bandits to kidnap school children for di state, particularly for Edo North Senatorial District," di statement tok.

"Dis follow interception between suspected bandits, one BAWA (FNU), suspected to be of Fulani extraction from Zamfara State and one NUHU (FNU).

According to di DSS, during di conversation, di two of dem disclose dia plans to kidnap schoolchildren for Edo North Senatorial District, as previous attempts to kidnap wealthy individuals no yield di expected financial gains.

Di DSS say on 4, June 2026 one suspect identified as Emmanuel Momidu chop arrest while allegedly conducting surveillance around one secondary school for Akoko Edo LGA.

Di agency advise di NSCDC and oda stakeholders to strengthen security around schools, particularly for Edo North Senatorial District.