اسټرالیا؛ له اتو مېلیونو وګړو غوښتل شوي چې رڼاګانې بندې کړي

د اسټرالیا د انرژۍ وزیر د دغه هېواد نیو ساوت وېلز ایالت کې له وګړو غوښتي چې د انرژۍ کړکېچ ته په کتو دې کورونو کې د رڼا کارول کم کړي.

کرېس بووېن ویلي که شونې وي نو اسټرالیایان باید هر ماښام تر دوو ساعتونو برېښنا ونه کاروي.

نوموړي ویلي، باوري دی چې د برېښنا کمښت به د لوډشېډېنګ یا پرچاوۍ لامل نه شي.

دا غوښتنه له هغې وروسته کېږي چې اسټرالیا کې د برېښنا بیو کې زیاتوالي له امله دغه هېواد د برېښنا تولید بازار محدود کړ.

ښاغلي بوېن نوي ساوت وېلز ایالت کې خلکو ته ویلی چې څومره یې وس وي انرژي دې سپما کړي.

ده ویلي:" که چېرته انتخاب لرئ چې ځینې ځانګړي کارونه وکړئ چې برېښنا کاروي نو هڅه وکړئ چې د ماښام له شپږو تر اتو بجو موده کې یې مه کوئ."

د کړکېچ لامل څه دی؟

استرالیا په نړیواله کچه د ډبرو سکرو او مایع طبیعي غازو یو تر ټولو لوی صادروونکی هېواد دی خو له تېرې یوې میاشتې راهیسې د انرژۍ له کړکېچ سره مخ دی.

د دې هېواد ۷۵ سلنه برېښنا له ډبرو سکرو تولېدېږي. پر اسټرالیا له ډېره وخته دا نیوکې دي چې د شین کوریزو غازونو د تولید کمولو کې جدي ګامونه نه اخلي او په نوې کېدونکې انرژۍ هم کمه پانګونه کوي.

په نړیواله کچه د برېښنا او غازو د بیو لوړېدو د اسټرالیا پر بازار هم اغېز کړی.

څو میاشتې وړاندې سېلابونو په نوي ساوت وېلز او کوینزلنډ ایالتونو کې د ډبرو سکرو د تولید ځینې کانونه وځپل او د دې تر څنګ تخنیکي ستونزو هم د ډبرو سکرو د کانونو تولید محدود کړی.

اوسمهال د اسټرالیا د ډبرو سکرو د تولید نژدې ۲۰ سلنه کانونه له کاره لوېدلي.

د برېښنا ځینو تولیدوونکو شرکتونه د بیو له لوړوالي سر ټکوي ځکه د اوکرایین کړکېچ له امله په نړیواله کچه د غازو او ډبرو سکرو بیې لوړې شوي.

دې ټولو اسټرالیا کې دننه د یوه مېګاواټ برېښنا بیه له ۳۰۰ اسټرالیايي ډالرو پورته کړې چې د انرژۍ بازار د څارونکې ادارې ( ایمو) له خوا د ټاکل شوي حد نه لوړه ده.

د برېښنا تولیدوونکو شرکتونو له دې امله کارونه وځنډول چې د تولید لګښت یې هم نه پوره کېده.

راتلونکی ګام څه دی؟

ایمو لا نه دي ویلي چې کله به دا محدودیت لرې کېږي. دغې ادارې یوه وینا پاڼه کې ویلي: "د برېښنايي سیستم د څار یوې ملي ادارې په توګه موږ حالت څارو او د بدلون په حالت کې به نور جزیات خپاره کړو."

نن (پنجشنبه) داسټرالیا د انرژۍ تولیدوونکي یو تر ټولو لوی شرکت ای جي اېل ویلي چې راتلونکو ورځو کې به فابریکو او د عامه کارونې لپاره د برېښنا تولید ډېروي.

په نوي ساوت وېلز ایالت کې د دغه شرکت د برېښنا د تولید درې بټۍ ناکاره وې چې په وینا یې د رغولو چارې یې روانې دي.

پاکستان کې حالت څنګه دی؟

دا یوازې اسټرالیا نه ده چې د برېښنا او انرژۍ له کمښت سره مخه ده.

پاکستان، سریلنکا، هند او ځینې اروپايي هېوادونه هم یا د انرژۍ له کمښت سره مخ دي او یا د بیو له لوړوالي سر ټکوي.

پاکستان کې حکومت اعلان کړی چې لویو ښارونو کې به هټۍ او فابریکې د ماښام په اته نیمو بجو فعالیتونه بندوي.

دوی وايي دا ګام یې له دې امله اخېستی چې برېښنا وسپموي.

د پاکستان حکومت په دغه هېواد کې د تېلو بیو د زیاتوالي تر څنګ پرېکړه کړې چې د برېښنا بیه هم زیاته کړي.

چارواکو ویلي چې د برېښنا یوه یونټ بیه کې د ۷.۹۱ روپیو زیاتوالی منظور شوی چې د جولای میاشتې له لومړۍ نېټې به عملي کېږي.‌