SMO "deiseil ceum eile a ghabhail"

Chuir Prionnsabal Sabhal Mòr Ostaig fàilte air a' mholadh gum bi cead aig a' cholaiste Ghàidhlig ceumannan a thoirt seachad air a ceann fhèin.

Thuirt an Dr Gillian Rothach gun robh iad deiseil "ceum eile a ghabhail" agus gur e "cearcall foghlam slan" a bhiodh ann far am faighear foghlam tro mheadhan na Gàidhlig "bhon ghlùin dhan aois as sine".

Thuirt i: "Bidh e cuideachd a' sealltainn spèis dhan chànan gum faod thu foghlam gu ìre oilthigh fhaighinn tro mheadhan na Gàidhlig.

Ghabh Buill na Pàrlamaid Albannaich ri atharrachadh a chuir am Ball Lib Deamach, Willie Renie, air adhart nuair a bha Bile nan Cànanan Albannach ga dheasbad aig Holyrood Dimàirt.

Bha Mgr Rennie air iarraidh gum feumadh ministearan ceuman a ghabhail gus SMO a leasachadh mar an ionad nàiseanta airson cànan, foghlam is cultar na Gàidhlig, is gum feumadh ath-sgrùdadh air inbhe SMO beachdachadh air maoineachadh agus gnìomhan sam bith gus a' cholaiste a neartachadh.

'S e moladh a bha a-riamh a' faighinn taic thar-phàrtaidh aig gach ìre den bhile.

Thuirt an Leas-Phrìomh Mhinistear fhèin aig an dàrna ìre den bhile nach gabhadh na h-amasan a bha na choius a choileanadh às aonais SMO.

Thèid ath-sgrùdadh air inbhe SMO a dhèanamh cho luath 's a ghabhas, agus thuirt Gillian Rothach gum bi sgrùdadh air an t-suidheachadh ionmhais aca mar phàirt den phròiseas sin.

"Coltach ri iomadach buidheann eile tha sinn gann de dh'airgead. B' urrainn dhuinn barrachd a dhèanamh le barrachd," thuirt i.

Bha an Dr Rothach aig Pàrlamaid na h-Alba Dimàirt nuair a chaidh am bile troimhe.

Thuirt i gun robh a' gabhail ris gur e ionad nàiseanta airson cànain, cultair agus foghlam na Gàidhlig a th' anns a' cholaiste mar-thà ach gum biodh inbhe mar "ionad beag spèisealta" freagarrach.

"Dhèanadh sin an Sabhal Mòr coltach ri Conservatoire Rìoghail na h-Alba agus Sgoil Ealain Ghlaschu, bheireadh e inbhe HE àrd ìre dhuinn agus bhiodh sin anabarrach math."