Duaisean Litreachais 2026: 'Barrachd leabhraichean cloinne na riamh roimhe'

Stiùiriche Comhairle nan Leabhraichean, Alison Young, le leabhraichean cloinne agus sgeilfichean là leabhraichean de dhaoine òga air a cùlaibhALISON LANG

Thuirt Alison Young gun robh na "britheamhan air am brosnachadh" leis nach chaidh a chur a-steach de thagraidhean do chloinn is daoine òga

Dh'ainmich Comhairle nan Leabhraichean cò na leabhraichean air geàrr-liostaichean nan Duaisean Litreachais 2026.

Tha seachd roinnean ann do leabhraichean a chaidh fhoillseachadh eadar toiseach a' Chèitein 2025 agus an 20mh là den Ghiblean am-bliadhna, agus sgrìobhaidhean nach eil fhathast ann an clò.

Tha iad air dà fharpais, seach dìreach aonan, a dhèanamh airson na chaidh a sgrìobhadh do chloinn agus òigridh "às dèidh bliadhna san deach barrachd leabhraichean cloinne fhoillseachadh na bha riamh againn roimhe".

Thuirt Alison Lang, Stiùiriche Comhairle nan Leabhraichean: "Bha na britheamhan air am brosnachadh gu mòr leis an uiread de leabhraichean cloinne a chaidh a sgrìobhadh sa Ghàidhlig bho thùs, agus leis an fharsaingeachd de chuspairean a chunnaic sinn thairis air na roinnean air fad am-bliadhna."

Mar sin dheth, bidh duaisean fa leth airson leabhraichean do phàistean suas gu aois seachd, agus tè do chloinn nas sine.

Thuirt Alan Bett, Ceannard Litreachais is Foillseachaidh aig Alba Chruthachail: "Tha na Duaisean Litreachais a' comharrachadh beairteas agus farsaingeachd sgrìobhaidh ann an Gàidhlig.

"Tha e gu sònraichte cudromach aithne a thoirt do dh'fhoillseachadh airson cloinne agus daoine òga, mar a thathas a' dèanamh an seo leis an dà dhuais airson leabhraichean cloinne."

Gheibhear na geàrr-liostaichean air fad an seo.

Thèid an luchd-buannachaidh ainmeachadh aig cuirm shònraichte Dimàirt 15mh den t-Sultain aig Taigh-cluiche Cottiers ann an Glaschu.