Còrr is £1m don choimhearsnachd gus Oighreachd nam Bàgh a cheannach

Tha Stòras Fearainn na h-Alba air £1,082,680 a thoirt do dh'Oighreachd Coimhearsnachd Bhàigh na Hearadh Earranta (BoHCEL) gus am fearann sa bheil 10,927 heactair a chur ann an làmhan nan daoine.

Tha e air tè de shia sgìrean a fhuair maoineachadh air a' Ghàidhealtachd bhon stòras riaghaltais a thug seachad £2,197,924.

Thuirt Cathraiche BoHCEL, Euan Galloway, gun robh iad air an dòigh leis an naidheachd.

"Thug e 14 bliadhna dhuinn an ìre seo a ruighinn. Bu mhath leinn taing a thoirt do na daoine agus buidhnean a thug taic dhuinn."

Tha Oighreachd nam Bàgh a' toirt a-steach a' chuid as motha de thaobh sear na Hearadh, an Taobh Tuath, Beàrnaraigh agus eileanan beaga an Caoalas na Hearadh far nach eil sluagh.

Chaidh bhòt a chumail ann an 2022 san do chuir 290 den luchd-còmhnaidh an taic ri moladh an oighreachd a ghabhail os làimh, le 170 na aghaidh.

Am measg nam pròiseactan eile a fhuair taic-airgid bhon chuairt mhaoineachaidh as ùire seo de Stòras Fearann na h-Alba tha Coilltean Coimhearsnachd na Morbhairne.

Fhuair iadsan £459,650 airson 94 heactair de thalamh ri taobh baile Loch Àlainn a cheannach airson croitean, làraichean taighe agus coille coimhearsnachd a chruthachadh.

Chaidh £345,663 a thoirt do dh'Iomairt Coimhearsnachd Loch Iù airson an raon-gnìomhachais Bac Dubh ann am Poll Iù airson an làrach, nach eil ga chleachdadh tuilleadh, a leasachadh airson ghnothachasan ionadail.

Cleachdaidh Urras Coille Coimhearsnachd Chataibh a Tuath an £109,745 a fhuair iadsan airson bothan fiodha ann an Coille Bhorgaidh agus an talamh timcheall air a cheannach a chùm buannachd na coimhearsnachd.

Thuirt Cara GhillEasbaidh, Cathraiche Comataidh Stòras Fearainn na h-Alba: "Bidh an t-airgead seo a' toirt spionnadh do na coimhearsnachdan, a' cuideachadh bhuidhnean sealbh fhaighinn air talamh agus togalaichean cudromach agus a' fàgail gu bheil smachd aig daoine ionadail air na gnothaichean a tha cudromach dhaibh."