Loidhne-rèile gu bhith dùinte 'son ùine

Loidhne-rèileNetwork Rail

Bidh Loidhne-rèile Thaobh Siar na Gàidhealtachd dùinte eadar an Gearasdan agus a' Chrìon-Làraich gu tràth an ath-sheachdain is obair-càraidh a' leantainn aig trì làraichean.

Rinn uisge trom Diluain sgrios air an loidhne.

Dh'innis Network Rail gun deach 400 tonna de chreig a sguabadh air falbh ann an aon àite is gum feum iad an loidhne a thogail às ùr.

Thuirt iad gu bheil einnseanairean ag obair là is a dh'oidhche ach nach eil e comasach innse an-dràsta cuine dìreach a dh'fhosgaileas an loidhne às ùr.

Tha ScotRail air busaichean a chur air dòigh eadar an Gearasdan is a' Chrìon-Làraich ach chan urrainn dhaibh frithealadh air Drochaid an Aonachain, Drochaid Ruaidh, Tulaich, An Coire Odhar, no Raineach.

Gheibhear am fiosrachadh as ùire bho ScotRail an seo.

Rinn na tuiltean milleadh air cuid de rathaidean cuideachd.

Tha an A86 an ear air Drochaid Ruaidh a-nise fosgailte a-rithist ach tha Comhairle na Gàidhealtachd air innse gum bi am B863 faisg air Ceann Loch Lìobhann dùinte fad beagan sheachdainnean gus an tèid obair-càraidh a dhèanamh.