Esi m n'ịgba ọkada banye n'ịkwọ ụgbọelu- Captain Callistus

Aha onyonyo, E si m n'ịgba ọkada banye n'ịkwọ ụgbọelu- Captain Callistus
Esi m n'ịgba ọkada banye n'ịkwọ ụgbọelu- Captain Callistus
    • Onye dere ya, Chinonso Ugorji
    • Ndị mere akụkọ a, Journalist
    • Onye dere ya, Donald Wogu
    • Ndị mere akụkọ a, Video Journalist
    • Onye dere ya, Chinonso Orji Nnachi
    • Ndị mere akụkọ a, Video Journalist

Ifeanyi Callistus Kenechukwu a maara nke ọma dịka 'Captain Callistus' ekwuola na ya na-agbabu ọkada tupu ọ malite ịkwọ ụgbọelu.

Captain Callistus kwupụtara nke a oge ya na BBC News Igbo nwere mkparịtaụka pụrụ iche.

Na nkọwa ya, Captain Callistus kwuru na ya malitere ịnata ọzụzụ maka ịkwọ ụgbọelu n'afọ 2012 ma bido ịkwọ ụgbọelu e ji ebu ndị njem n'afọ 2017.

O kwuru na o nweghị mgbe ya nwere ebumnobi ịbụ onye ọkwọụgbọelu n'ihi na ezinaụlọ ya abaghị ọgaranya.

Mana o ruru n'ogogo ọ nọ taa site n'amara Chukwu nakwa site na ndị nọ ya n'akụkụ, dịka onye nwe ụlọọrụ ụgbọelu Air Peace bụ Allen Onyema.

Captain Callistus kọwara sí, "Amụghị m n'obi ọgaranya. Oge m nọ n'ụlọakwụkwọ praịmarị, aga m eyigide 'knicker', ike ya akwọchaa. Onye lee anya n'azụ 'knicker' m ọ na-ahụ anya abụọ".

"Ọ dịghịrị m mfe mgbe m na-etolite, mana ihe na-agba m ume bụ na ọzụzụ ndị ahụ, ma ire ahụekere ma ịrụ kim-bom, ma igwu ọwa mmiri ma ịgba ọkada chịkọtara m ọnụ ka m bụrụ ihe m bụ taa."

Skip Akụkọ ndị ọzọ yiri ya and continue readingAkụkọ ndị ọzọ yiri ya

End of Akụkọ ndị ọzọ yiri ya

Captain Callistus bụ nwaafọ Mbosi dị n'okpuru ọchịchị ime obodo Ihiala n'Anambara Steeti.

O kwuru na ihe kpalitere mmụọ ya iji olu Igbo na Pidgin na-ama ọkwa n'ime ụgbọelu bụ na mgbe ọ malitere ịkwọ ụgbọelu ma na-ebu ndị mmadụ ka ọ chọpụtara na ndị mmadụ kachasị aghọta ọkwa a na-amara ha ma ọ bụrụ na e wetuo ya n'olu asụsụ ha na-aghọta.

Captain Callistus kọwara sị,"Olu asụsụ anyị m na-ekwu okwu ya bụ Igbo, Awụsa, Yoruba na Pidgin nke onye niile nọ na Naịjirịa na-aghọta. Ọ na-eme ka obi ruo ndị mmadụ ala, maka na ụfọdụ mmadụ na-abụ ha gaa ịbanye n'ụgbọelu, ihe dịka ụbọchị atọ maọbụ anọ tupu njem, ha ga-anọ n'ekpere".

"Dịka ha na-abanye n'ụgbọelu, obi agaghị eru ha ala. Ha nọrọ ala n'ime ụgbọelu, ha anaghị anụ ihe ndị nlekọta ọha a na-akpọ 'cabin crew' nakwa ndị ọkwọụgbọelu na-ekwu. Ha na-ekwu n'ime obi ha sị,'ọ bụ gịnị ka anyị na-akọ. Ha na-arịọ Chukwu ka ụgbọelu felie ma fedata n'udo'.

"Oge m malitere ibu ndị mmadụ n'ụgbọelu ma ghọta na ọ bụrụ na m wetuoro ha ihe ahụ n'olu asụsụ anyị ma kọwaa ya n'asụsụ ha na-anụ ma ghọta, ọ ga-enye aka iwetu mmụọ ha ma mee ka ha nweta onwe ha nke ọma n'ụgwọ ha kwụrụ".

"Oge ahụ ka m jiri ghọta, mee nke mbụ, nke abụọ chọpụta na ọ na-atọ ndị mmadụ ụtọ. Ọ na-abụkwa anyị fechaa n'elu, fetuo, ndị mmadụ na-ekele m maka iji olu asụsụ anyị."