Ndị nwe ụlọọrụ njem ụgbọelu na Naịjirịa nwereike ịkwụsị ọrụ

Ndị nwere ụlọọrụ njem ụgbọelu ekwuola na ha nwereike ịkwụsị ibu ndị njem gaa mpaghara Naịjirịa dị iche iche ma ọ bụrụ na gọọmenti emeghị ihe ọbụla iji belata ọnụahịa mmanụ ụgbọelu.

Onye kwuru nke a bụ Onyeisi ụlọọrụ njem ụgbọelu Air Peace bụ Allen Onyema.

Ka ọ dị taa, mmanụ ụgbọelu bụ Jet A1 a na-erebu ihe dịka narị naịra itoolu (N900) maka otu lita n'ọnwa Febụwarị, agbagoola ruo ihe dịka puku naịra atọ na narị naịra atọ maka otu lita ugbua.

Minista na-ahụ maka njem ụgbọelu bụ Festus Keyamo gwara ndị ntaakụkọ sị na ọ bụ eziokwu na a kwaala ndị nwere ụlọọrụ njem ụgbọelu aka ọjọọ, ruo na nke ha agaghị enweike gaa n'ihu ma ọ bụrụ na ha ebulighị ụgwọ tiketi ha nwa obere oge.

N'izuụka gara aga ka ụlọọrụ njem ụgbọelu ndị e nwere na Naịjirịa yiri egwu ịkwụsị ọrụ, ma kwuo na nke ahụ abụghị atụmatụ iji chọọ mkparịtaụka, kama ọ bụ maka na ha agaghị agakwa n'ihu na-efe ụgbọelu ha n'ọnọdụ ọjọọ nke na-emetụta nchekwa na akụnaụba ha.

Nsogbu a na-abịa dịka agha dara n'etiti Ịran, Izrel na Amerịka, bụ nke kụsasịrị ịtụ mgbere mmanụ site ọwara mmiri dị oke mkpa e si atụ mgbere na mbaụwa bụ 'Strait of Hormuz' kemgbe ngwụcha ọnwa Febụwarị, ma mee ka ọnụahịa mmanụ rịa elu.

Ego ụgbọ dị icheiche na-aga elu kwa mgbe kwa mgbe na Naịjirịa, ọkachasị kemgbe agha Izrel na Iran malitere, mana sọọsọ nke a ka gọọmenti na-etinye ọnụ.