KAI TSAYE, Abubuwan da ke faruwa a Najeriya da sassan duniya

Rahoto kai-tsaye

Nabeela Mukhtar Uba

1. Mintuna 4 da suka wuceShugaban Majalisar Shari'ar Musulunci Nafiu Baba-Ahmed ya rasu

   Allah ya yi wa Shugaban Majalisar Ƙoli kan Harkokin Shari’ar Musulunci a Najeriya, Mallam Nafiu Baba-Ahmed rasuwa.

   Mallam Nafiu Baba-Ahmed ya rasu ne yau Talata bayan doguwar jinya.

   Za a yi jana’izarsa anjima da ƙarfe 1 na rana a masallacin ƙasa da ke Abuja, babban birnin Najeriya.

   Marigayin ya shafe shekaru 26 na rayuwarsa wajen hidimtawa Musulunci tare da fafutukar tabbatar da adalci ga kowa.

   Cikin waɗanda suka miƙa saƙon ta’aziyyar rasuwarsa har da Tsohon Ministan Sadarwa na Najeriya, Sheikh Isa Pantami.

   Pantami ya bayyana alhininsa ne cikin wata sanarwa da ya wallafa a shafinsa na Fesbuk.

2. Mintuna 55 da suka wuceAna ci gaba da aikin gano sojojin da suka mutu a hatsarin jirgi

   

   Asalin hoton, Ondo SEMA

   Gwamnatin Jihar Ondo ta ƙaddamar da aikin ceto sakamakon hatsarin wani jirgin Rundunar Sojin Saman Najeriya da ya faru a yankin Igbokoda na Ƙaramar Hukumar Ilaje a jihar Ondo.

   Wakilan Gwamnan Jihar Ondo, Dr Lucky Orimisan Aiyedatiwa, ƙarƙashin jagorancin Babban Mataimaki na Musamman ga gwamnan kan agajin Gaggawa da Tabbatar da Tsaro, Hon. Wellington Oriade Adebawo, sun ziyarci wurin da jirgin ya yi hatsari jiya Litinin, domin tantance halin da ake ciki da kuma tallafawa ƙoƙarin gano mutanen da ke cikin jirgin.

   Tawagar ta ƙunshi jami’an Hukumar Ba da Agajin Gaggawa ta Jihar Ondo da Hukumar bada Agajin Gaggawa ta Ƙasa (NEMA), wakilin ƙungiyar agaji ta Red Cross ta Najeriya, da kuma wani mai bai wa gwamna shawara, Hon. Cornelius Owolewa.

   Mai Bai wa Gwamnan Shawara na Musamman kan Harkokin Sadarwa, Hon. Allen Sowore, shi ma ya haɗu da tawagar a wurin da jirgin ya yi hatsari.

   Jirgin, mai lamba NAF 970, nau’in ATR-42 ne da Rundunar Sojin Saman Najeriya ke amfani da shi. An ruwaito cewa yana ɗauke da mutum 32, waɗanda suka haɗa da fasinjoji 25 da ma’aikatan jirgi bakwai, lokacin da ya yi hatsari a yankin Igbokoda yayin da yake kan aiki daga Benin zuwa Lagos.

   Gwamnatin Jihar Ondo ta nuna damuwa kan lamarin tare da jaddada aniyarta ta ci gaba da tallafa wa aikin da ake gudanarwa.

   Ta kuma yi kira ga mazauna yankin da sauran jama’a su kwantar da hankalinsu tare da dogaro da sahihan bayanai daga hukumomi yayin da ake ci gaba da aikin nema.

   

   Asalin hoton, Ondo SEMA

3. Sa'a 1 da ta wuceNajeriya na makokin mutuwar sojojinta a hatsarin jirgin sama

   

   Asalin hoton, Getty Images

   Shugaban Najeriya, Bola Tinubu, ya ayyana zaman makoki na kwanaki uku sakamakon hatsarin jirgin soji da ya faru a jihar Ondo inda kuma ya bayar da umarnin gudanar da bincike kan musabbabin hatsarin.

   Haka kuma, Tinubu ya bayar da umarnin a yi ƙasa ƙasa da tutoci domin girmama jami’an sojin da suka rasu a hatsarin jirgin.

   A wata sanarwa da mai magana da yawun shugaban ƙasa, Bayo Onanuga, ya fitar ranar Litinin, Tinubu ya “miƙa ta’aziyyarsa ga iyalan fasinjoji 25 da ma’aikatan jirgin bakwai da lamarin ya shafa, da Babban Hafsan Sojin Sama, Air Marshal Sunday Kelvin Aneke, da daukacin hafsoshi da jami’an Rundunar Sojin Saman Najeriya.”

   Hatsarin jirgin dai ya yi ajalin dukkan mutum 32 da ke ciki da suka hada da fasinjoji 25 da ma'aikata 7.

   “Wannan lokaci ne mai matuƙar raɗaɗi ga Rundunar Sojinmu da ma ƙasa baki ɗaya. Jami’an Rundunar Sojin Samanmu suna jefa rayukansu cikin haɗari a kowace rana domin tabbatar da tsaron Najeriya. Ba za a taɓa mantawa da sadaukarwar da suka yi ba,” in ji Tinubu.

4. Sa'a 1 da ta wuceAssalamu Alaikum

   Masu bin wannan shafin barkan mu da safiyar wannan rana ta Talata.

   Nabeela Mukhtar Uba ke fatan kasancewa da ku a daidai wannan lokaci, domin kawo muku labaran abubuwan da ke faruwa a faɗin duniya, za mu fi mayar da hankali kan Najeriya da makwabtanta.

   Kuna iya leƙawa shafukanmu na sada zumunta domin tafka muhawara kan labaran da muke wallafawa.