You’re viewing a text-only version of this website that uses less data. View the main version of the website including all images and videos.
પશ્ચિમ બંગાળ, તામિલનાડુ, કેરળ, પુડુચેરી અને આસામનાં ચૂંટણી પરિણામો આજે જાહેર થઈ રહ્યાં છે. પશ્ચિમ બંગાળમાં મમતા બેનરજીની સત્તા રહેશે કે જશે તેના પર સૌની નજર છે. બાકી રાજ્યોમાં શું થશે?
આર્જવ પારેખ
ભારતનાં ચૂંટણીપંચની વેબસાઇટ અનુસાર, ભવાનીપુરમાં મમતા બેનરજી પહેલા રાઉન્ડની મતગણતરી પછી 1966 મતે આગળ છે.
મમતા બેનરજીને 3666 મત મળ્યા છે.
ભાજપના સુવેન્દુ અધિકારીને 1670 મત મળ્યા છે, અને તેઓ બીજા નંબરે છે.
ભવાનીપુરમાં મતગણતરી કેન્દ્ર બહાર કેવો માહોલ છે? બીબીસી સંવાદદાતા રૉક્સી ગાગડેકર છારા ભવાનીપુરથી LIVE
સવારે 10 વાગ્યા સુધીમાં તમામ રાજ્યોના ચૂંટણી પરિણામોનાં પ્રાથમિક વલણો આવવા લાગ્યાં છે.
પશ્ચિમ બંગાળ:
પશ્ચિમ બંગાળમાં તૃણમૂલ કૉંગ્રેસ 127 બેઠકો પર, તથા ભાજપ 148 બેઠકો પર આગળ છે. કૉંગ્રેસ ચાર બેઠકો પર આગળ છે.
તામિલનાડુ:
તામિલનાડુમાં સત્તાધારી પક્ષ ડીએમકે 94 બેઠકો પર આગળ છે. એઆઈડીએમકે ગઠબંધન 66 બેઠકો પર આગળ છે.
વિજયનો પક્ષ ટીવીકે પણ ઊલટફેર કરી શકે તેવી સ્થિતિમાં છે અને તે 55 બેઠકો પર આગળ છે. એનટીકે તથા અન્ય બે બેઠકો પર આગળ છે.
કેરળ:
કેરળમાં ડાબેરી ગઠબંધન 46 બેઠકો પર તથા કૉંગ્રેસનું યુડીએફ ગઠબંધન 91 બેઠકો પર આગળ છે. એનડીએ ત્રણ બેઠકો પર આગળ છે.
આસામ:
આસામમાં નવ વાગ્યા સુધીમાં ભાજપ ગઠબંધન 89 બેઠકો તથા કૉંગ્રેસ ગઠબંધન 29 બેઠકો પર આગળ છે.
એઆઇયુડીએફ અને અન્ય એક બેઠક પર આગળ છે.
પશ્ચિમ બંગાળમાં મતગણતરી કેન્દ્રોની બહાર ભારે સુરક્ષા-વ્યવસ્થા છે. તસવીરોમાં જુઓ મતગણતરી કેન્દ્રોની બહાર કેવી સ્થિતિ છે?
સવારે નવ વાગ્યા સુધીમાં તમામ રાજ્યોનાં ચૂંટણી પરિણામોનાં પ્રાથમિક વલણો આવવા લાગ્યાં છે.
પશ્ચિમ બંગાળ:
પશ્ચિમ બંગાળમાં તૃણમૂલ કૉંગ્રેસ 107 બેઠકો પર, તથા ભાજપ 118 બેઠકો પર આગળ છે. કૉંગ્રેસ ચાર બેઠકો પર આગળ છે.
કેરળ:
કેરળમાં ડાબેરી ગઠબંધન 33 બેઠકો પર તથા કૉંગ્રેસનું યુડીએફ ગઠબંધન 45 બેઠકો પર આગળ છે. એનડીએ 12 બેઠકો પર આગળ છે.
જ્યારે અન્ય એક બેઠક પર આગળ છે.
તામિલનાડુ:
તામિલનાડુમાં સત્તાધારી પક્ષ ડીએમકે 67 બેઠકો પર આગળ છે. એઆઈડીએમકે ગઠબંધન 27 બેઠકો પર આગળ છે.
વિજયનો પક્ષ ટીવીકે 13 બેઠક પર તથા એનટીકે અને અન્ય 2 બેઠકો પર આગળ છે.
આસામ:
આસામમાં નવ વાગ્યા સુધીમાં ભાજપ ગઠબંધન 59 બેઠકો તથા કૉંગ્રેસ ગઠબંધન 18 બેઠકો પર આગળ છે.
એઆઇયુડીએફ બે બેઠકો પર આગળ છે, જ્યારે અન્ય એક બેઠક પર આગળ છે.
પુડુચેરી:
પુડુચેરીમાં એનડીએ ગઠબંધન 19 બેઠકો પર તથા કૉંગ્રેસ ગઠબંધન ત્રણ બેઠકો પર આગળ છે. અન્ય પાંચ બેઠક પર આગળ છે.
ગુજરાતની ઉમરેઠ વિધાનસભાની પેટાચૂંટણી માટે પણ મતગણતરી શરૂ થઈ ગઈ છે.
ઉમરેઠના ભાજપના ધારાસભ્ય ગોવિંદ પરમારનું નિધન થયું હોવાથી ત્યાં પેટાચૂંટણી થઈ હતી.
ભાજપે ત્યાં ગોવિંદ પરમારના પુત્ર હર્ષદ પરમારને ટિકિટ આપી હતી. કૉંગ્રેસે ભૃગુરાજસિંહ ચૌહાણને ટિકિટ આપી હતી.
એનસીપીના(એપી)ના જયંત પટેલ ‘બોસ્કી’ પણ આ ચૂંટણીજંગમાં છે.
આમ આદમી પાર્ટીએ અહીં ઉમેદવાર ઉતાર્યા ન હતા.
આસામ, પશ્ચિમ બંગાળ, તામિલનાડુ, કેરળ અને પુડુચેરીમાં મતગણતરી શરૂ થઈ ગઈ છે.
ભારતનાં ચૂંટણીપંચની અધિકૃત વેબસાઇટ અનુસાર, મતગણતરી શરૂ થઈ ગઈ છે.
સુરક્ષાવ્યવસ્થાઓ વચ્ચે હજારો કર્મચારીઓ મતગણતરી કરશે.
થોડી વારમાં જ પ્રાથમિક વલણો આવવાં લાગશે.
મોટા ભાગના ઍક્ઝિટ પોલનાં તારણોમાં પશ્ચિમ બંગાળમાં અલગ-અલગ ચિત્ર છે. તેમાં પીપલ્સ પલ્સના ઍક્ઝિટ પોલ સિવાયના ઍક્ઝિટ પોલ પશ્ચિમ બંગાળમાં ભાજપની સરકાર તરફ ઇશારો કરે છે.
આસામમાં મહત્તમ ઍક્ઝિટ પોલમાં ભાજપ ગઠબંધનને બહુમત પ્રાપ્ત થતો હોવાનું જણાવાઈ રહ્યું છે.
કેરળમાં મોટા ભાગના ઍક્ઝિટ પોલ યુડીએફની સરકાર બનવાનું અનુમાન કરી રહ્યા છે.
તામિલનાડુમાં વિધાનસભાની 234 બેઠકો છે અને અહીં બહુમતનો આંકડો 118 છે. ત્યાં મહત્તમ ઍક્ઝિટ પોલ ડીએમકેની સરકાર ફરીથી સત્તામાં આવી રહી છે તે તરફ અનુમાન કરી રહ્યા છે, પરંતુ ઍક્સિસ માય ઇન્ડિયા ઍક્ઝિટ પોલમાં ટીવીકેને 98-120 બેઠકો આપવામાં આવી છે.
કેન્દ્રશાસિત પ્રદેશ પુડુચેરીમાં બહુમતનો આંકડો 16 છે.ત્યાં ઍક્ઝિટ પોલ ભાજપ ગઠબંધનને બહુમત આપી રહ્યા છે.
ગત મહિને ચાર રાજ્યો અને એક કેન્દ્રશાસિત પ્રદેશમાં યોજાયેલી વિધાનસભા ચૂંટણીનાં પરિણામો આજે જાહેર કરવામાં આવશે.
આસામ, કેરળ અને પુડુચેરીમાં નવ એપ્રિલે એક જ તબક્કામાં મતદાન થયું હતું. તામિલનાડુમાં પણ 23 એપ્રિલે એક જ તબક્કામાં મતદાન થયું હતું.
જ્યારે પશ્ચિમ બંગાળમાં 23 અને 29 એપ્રિલના રોજ બે તબક્કામાં મતદાન થયું હતું.
મોટા ભાગના લોકો પશ્ચિમ બંગાળ વિધાનસભા ચૂંટણીનાં પરિણામો પર નજર રાખી રહ્યાં છે, કારણ કે રાજ્યમાં ઘણા ઍક્ઝિટ પોલમાં શાસક પક્ષ તૃણમૂલ કૉંગ્રેસ અને ભાજપ વચ્ચે હરીફાઈ રહેશે તેવું અનુમાન કરાયું છે.
પશ્ચિમ બંગાળ:
પશ્ચિમ બંગાળ વિધાનસભાની 294 બેઠકોમાંથી 293 બેઠકોનાં પરિણામો સોમવારે જાહેર કરવામાં આવશે, કેમ કે ચૂંટણીપંચે ફાલ્ટા બેઠક પર ફરીથી મતદાન કરાવવાનો નિર્ણય લીધો છે.
ફાલ્ટા વિધાનસભા બેઠકનાં 285 મતદાનમથકો પર 21 મેના રોજ મતદાન થશે, જ્યારે તેનાં પરિણામો 24 મેના રોજ જાહેર કરવામાં આવશે.
પશ્ચિમ બંગાળમાં બહુમતીનો આંકડો 148 બેઠકોનો છે. તૃણમૂલ કૉંગ્રેસ છેલ્લાં 15 વર્ષથી રાજ્યમાં સત્તામાં છે. ભાજપને આશા છે કે તે આ વખતે તૃણમૂલ કૉંગ્રેસને સત્તામાંથી બહાર કરશે.
આસામ:
126 બેઠકોવાળી આસામ વિધાનસભામાં વિજયી થવા માટે 64 બેઠકો લાવવી જરૂરી છે.
મુખ્ય મંત્રી હિમંતા બિસ્વા સરમા ભાજપ માટે સતત ત્રીજી વખત જીતનો દાવો કરી રહ્યા છે. તે જ સમયે, કૉંગ્રેસનો દાવો છે કે તે રાજ્યમાં સત્તામાં પાછી ફરશે.
જોકે, આસામમાં મોટા ભાગના ઍક્ઝિટ પોલમાં ભાજપ ગઠબંધન આગળ હોવાનું દર્શાવવામાં આવ્યું છે.
કેરળ:
140 બેઠકોવાળી કેરળ વિધાનસભામાં ડાબેરી સરકાર સતત 10 વર્ષથી સત્તામાં છે.
અત્યાર સુધી, કેરળ વિધાનસભાની ચૂંટણીઓમાં મોટા ભાગે બે-તરફી સ્પર્ધા જોવા મળી છે. ઍક્ઝિટ પોલમાં પણ શાસક એલડીએફ અને વિપક્ષ યુડીએફ વચ્ચે સ્પર્ધા દર્શાવવામાં આવી છે, જ્યારે મોટા ભાગના ઍક્ઝિટ પોલમાં યુડીએફ આગળ હોવાનું દર્શાવવામાં આવ્યું છે.
તામિલનાડુ:
આ વખતે તામિલનાડુ વિધાનસભા ચૂંટણીમાં ડીએમકે અને એઆઈડીએમકે ગઠબંધન ઉપરાંત ત્રીજા પક્ષે પણ પોતાની મજબૂત હાજરી દર્શાવી છે.
આ ત્રીજો પક્ષ પ્રખ્યાત તમિલ સિનેમાના અભિનેતા વિજયનો ટીવીકે છે. તામિલનાડુ વિધાનસભાની 234 બેઠકો માટે 23 એપ્રિલે એક જ તબક્કામાં મતદાન થયું હતું.
અહીં બહુમતી લાવવા 118 બેઠકો લાવવી જરૂરી છે.
પુડુચેરી:
પુડુચેરીમાં ભાજપની આગેવાની હેઠળનું એનડીએ ગઠબંધન પહેલેથી જ સત્તામાં છે.
પુડુચેરી વિધાનસભાની 30 બેઠકો માટે બહુમતીનો આંકડો 16 છે.
મોટા ભાગના ઍક્ઝિટ પોલમાં ભાજપની આગેવાનીવાળા ગઠબંધનને લીડ મળશે તેવું અનુમાન કરવામાં આવી રહ્યું છે.
પશ્ચિમ બંગાળ, આસામ, તામિલનાડુ, કેરળ અને પુડ્ડુચેરીનાં ચૂંટણીપરિણામો આજે જાહેર થઈ રહ્યાં છે. પાંચ રાજ્યોમાં કોની સરકાર બનશે? કોણ કેટલી બેઠકો પર આગળ?
ઇન્ફોગ્રાફિક્સ સાથે તમામ મહત્ત્વની અપડેટ્સ આજે બીબીસી ગુજરાતીના આ લાઇવ પેજ પર તમને મળતી રહેશે. દિવસભર અમારી સાથે જોડાયેલા રહો.
