એ પુત્ર, જેણે ત્રણ વર્ષ સુધી માતાના મૃતદેહને ફ્રીઝરમાં છુપાવી રાખ્યો અને પેન્શન સહિતના લાભો લીધા

પરિવારના ઘરના ડ્રૉઇંગ રૂમમાં રાખેલા ચેસ્ટ ફ્રીઝરમાં પોતાનાં મૃત માતાના મૃતદેહને લગભગ ત્રણ વર્ષ સુધી રાખી અને તેમનું પેન્શન તથા અન્ય લાભો મેળવવાનું ચાલુ રાખનાર એક વ્યક્તિને બે વર્ષ અને ચાર મહિનાની સજા ફટકારવામાં આવી છે.

60 વર્ષીય ક્રિસ્ટોફર ફિલિપ્સની ધરપકડ ફેબ્રુઆરીમાં બ્રિજન્ડ કાઉન્ટીના પોર્થકૉલસ્થિત પોપલર ક્રેસન્ટ ખાતે પોલીસે 89 વર્ષીય સિલ્વિયા ફિલિપ્સનો મૃતદેહ શોધ્યા બાદ કરવામાં આવી હતી.

સિલ્વિયા ફિલિપ્સનું માર્ચ 2023માં અવસાન થયું હતું.

ફિલિપ્સે ડૉક્ટરોને કહ્યું હતું કે તેઓ "તેમને છોડવા માગતા નહોતા" અને તેમના મૃત્યુ પછી "વધુ સમય ઇચ્છતા હતા."

સિલ્વિયા ફિલિપ્સનો મૃતદેહ ચિત્તા પ્રિન્ટવાળા રેશમી ધાબળામાં લપેટેલી હાલતમાં મળ્યો હતો. તેમના શરીર પર પીળાં અને ગુલાબી ગુલાબ મૂકવામાં આવ્યાં હતાં, તેમજ ફિલિપ્સ અને પરિવારના કૂતરા ટીનાની તરફથી સહી કરેલું જન્મદિવસનું કાર્ડ પણ તેમની પાસે રાખવામાં આવ્યું હતું.

કાર્ડમાં લખેલું હતું: "મમ્મી માટે, ક્રિસ્ટોફર અને ટીના તરફથી."

ફિલિપ્સે ત્રણ ગુના કબૂલ કર્યા હતા, જેમાં પોતાનાં માતાનો કાયદેસર અને યોગ્ય રીતે અંતિમ સંસ્કાર ન કરવો તેમજ તેમની પેન્શન અને અન્ય લાભો, જેમાં હાઉસિંગ બેનિફિટ અને વિન્ટર ફ્યુઅલ ઍલાઉન્સનો સમાવેશ થાય છે, મેળવવાનું ચાલુ રાખવું સામેલ હતું.

મર્થીર ટિડફિલ ક્રાઉન કોર્ટને જણાવાયું કે ફિલિપ્સને બે વર્ષની ઉંમરે સિલ્વિયાએ ફિલિપ્સને દત્તક લીધા હતા, તેઓ તેમની સાથે "અસાધારણ રીતે નજીક" હતા અને તેમના એકમાત્ર કેરટેકર હતા.

કોર્ટને જણાવવામાં આવ્યું કે 8 માર્ચ, 2023ના રોજ તેમના અવસાનના બીજા દિવસે તેમના પુત્રે તેમને ગળે લગાડીને કહ્યું હતું કે તેઓ તેમની સંભાળ રાખશે.

ફ્રીઝરમાં ત્રણ વર્ષ સુધી મૃતદેહ રાખ્યો

તેમના મૃત્યુના બે દિવસ બાદ ફિલિપ્સે AO.com પરથી એક ચેસ્ટ ફ્રીઝર ખરીદ્યું અને તેને તેમના ઘરના ડાઇનિંગ રૂમમાં મૂક્યું. જીપી દ્વારા માગવામાં આવેલી વેલફેર ચેક દરમિયાન પોલીસે તેમનો મૃતદેહ શોધ્યો ત્યાં સુધી તેઓ ત્યાં જ રહ્યા હતા.

કોર્ટને જણાવાયું કે સ્થાનિક મેડિકલ પ્રેક્ટિસે તેમની સાથે સંપર્ક કરવાનો વારંવાર પ્રયાસ કર્યો હતો, પરંતુ તેમના પુત્રે તેમને પ્રવેશ આપવાનો ઇનકાર કર્યો હતો.

જ્યારે પોલીસ ઘેર પહોંચી ત્યારે ફિલિપ્સે કહ્યું હતું કે તેમનાં માતા લંડન રહેવા ગયાં છે અને તેઓ કોઈ મેડિકલ ટેસ્ટ કરાવવા માગતાં નથી.

કોર્ટમાં જણાવાયું કે પોલીસ અધિકારીઓને શંકા થઈ હતી, કારણ કે ફિલિપ્સ ધ્રૂજતા અને ગભરાયેલા દેખાયા હતા. તેઓ ઉપરના માળે દોડી ગયા હતા અને બાદમાં ફોન પર પોતાની ગર્લફ્રૅન્ડને એમ કહેતા સંભળાયા હતા કે "પોલીસ મારી ધરપકડ કરવા જઈ રહી છે, તારી પાસે વિલ છે."

ફ્રીઝર ખોલનારા અધિકારીઓએ જોયું કે 89 વર્ષીય મહિલાનો મૃતદેહ સંપૂર્ણપણે થીજી ગયો હતો અને પોસ્ટમૉર્ટમ કરવું શક્ય બને તે પહેલાં થોડો સમય લાગ્યો હતો.

પૅથૉલૉજિસ્ટ મૃત્યુનું કારણ નક્કી કરી શક્યા નથી, પરંતુ મૃત્યુ શંકાસ્પદ પરિસ્થિતિઓમાં થયું હોવાનું માનવામાં આવતું નથી.

કોર્ટમાં જણાવાયું કે ફિલિપ્સ પોતાનાં માતાના મૃતદેહની બાજુમાં રહેવા માટે નીચેના માળે સૂવા લાગ્યા હતા. કેટલીક વખત તેઓ ફ્રીઝર ખોલીને તેમની માતાનો હાથ પકડીને બેસતા હતા.

ડૉક્ટરોની શંકા ગઈ ત્યારે શું થયું?

સિલ્વિયા ફિલિપ્સે 2021માં પોતાની સ્થાનિક જીપી પ્રેક્ટિસમાં 26 અપૉઇન્ટમેન્ટ્સ લીધી હતી અને 2022માં છ અપૉઇન્ટમેન્ટ્સ લીધી હતી, ત્યાર બાદ તેમનો કોઈ વધુ સંપર્ક રહ્યો નહોતો.

કોર્ટમાં જણાવાયું કે તેઓ છેલ્લે 24 સપ્ટેમ્બર, 2022ના રોજ A&E વિભાગમાં જોવા મળ્યા હતા અને 26 સપ્ટેમ્બરે તેમના સ્થાનિક જીપીએ ઘર મુલાકાત લીધી હતી, પરંતુ તેમ છતાં તેમનો પુત્ર તેમની દવાઓના પ્રિસ્ક્રિપ્શન લેવાનું ચાલુ રાખતો હતો.

સિલ્વિયા ફિલિપ્સને પ્રેક્ટિસ દ્વારા સમીક્ષા માટે બોલાવાયા હતા, પરંતુ તેમના પુત્રે જણાવ્યું હતું કે તેઓ ક્લિનિકમાં આવવા માગતા નથી અને તેમને બ્લડ ટેસ્ટની જરૂર નથી.

ક્રિસ્ટોફર ફિલિપ્સને કુલ રૂપિયા 78,190.92નાં રાજ્ય પેન્શન, પેન્શન ક્રેડિટ, અટેન્ડન્સ ઍલાઉન્સ, વિન્ટર ફ્યુઅલ પેમેન્ટ્સ, કોસ્ટ-ઑફ-લિવિંગ પેમેન્ટ્સ અને હાઉસિંગ બેનિફિટ્સ મળ્યા હતા, જે તેમના મૃત્યુની જાણ કરવામાં આવી હોત તો બંધ થઈ ગયા હોત.

તેઓ 2008થી તેમની માતાના મુખ્ય કેરટેકર હતા અને કોર્ટમાં જણાવાયું કે 2022ના અંતમાં તેમનાં માતાની તબિયત વધુ ખરાબ થતાં તેમણે પોતાની નોકરી છોડી દીધી હતી. આ માતા-પુત્રની જોડી વિશે જણાવાયું હતું કે તેઓ "કેટલાક અંશે એકલવાયાં" હતાં.

બચાવ પક્ષ તરફથી વકીલ રૂથ સ્મિથે જણાવ્યું કે ફિલિપ્સે પોલીસને કહ્યું હતું: "હકીકતમાં હું તેમને જવા દેવા માગતો નહોતો."

તેમણે વધુમાં કહ્યું, "તેઓ તેમની સાથે એવી રીતે વાત કરતા હતા જાણે તેઓ હજી પણ જીવિત હોય... તેમની બાજુમાં બેસીને, ટેલિવિઝન કાર્યક્રમો, 'Coronation Street', ઘોડાદોડ વિશે વાત કરતા હતા, બરાબર જેમ તેઓ હંમેશાં કરતા હતા."

તેમણે ઉમેર્યું કે ફિલિપ્સ "એક સંવેદનશીલ વ્યક્તિ" હતા.

'રોજ તેમનો હાથ પકડીને..'

ફિલિપ્સ ડોકમાં ઊભા રહીને રડી પડ્યા હતા, જ્યારે બચાવ પક્ષની વકીલ સ્મિથે કહ્યું કે તેમના ક્લાયન્ટ "તેમનાં માતાની અત્યંત નજીક હતા" અને તેમના અવસાન બાદ "અતિશય શોકમાં" હતા.

તેમણે કહ્યું કે તેમનાં માતાના અવસાનને સ્વીકારવામાં તેઓ "અસમર્થ" હતા અને "તેમણે લગભગ એવી એક ખોટી કથા રચી લીધી હતી કે તેઓ હજી જીવિત છે."

'માતાના મૃત્યુને સ્વીકારી શક્યો નહીં'

ફિલિપ્સને બે વર્ષ અને ચાર મહિનાની સજા ફટકારતાં, જેમાંથી તેઓ 40 ટકા સમય કસ્ટડીમાં અને બાકી સમય લાઇસન્સ હેઠળ વિતાવશે, જજ લૉયડ-ક્લાર્કે કહ્યું કે તેમણે પોતાનાં માતાના મૃત્યુને "જાણીજોઈને છુપાવ્યું" હતું અને "તેઓ હજી જીવિત છે એવી છાપ ઊભી કરવા માટે પગલાં લીધાં હતાં."

લૉયડ-ક્લાર્કે ઉમેર્યું, "તમે તેમની દવાઓના પ્રિસ્ક્રિપ્શન મેળવવાનું ચાલુ રાખ્યું અને તબીબી વ્યાવસાયિકો તથા અંતે પોલીસને પણ ખોટું કહ્યું."

તેમણે કહ્યું, "સત્તાવાળાઓને જાણ કરીને તેમના કાયદેસર અંતિમ સંસ્કારની વ્યવસ્થા કરવાના બદલે, તમે 10 માર્ચે એક ચેસ્ટ ફ્રીઝર ખરીદ્યું અને તેમાં તેમનો મૃતદેહ છુપાવ્યો."

લૉયડ-ક્લાર્કે વધુમાં જણાવ્યું કે સંપત્તિ જપ્તી સંબંધિત કાર્યવાહી માટેની સમયરેખા બાદમાં નક્કી કરવામાં આવશે.

બીબીસી માટે કલેક્ટિવ ન્યૂઝરૂમનું પ્રકાશન