IKIBIRIRAHO, Afurika y'Epfo: Perezida Cyril Ramaphosa yaburiye abigaragambya bamagana abimukira kubikora mu mahoro

Amakuru y'ikibiriraho

Didier Bikorimana na Latifa Mutesi

1. Iminota 10 irahezeUmuherwe w'Umushinwa yakatiwe gufungwa imyaka 30 muri Amerika

   

   Ahavuye isanamu, AFP via Getty Images

   Guo Wengui, wahoze afatwa nk'umwe mu bacuruzi bakize cyane mu Bushinwa, yakatiwe gufungwa imyaka 30 muri Leta Zunze Ubumwe z'Amerika nyuma yo guhamwa n'ibyaha byo gukora uburiganya bwatwaye miliyari z'amadolari.

   Uyu wahoze ari umuherwe ukomeye mu by’ubwubatsi yahunze mu Bushinwa ajya muri Amerika mu 2017, aho yiyubatsemo isura nshya yo kunenga ishyaka rya gikomunisiti riri ku butegetsi mu Bushinwa, akanagira imbaga y’abantu bamukurikira ku mbuga zo kuri murandasi (internet).

   Ariko nyuma yaho Guo yaje guhamywa ibyaha birimo ubwambuzi, uburiganga n’iyezandonke.

   Umucamanza wo mu rukiko rw'i New York, Analisa Torres, yavuze ko Guo “yakoresheje mu nyungu ze abantu bashakaga kuzana demokarasi mu Bushinwa,” aho yabamburaga amafaranga yabo kugira ngo ayakoreshe mu buzima bw'iraha.

   BBC yagerageje kuvugana n’abahagarariye Guo kugira ngo bagire icyo batangaza, ariko ntibarasubiza.

   Guo, uzwi no ku yandi mazina arimo Miles Guo na Ho Wan Kwok, yakatiwe ari mu cyumba cy’urukiko cyari cyuzuye abamushyigikiye.

   Ayandi makuru yacu mushobora kuyakurikira kuri YouTube kuri BBC News Gahuza

   Kubera iki Ubushinwa bugenda bwongereza ibirwanisho vya nikleyere?

   Ni iki mu by'ukuri gituma Ubushinwa n'Uburusiya ari 'inshuti z'akadasohoka'?

   Kubera iki Ubushinwa buri mu nzira yo kwemeza itegeko rishasha rishira imbere 'ubumwe bw'amoko'?

2. Haciye isaha 1Afurika y'Epfo: Perezida Ramaphosa yaburiye abigaragambya bamagana abimukira kubikora mu mahoro

   

   Ahavuye isanamu, Anadolu via Getty Images

   Perezida w’Afurika y’Epfo Cyril Ramaphosa yavuze ko abantu bateganya kwigaragambya bamagana abimukira bakwiye kubikora “nta gutera ubwoba, nta gushyiraho ibikangisho cyangwa gutanga nyirantarengwa”.

   Yabiburiye abaturage ku wa mbere, bucya bushyira kuri uyu wa kabiri washyizweho nk’igihe ntarengwa kitatanzwe n’ubutegetsi cyuko abanyamahanga badafite ibyangombwa byemewe baba bamaze kuva muri icyo gihugu.

   Abaturage babarirwa mu bihumbi byinshi bakomoka mu bindi bihugu byo muri Afurika bamaze kuva muri Afurika y’Epfo mu byumweru bishize kubera ubwoba bwuko bashobora gukorerwa urugomo.

   Umugabo w’Umunya-Malawi udafite ibyangombwa byemewe yabwiye BBC ko yishimiye kuba asubiye iwabo ariko ko ashengutse umutima kubera ko asize abana bane bakiri bato.

   Ubwo imyigaragambyo yakazaga umurego mu mezi ya vuba aha ashize, Ramaphosa yakomeje kuburira abigaragambya ko bakwiye kubikora mu mahoro kandi bashyira mu gaciro, ari na ko yemera ko hacyenewe amavugurura ajyanye n’abinjira mu gihugu.

   Mu kanyamakuru asohora buri cyumweru, yibukije abaturage ati: “Bamwe mu banyamahanga baba muri Afurika y’Epfo bari hano mu buryo bwemewe n’amategeko.”

   “Barakora, bariga, batunze imiryango, bashora mu bukungu bwacu ndetse batanga umusanzu mwiza muri sosiyete yacu. Na bo bafite uburenganzira bwo kurengerwa n’amategeko yacu n’Itegekonshinga ryacu.

   “Uburenganzira bwo kwigaragambya n’ubwisanzure bwo kuvuga icyo umuntu atekereza ntibwemerera abantu gushyira ibikangisho cyangwa gutera ubwoba abandi, cyangwa gukora ibikorwa byo kwangiza cyangwa iby’urugomo.”

   Imibare ya leta igaragaza ko muri Afurika y’Epfo hari abanyamahanga barenga miliyoni eshatu bafite ibyangombwa byemewe n’amategeko.

   Mbere y’icyo gihe ntarengwa – kitashyizweho n’ubutegetsi, abimukira babarirwa mu bihumbi basanzwe bamaze ibyumweru byinshi bategerereje mu nkambi z’agateganyo kubera ubwoba bwuko umutekano wabo wahungabanywa.

   Ayandi makuru yacu mushobora kuyakurikira kuri YouTube kuri BBC News Gahuza

   Abarundi baba muri Afrika y'Epfo basabwa kubangira ku guhimbaza ukwikukira kubera imyiyerekano

   Amerika igiye guhagarika amafaranga yaha Afrika y'Epfo mu kurwanya umugera wa SIDA - menya impamvu

3. Haciye isaha 1Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo bw'aka kanya.