Zelensky avuga ko Putin ari 'umwicanyi' nyuma yuko Trump yise Perezida w'Uburusiya inshuti

Ahavuye isanamu, EPA
- Umwanditsi, Jessica Lamb
- Yatangajwe
- Igihe co gusoma: iminota 3
Perezida wa Ukraine Volodymyr Zelensky yavuze ko Vladimir Putin ari "umwicanyi", mu gusubiza Perezida w'Amerika Donald Trump wise uwo Perezida w'Uburusiya "inshuti" ye ubwo bari bari mu Bushinwa muri iki cyumweru.
Aganira n'igitangazamakuru CNN, Zelensky yavuze ko bireba Perezida w'Amerika "ukuntu yita Putin" ariko "kuri twe, ni umwanzi... kuri twe, ni umwicanyi".
Mbere y'inama ya batatu yanditse amateka yabaye ku wa kane yagiranye na Perezida w'Ubushinwa Xi Jinping na Putin, Trump yise Putin "inshuti" ye ndetse avuga ko bafitanye "umubano mwiza cyane umaze imyaka myinshi".
Ibitero by'Uburusiya byakomeje mu ijoro ryacyeye, byica abantu babiri, harimo umuhungu, naho abandi bantu 52 barakomereka mu bitero bya misile n'indege nto z'intambara zitajyamo umupilote (zizwi nka 'drones') byibasiye umujyi Zelensky avukamo wa Kryvyi Rih, uri mu karere kari rwagati mu gihugu ka Dnipropetrovsk, nkuko abategetsi babivuze.
Ikigo cya Ukraine gishinzwe ubutabazi bwihuse (DSNS) cyavuze ko abantu 11 na bo bakomerekeye mu karere ka Kharkiv kari mu majyaruguru ashyira uburasirazuba bw'igihugu, naho undi muntu umwe arakomereka i Rivne, mu majyaruguru ashyira uburengerazuba bw'icyo gihugu.
Ku wa gatanu, abantu nibura icyenda biciwe mu bitero by'Uburusiya byibasiye amateme yo mu murwa mukuru Kyiv wa Ukraine hamwe na stasiyo zitegerwamo gariyamoshi mu burengerazuba bwa Ukraine. Zelensky yavuze ko icyo gitero ari cyo "cya mbere kinini cyane kibayeho uyu mwaka", kikaba cyarakoreshejwemo misile 110, zirimo 27 zo mu bwoko bwa 'ballistic' na 'drone' zirenga 400.
Ibyo bitero byabaye hashize iminsi Ukraine yangije bikomeye iteme rya Crimea, ryo mu mwigimbakirwa wa Crimea Uburusiya bwiyometseho mu mwaka wa 2014 buwukuye kuri Ukraine.
Nyuma y'amasaha habaye ibyo bitero Uburusiya bwagabye kuri Ukraine ku wa gatanu, Trump yabwiye abanyamakuru ari mu biro bye bya White House ko Putin "yifuza cyane kurangiza intambara".
Ku wa gatanu, yagize ati: "Bombi [Zelensky na Putin] barashaka kuyirangiza kandi ni ikintu cyiza cyane ko mfitanye umubano [na bo]."
Trump yanashimangiye ko ahagaze ku byo yavuze ko Perezida w'Uburusiya ari inshuti ye ariko avuga ko atamenya niba Putin ari inshuti y'Amerika.
Ariko Zelensky yavuze ko nubwo Trump ari aho ahagaze, we abona Putin nk'"umwicanyi".
Yabwiye CNN ati: "Ntekereza ko ahanini ku bantu bo ku isi, ari umwicanyi kuko arimo kwica... arimo kwica buri munsi na buri joro."
Zelensky yanavuze ko kuvuga kuri Putin nkaho ari "inshuti" bituma "atumva igitutu gihagije".
Iyi ntambara y'amagambo ibaye mu gihe Pologne, ihana imbibi na Ukraine n'Uburusiya, yavuze ko misile y'Uburusiya yo mu bwoko bwa 'cruise' ari imwe mu bintu bitatu byavogereye ikirere cyayo mu majyepfo ashyira uburasirazuba, mu masaha ya kare yo ku wa gatanu.
Minisitiri w'ingabo wa Pologne Władysław Kosiniak-Kamysz yavuze ko iyo misile yakubise mu gace k'icyaro i Nowy Lipowiec, mu ntera ya kilometero hafi 50 uvuye ku mupaka wa Ukraine.
Abategetsi bo muri Pologne bavuze ko aho hantu ari mu ntera ya kilometero hafi 100 uvuye aho ingabo z'Uburayi – zo mu bihugu 11 muri 36 bigize ihuriro ry'abakorerabushake – zari zirimo kurangiriza imyitozo. Abo bategetsi bongeyeho ko indi misile na 'drone' ikoreshwa na moteri y'indege bicyekwa ko byaguye ahandi hantu habiri.
Minisitiri w'intebe wa Pologne Donald Tusk yavuze ko uko bigaragara bitari impanuka.
Nta muntu wakomeretse ndetse nta byatangajwe ko byangiritse ariko Pologne yavuze ko ibyabaye ari "ubushotoranyi" bw'Uburusiya.
Umunyamabanga mukuru w'umuryango wo gutabarana mu bya gisirikare w'Uburayi n'Amerika (OTAN/NATO), Mark Rutte, yamaganye "ivogerwa rikomeye cyane ry'ikirere cya Pologne" ndetse yavuze ko OTAN yihutiye kuhageza indege z'intambara zo gutabara.
Nta cyo Uburusiya bwatangaje kuri iryo vogera, ryabaye ubwo habaga igitero kinini cyane bwagabye kuri Ukraine ku wa gatanu.
Putin yagabye igitero gisesuye kuri Ukraine kuva muri Gashyantare (2) mu mwaka wa 2022.














