'Ese Nashakana n'Umwicanyi?' – Inkuru idasanzwe y'urukundo yagaragaje umwicanyi

Wabigenza ute umuntu ukunda nyabyo akubwiye ko yishe umugabo?

Biroroshye kwibaza ko wahita ukora igikwiye utiriwe ushidikanya, ariko Should I Marry a Murderer? Filimi mbarankuru nshya ya Netflix ibivuga mu buzima bwa nyabwo n'uko urukundo rutuma ibintu byose bigorana.

Mu 2017, Alexander McKellar - uzwi nka Sandy - yari utwaye imodoka yasinze maze agonga kandi yica umunyegare witwa Tony Parsons mu gace ka Argyll and Bute, muri Scotland/Ecosse.

Sandy n'impanga ye Robert icyo gihe batabye mu bwihisho umurambo wa Parson.

Wamaze imyaka itatu aho bawutabye nta urawubona kugeza igihe umukobwa wakundanye na Sandy, Dr Caroline Muirhead, amenye ukuri maze akajyana polisi aho bawutabye.

Ubwo umugabo ukora za filimi witwa Josh Allott yumvaga bwa mbere iyi nkuru ntabwo "yiyumvishije ko ari ukuri yabayeho".

Agira ati: "Naketse ko ari ikinamico ndimo kumva, ko bidashobora kuba ku muntu uwo ari we wese mu buzima".

Naho Clare Beavis nawe ukora filimi za 'series' wari uzi iyo nkuru kuva imenyekana cyane muri Scotland avuga ko "agace kaburaga mu nkuru yavuzwe ari uko Caroline yatanze ubuhamya n'uko yabimenye".

Iyi filimi ya 'series' itangira Caroline Muirhead agowe no kwakira gutandukana kwamubayeho mbere yo guhurira na Sandy ku rubuga rwa Tinder mu 2020, maze bagakundana bikomeye ndetse mu byumweru bicye bakiyemeza kubana.

Nyuma gato yo kwemeranya kubana, Caroline yabajije Sandy niba hari ikintu mu mateka ye cyazagira ingaruka ku mubano wabo ahazaza.

Maze amubwira ko mu myaka micye yari ishize yagonze umunyegare arimo ataha avuye kuri hoteli ari kumwe n'impanga ye, ariko ko batamutabarije cyangwa ngo bamujyane kwa muganga.

Nyuma nibwo byamenyekanye ko ibikomere Parson yagize byari bikomeye ariko ko yashoboraga kurokoka iyo abona ubufasha mu minota 20 cyangwa 30, ko bishoboka cyane ko atahise apfa akigongwa.

Aba bagabo b'impanga bavuye aho bamugongeye bongera kuhagaruka n'indi modoka mbere yo gutwara umurambo wa Parson ahandi hantu bakawuhambayo.

Caroline Muirhead amenye ibi yaguye mu rungabangabo, ahera hagati y'urukundo rukomeye no gukora igikwiriye.

Kuri Josh Allott, icyo gihe cy'amarangamutima akomeye no kurwana n'umutima ni byo bituma iyo nkuru bikomeye kuyirengagiza.

Ati: "Ayo mahitamo akomeye ni ikibazo gikomeye mu rukundo, bituma wibaza icyo wakora ubaye uri we (Caroline), ni ihurizo rikomeye cyane".

Caroline yateye intambwe, abwira polisi ibyabaye ariko icyo yakurikijeho ni cyo gituma inkuru irushaho kuba igitangaza, ndetse n'impamvu yo gukorwa kw'iriya filimi ya 'series', nk'uko bivugwa.

Aho kuva muri urwo rukundo, Caroline Muirhead yarugumyemo, akomeza kujya kuri polisi no gufatanya n'iperereza ryayo mu ibanga, Sandy atamenye ko ari umukunzi we watanze amakuru.

Hari kuba hashize hafi imyaka itatu igihe Sandy yemereye Caroline ko yashoboraga kuba yarafunzwe.

Icyo gihe Caroline yafataga amajwi umukunzi we mu ibanga akoresheje telefone ndetse yasubiranye na we ahantu bahambye wa mugabo Tony Parson maze nanone mu ibanga ahajugunya Red Bull nk'ikizahamwibutsa, nyuma ahamagara polisi ayibwira aho ishakira umurambo muri ako gace kari kure mu cyaro.

Mu gihe bamwe banenze cyane ibyo yakoze, Josh Allott avuga ko Caroline yakoze igikwiriye mu kubwira polisi iki cyaha.

Abo bavandimwe baje gutabwa muri yombi mu Ukuboza(12) 2020 ariko barekurwa batanze ingwate, mu Ukuboza 2021 ni bwo bagejejwe mu rukiko bararegwa.

Josh Allott ati: "[Caroline] yari azi ko izo mpanga zizakomeza gufungwa, zikaburana zikahera muri gereza iteka ryose ntibagaruke mu buzima bwe ariko bagarutse mu buzima bwe" kandi baramuzira.

Avuga ko Caroline yagowe n'ibyo bihe by'urujijo rw'igihano bazahabwa bikagera aho bamenya ko ari we wabareze.

Muri izo 'series' Caroline avuga neza uburyo yageze aho yiroha mu kunywa inzoga n'ibiyobyabwenge kugira ngo ahangane n'iki kibazo.

Yerekana kandi uburyo polisi yitwaye kuri Caroline nyuma y'uko ayigezeho akayibwira icyabaye akanayifasha mu iperereza.

Josh Allott avuga ko polisi "itari izi uko izafata Caroline" kandi uko babyifashemo byamugejeje ku ihungabana no kwishora mu nzoga n'ibiyobyabwenge.

Abakoze iyi filimi mbarankuru y'uruhererekane bavuga ko ibyabaye kuri Caroline "bitanga ishusho ya byinshi abantu bahura na byo mu bihe byo gukurikirana ibyaha bikomeye" muri polisi no mu nkiko.

Clare Beavis ati: "Amapine y'ubucamanza ahindukira buhoro buhoro akagira ingaruka ku buzima bw'abantu kandi icyo ni cyo dushaka kugaragaza".

Polisi ya Scotland yanze kugira umwanya muri iyi filimi y'uruhererekane.

Caroline Muirhead yatanze ibirego byinshi arega igipolisi cya Scotland. Ariko polisi yakomeje uruhande rwayo ko yahaye Caroline ubufasha bukwiriye.

'Kurengera abatangabuhamya'

Mu nyandiko kuri iyi filimi, Caroline yagize ati: "Nizeye ko 'system' izandengera nkakomeza ntekanye igihe nari ngeramiwe cyane ariko si ko byagenze.

"Nizeye ko mu gushyira ibi ahabona no kuvuga ibyambayeho dushobora gutangiza ikiganiro cyo kurushaho kurinda no kurengera abatangabuhamya no kumva ko polisi ikwiye kwita ku buzima bwabo bwo mu mutwe"

Muri Nyakanga(7) 2023, mbere gato y'uko urubanza rwa za mpanga rutangira mu rukiko rukuru i Glasgow, Sandy yemeye icyaha cyo kwica atabigambiriye.

Umuvandimwe we yakomeje guhakana icyaha yarezwe cyo kwica, ariko bombi bemeye icyaha cyo guhisha ibimenyetso byafasha ubutabera mu guhamba umuntu mu bwihisho.

Sandy McKellar yakatiwe gufungwa imyaka 12, naho umuvandimwe we akatirwa gufungwa imyaka itanu.