RD Congo: Abategetsi babiri bakuru ba sentare ya gisirikare bapfiriye mu mpanuka y'indege - FARDC

Abategetsi babiri bakuru bo mu rwego rw'ubutungane bwa gisirikare muri Repubulika ya Demokarasi ya Congo bapfuye mu mpanuka y'indege yabereye mu gisagara ca Kenge, mu burengero bw'igihugu, nk'uko igisirikare cabitangaje.

Mw'itangazo ryasohotse ejo ku wa gatanu, igisirikare ca Repubulika ya Demokarasi ya Congo (FARDC) catangaje ko Liyetena- Jenerali Joseph Mutombo Katalayi Tiende, yari Perezida wa mbere wa Sentare nkuru ya Gisirikare, hamwe na Liyetena- Jenerali Lucien René Likulia Bakumi, Umugenzuzi mukuru mu gisirikare, bapfuye igihe indege barimwo yakora isanganya iriko iragaruka ivuye mu rugendo rw'akazi i Kikwit, mu ntara ya Kwilu.

Igisirikare kivuga ko abandi bantu 12 bari kumwe n'izi ntwazangabo hamwe n'abakozi b'indege na bo nyene bapfuye muri iyo mpanuka.

Ku rundi ruhande, urwego rw'igihugu rujejwe gutohoza impanuka z'indege, Bureau Permanent d'Enquêtes sur les Accidents et Incidents d'Aviation (BPEA), rwemeje ko indege yo mu bwoko bwa TRACEP Congo Aviation LET 410 UVP, yanditswe ku numero 9S-GUC, yakoze isanganya i Kenge ku wa 25 Nyakanga.

Uru rwego ruvuga ko ata n'umwe mu bari muri iyo ndege yarokotse, kandi ko abajejwe amatohoza barungitswe aho iyo mpanuka yabereye.

Amakuru yatanzwe n'abajejwe ivy'indege avuga ko iyo ndege yarimwo abantu 16, harimwo abakozi bane bayo. Impamvu yatumye iyo ndege ikoroka ntiramenyekana.

Urupfu rw'izi ntwazangabo nkuru zibiri zijejwe ubutungane bwa gisirikare rubaye mu gihe Repubulika ya Demokarasi ya Congo ihanzwe n'intambara imaze igihe kirekire mu ntara zo mu buseruko bw'igihugu.

Abo basirikare bompi bari bafise uruhara rukomeye mu manza za gisirikare zijanye n'iyo ntambara ibandanya. Amasentare ya gisirikare bari bajejwe yagiye aracira ibihano vy'urupfu abantu batari bahari, baba bagiriwe n'ivyaha vyo gufata mu mugongo imirwi yitwaje ibirwanisho, harimwo na Corneille Nangaa, arongoye urunani Alliance Fleuve Congo.

Baragize kandi uruhara mu manza zijanye n'uwahoze ari Perezida Joseph Kabila yagirijwe n'ubutegetsi gushigikira umuhari w'inyeshamba wa M23. Hari hasanzwe kandi hari imanza zibandanya zarimwo uwahoze ari umukuru w'ibiro bikuru vya gisirikare.

FARDC yahaye icubahiro izi ntwazangabo nkuru zibiri, ikavuga ko bari abacamanza bakuru ba gisirikare bamaze imyaka yabo yose y'akazi bakorera Repubulika "mu cubahiro, mu kwitanga kandi batiziganya".

Abategetsi ba gisirikare bavuze ko amatohoza yatanguye kugira bamenye ingene ibintu vyagenze n'icateye iri sanganya.