Tshisekedi yashinje u Rwanda gucengera mu gisirikare cya DRC, anavuga ko manda ya gatatu ishoboka

Perezida wa Repubulika ya Demokarasi ya Congo (DRC) Félix Tshisekedi yashinje u Rwanda guhungabanya ingabo z'igihugu cye, aca amarenga ko ashobora gutekereza ku kwiyamamariza manda ya gatatu naramuka abisabwe n'abaturage.

Mu kiganiro yagiranye n'abanyamakuru ku wa gatatu – cya kabiri kuva yongeye gutorwa mu 2023 – Tshisekedi yavuze ko uko gucengerera ingabo za DRC (FARDC) kwazambije igisirikare mu burasirazuba bw'igihugu.

Yabwiye abanyamakuru ati: "Nakiriye amakuru atari ukuri ku kuntu ibintu bimeze mu ngabo... cyane cyane ku kigero cy'icengerwa. Ingabo zarazambijwe [bihereyemo] imbere."

Nta cyo leta y'u Rwanda yahise itangaza kuri ibi bishya u Rwanda rushinjwa na Perezida wa DRC. BBC Gahuzamiryango yandikiye umuvugizi w'ingabo z'u Rwanda imusaba kugira icyo abivugaho.

Muri icyo kiganiro n'abanyamakuru, Perezida Tshisekedi yashimangiye ko icyo ashyize imbere ari ukugarura amahoro binyuze mu nzira ya dipolomasi mbere yuko ava ku butegetsi, ariko ashinja u Rwanda gutambamira gutera intambwe muri urwo rwego.

Yashinje u Rwanda kungukira mu mutungo kamere wa DRC no gutseta ibirenge mu ishyirwa mu ngiro ry'amasezerano we na Perezida w'u Rwanda Paul Kagame bashyizeho umukono i Washington mu Kuboza (12) mu 2025.

Tshisekedi yagize ati: "Bizafata igihe kuko u Rwanda rumaze igihe kirekire rwungukira mu gusahura umutungo [wa DRC], kandi iyo ni yo mpamvu ibiganiro byatinze."

U Rwanda ruhakana gusahura umutungo wa DRC wiganjemo uw'amabuye y'agaciro, rukavuga ko na rwo rufite amabuye y'agaciro menshi.

U Rwanda kandi rwakomeje guhakana kohereza ingabo ku butaka bwa DRC, nubwo rwemera ko rwashyizeho "ingamba z'ubwirinzi".

Muri politike y'imbere mu gihugu, Tshisekedi yabajijwe niba azava ku butegetsi ubwo manda ye ya kabiri izaba irangiye mu mwaka wa 2028.

Nubwo yashimangiye ko atashatse manda ya gatatu, yongeyeho ati: "Abaturage nibabinsaba, nzabyemera... ntibizigera na rimwe bibaho hatabayeho [amatora ya] kamarampaka [référendum]."

Perezida Tshisekedi yanavuze ku kuba uwo yasimbuye, Joseph Kabila, aherutse gufatirwa ibihano n'Amerika ashinjwa gufasha imitwe y'inyeshyamba, irimo n'umutwe wa AFC/M23, wafashe imijyi ya Goma na Bukavu ubu hashize umwaka umwe urenga.

Yavuze ko uko ibintu bimeze ari "akajagari nyako", yinubira ko abigeze gushimwa nk'abakoze impinduka inyuze muri demokarasi bahindutse "abacukuzi b'imva".

Mu gihe cy'amasaha arenga atatu, imbere y'abanyamakuru barenga 200 hamwe n'abamushyigikiye, Tshisekedi yumvikanishije ko igihe cy'amatora ataha kizagenwa n'ukuntu intambara yo mu burasirazuba bw'igihugu izaba yihuse mu kurangira.

Kabila wamubanjirije yatindije amatora ho imyaka ibiri, mbere yuko amaherezo ayakoresha mu mwaka wa 2018 agaha ubutegetsi Tshisekedi watangajwe ko yayatsinze.