Abasirikare babiri b'Amerika bishwe naho umwe aburirwa irengero nyuma y'igitero cya Iran muri Jordan

Abasirikare babiri b'Amerika bishwe naho undi aracyaburiwe irengero nyuma y'ibitero by'ibisasu bya misile byo mu bwoko bwa 'ballistic' n'indege nto z'intambara zitajyamo umupilote (drone) Iran yagabye muri Jordan (Jordanie) ku wa gatanu, nkuko abategetsi ba gisirikare babivuze.

Bumwe mu buyobozi bukuru bw'ingabo z'Amerika (CENTCOM) bwatangaje ko abasirikare bane b'Amerika bajyanwe mu bitaro byo muri Jordan kugira ngo bavurwe ariko ko ubu basezerewe bakava muri ibyo bitaro. CENTCOM yavuze ko abandi bari bakomeretse mu buryo bworoheje ubu basubiye mu kazi.

Abategetsi ba gisirikare b'Amerika ntibahishuye imyirondoro y'abapfuye, cyangwa ngo batange amakuru arambuye y'ukuntu byagenze cyangwa agace byabereyemo.

CENTCOM yavuze ko mu ijoro ryo ku wa gatandatu Amerika yagabye ibindi bitero byo mu kirere kuri Iran ku itegeko ryatanzwe na Perezida Donald Trump.

Mu itangazo CENTCOM yasohoye, yavuze ko ibyo bitero – byo mu ijoro rya munani ryikurikiranya – "bigamije gushegesha kurushaho ubushobozi bwa Iran bwo guteza inkeke ku mato y'ubucuruzi mu Muhora wa Hormuz".

Iryo tangazo ryongeyeho, nta makuru arambuye ritanze, ko ibyo bitero bifite intego yo "guhana byihuse ingabo za 'Islamic Revolutionary Guard Corps' [umutwe wihariye wa gisirikare wo mu ngabo za Iran] zagabye ibitero ku basirikare b'Amerika muri Jordan mu ijoro ry'ejo [ryo ku wa gatanu]".

Ibyo byakurikiye icyumweru cyongeye kuburamo imirwano, Washington igasubizaho kubuza urujya n'uruza ku byambu bya Iran, Tehran na yo igatangaza ko Umuhora wa Hormuz ufunze, mu gihe agahenge k'agateganyo hagati y'impande zombi kahirimye nta kwezi gushize gatangiye.

Mu ijoro ryo ku wa gatandatu, umutegetsi w'ikirenga wa Iran Mojtaba Khamenei, mu itangazo ryanditse yavuze ko "ihonyorwa rikomeje" ry'ayo masezerano rikorwa n'Amerika "ryashyize ahabona ukuri kw'ibanze: umukono [isinya] wa perezida w'Amerika nta cyo umaze na busa kandi nta kwizerwa kwawo".

Khamenei, utaraboneka mu ruhame kuva habaye igitero cyishe se mu ntangiriro y'iyi ntambara, yashinje Amerika gushaka ko "intambara idogera" ndetse yavuze ko Iran "mu bubiko iyifitiye amasomo atazibagirana".

Mbere, ingabo za Jordan zavuze ko zasamye misile 10 zari zarashwe mu kirere cyayo mu ijoro ryabanje, ntizatangaza ibyangiritse.

Abasirikare b'Amerika bamaze gupfa kugeza ubu biyongereye bagera kuri 16, nyuma yuko umupilote wo mu ngabo zirwanira mu mazi z'Amerika wari waburiwe irengero mu ntangiriro y'uku kwezi, bitangajwe ko yapfuye, ubu bukaba bubaye ubwa kabiri uwo mubare wiyongereye muri iki cyumweru.

Mu itangazo yasohoye ku wa gatandatu, CENTCOM yagize iti: "Abasirikare babiri b'Amerika bari bari muri Jordan biciwe mu kazi mu gihe 'US Central Command' (Centcom) n'ingabo z'abafatanyabikorwa birwanagaho ku bitero bya misile na drone bya Iran. Ikindi, umusirikare umwe ubu yaburiwe irengero.

"Ku bwo kubaha imiryango yabo, Centcom ntiri butangaze amakuru y'inyongera, arimo n'imyirondoro y'abo barwanyi bapfuye, kugeza hashize amasaha 24 nyuma yuko aba hafi bo mu miryango yabo bamaze kubimenyeshwa."

Mu gusubiza kuri iryo tangazo ry'impfu, Minisitiri w'ingabo w'Amerika Pete Hegseth yanditse ku rubuga nkoranyambaga rwa X ati: "Murabeho, ntwari. Igitambo cyabo nta kindi gikora kitari ukongerera imbaraga icyo twiyemeje."

Umutwe w'ingabo za Iran wa 'Islamic Revolutionary Guard Corps' (IRGC) wavuze ko mu gitondo cyo ku wa gatandatu washenye indege nibura ebyiri z'intambara z'Amerika zo mu kigo cya gisirikare cya Al-Azraq cyo muri Jordan, nkuko byatangajwe n'igitangazamakuru cya leta ya Iran.

BBC yasabye CENTCOM kugira icyo ivuga kuri ayo makuru ariko yanze gutanga amakuru y'inyongera.

Mu yandi makuru yo ku wa gatandatu, minisiteri y'ububanyi n'amahanga y'Amerika yasohoye itangazo ryo kuburira Abanyamerika aho bari hose ku isi, cyane cyane abari mu karere k'Uburasirazuba bwo Hagati, ibasaba "kuba maso kurushaho".

Muri uko kuburira kujyanye n'ingendo, iyo minisiteri yashishikarije Abanyamerika bari muri ako karere "gukurikira amakuru y'ibirimo kuba by'aka kanya", yongeraho iti: "Kubera ubushyamirane buri hejuru mu Burasirazuba bwo Hagati, ibijyanye n'umutekano bikomeje kuba urusobe kandi ibintu bishobora kudogera mu buryo butari buteganyijwe."

Muri Kamena (6) uyu mwaka, Washington na Tehran byasinye amasezerano y'ibanze yo kurangiza intambara, ariko ayo masezerano yahirimye hashize ibyumweru – ku itariki ya 8 y'uku kwezi kwa Nyakanga (7) Trump atangaza ko ayo masezerano "yarangiye".

Muri Iran, abantu nibura 50 bamaze kwicwa naho abandi barenga 500 bakomerekeye mu bitero by'Amerika mu byumweru bitatu bishize, nkuko byatangajwe n'igitangazamakuru cya leta ya Iran, kibicyesha minisiteri y'ubuzima y'icyo gihugu.

Abandi bantu babarirwa mu bihumbi barishwe mu karere k'Uburasirazuba bwo Hagati kuva intambara y'Amerika-Israel na Iran itangiye ku itariki ya 28 Gashyantare (2) uyu mwaka, nkuko imibare itangwa n'abategetsi ibigaragaza, abenshi mu bishwe bakaba ari abo muri Iran no muri Libani.

Uretse kurasa ku hari ibikorwa bya gisirikare, muri iyi minsi ya vuba aha ishize Iran n'Amerika byanashinjanye kurasa ku bikorwa-remezo by'ingenzi cyane.