Umwana urwaye Ebola yashimuswe akurwa mu ivuriro hafi y'i Butembo

Inyandiko gusa
Abakora mu buvuzi batwaye umurambo w'umuntu wishwe na Ebola bawujyanye mu buruhukiro bw'ikigo nderabuzima cya Nyankunde, i Bunia, mu ntara ya Ituri, ku wa gatandatu ushize, kugira ngo benewabo bawusezereho bwa nyuma. Bambaye imyenda yabugenewe y'umweru ibapfutsemo umubiri wose, ndetse n'ingofero z'umweru, banambaye udupfukantoki hamwe n'inkweto. Barimo kugenda mu mbuga y'ivuriro irimo amabuye, ikikijwe n'inzitiro z'ibara rya 'orange'. Ifoto yo ku itariki ya 13 Kamena (6) mu mwaka wa 2026.

Ahavuye isanamu, AFP via Getty Images

Insiguro y'isanamu, Abakora mu buvuzi batwaye umurambo w'umuntu wishwe na Ebola bawujyanye mu buruhukiro bw'ikigo nderabuzima cya Nyankunde, i Bunia, mu ntara ya Ituri, ku wa gatandatu ushize, kugira ngo benewabo bawusezereho bwa nyuma (ifoto mbarankuru)
    • Umwanditsi, Emery Makumeno
    • Igikorwa, BBC Afurika i Kinshasa
  • Yatangajwe
  • Igihe co gusoma: iminota 3

Abategetsi bo mu buvuzi muri Repubulika ya Demokarasi ya Congo (DRC) bavuga ko umwana w'umukobwa w'imyaka itandatu wanduye Ebola yashimuswe agakurwa mu kigo ivurirwamo kiri mu burasirazuba bw'icyo gihugu.

Ku mugoroba wo ku wa mbere, abagabo bitwaje intwaro z'ubugi butyaye biraye muri iryo vuriro riri hafi y'umujyi wa Butembo mu ntara ya Kivu ya Ruguru, nuko batwara uwo mwana na nyina.

Abategetsi bo mu buvuzi baburiye ko abo bantu bombi bashobora gukwirakwiza iyo virusi nibakomeza kuba hanze y'ivuriro.

Dr Lubambo Maboko Gaston, ukuriye ibikorwa byo kurwanya Ebola muri Kivu ya Ruguru, yabwiye ibiro ntaramakuru Reuters ati:

"Kugeza ubu, ntiturabona abo bantu babiri turimo gushakisha. Turimo kubinginga ku mugaragaro kugira ngo mu gihe cyihuse gishoboka bajye ku ivuriro kuko gusubira mu baturage kwabo gushobora guteza ibyago byuko ubuzima bwabo buhuhuka ndetse, hejuru ya byose, kukanduza benewabo [abo bafitanye isano]."

Leta ya DRC ntiyasubije ubusabe bwa BBC bwo kugira icyo ibivugaho.

Iryo shimutwa ribaye mu gihe hashize ukwezi kurenga iki kiza gishya cya Ebola cyo mu bwoko bwa Bundibugyo cyadutse, kikaba ari icya 17 mu mateka ya DRC.

Imiryango ifasha ivuga ko ibikorwa byo guhagarika iyi virusi bikomeje guhura n'imbogamizi nyinshi, zirimo nk'ikwirakwizwa ry'amakuru atari ukuri, kutagirira icyizere abakozi bo mu buvuzi ndetse no kudakurikiza zimwe mu ngamba z'ubuzima rusange zo guhangana n'iki kiza.

Skip Ibisomwa cane and continue reading
Ibisomwa cane

End of Ibisomwa cane

Bruno Michon, ukuriye ibikorwa byo kurwanya Ebola byo mu muryango mpuzamahanga w'ubutabazi wa Croix-Rouge na Croissant-Rouge, yavuze ko amatsinda y'abakora ibikorwa byo kurwanya Ebola arimo no guhura n'ikibazo cyo kumenya abagize aho bahurira n'abantu bayanduye.

Minisiteri y'ubuzima muri DRC ivuga ko kugeza ku wa mbere w'iki cyumweru, abantu 837 bari bamaze kwemezwa ko banduye Ebola, naho abantu 196 bakaba bamaze kwemezwa ko bishwe na yo. Ibyo bivuze ko ikigero cyo kwica cy'iki kiza kiri kuri 23.4%, nkuko iyo minisiteri ibivuga.

Abategetsi bo mu buvuzi bavuga ko abarwayi 49 bakize Ebola, naho abantu 376 bakaba bari mu kato.

Ubwandu bwa vuba aha cyane bwatangajwe mu ntara ya Ituri, ari na ho zingiro ry'iki kiza. Intara ya Kivu ya Ruguru ni yo ya kabiri mu kwibasirwa cyane n'iki kiza, mu gihe nta bantu bashya baherutse gutangazwa ko banduye mu ntara ya Kivu y'Epfo.