APR FC yandikiye CAF isaba ko imikino iyihuza na Les Aigles du Congo yimurirwa ahandi

Inyandiko gusa
Abakinnyi b'ikipe ya APR FC yo mu Rwanda bahagaze mu kibuga barimo kureba muri 'camera'. Bambaye imyenda y'umweru n'umukara, mu gihe umunyezamu wayo yambaye imyenda y'umuhondo.

Ahavuye isanamu, APR

Insiguro y'isanamu, Ikipe ya APR ni yo ifite ibikombe byinshi bya shampiyona y'u Rwanda
    • Umwanditsi, Didier Bikorimana
    • Igikorwa, BBC Gahuzamiryango
  • Yatangajwe
  • Igihe co gusoma: iminota 3

Ishyirahamwe ry'umupira w'amaguru mu Rwanda (FERWAFA) rivuga ko ryakiriye ibaruwa y'ikipe y'ingabo z'u Rwanda, APR FC, isaba ko imikino ibiri yari iteganyijwe kuyihuza n'ikipe ya Les Aigles du Congo yo muri Repubulika ya Demokarasi ya Congo (DRC) yabera ku bibuga "bidafite aho bibogamiye".

Umunyamabanga mukuru wa FERWAFA Bonnie Mugabe yabwiye BBC Gahuzamiryango mu butumwa bwanditse ati: "Yego ni ukuri, twakiriye iyo baruwa. Ubusabe bwagejejwe kuri CAF ngo ibukorere irindi suzuma no kubufataho icyemezo."

Iyo mikino yo mu ijonjora ry'ibanze y'irushanwa ry'amakipe yabaye aya mbere iwayo muri Afurika (CAF Champions League) iteganyijwe hagati y'itariki ya 4 n'iya 6 Nzeri (9) uyu mwaka, ubanza ukaba wari uteganyijwe kubera i Kinshasa naho uwo kwishyura ukabera i Kigali.

Amakuru amwe y'abanyamakuru b'imikino mu Rwanda, BBC itashoboye kugenzura mu buryo bwigenga, avuga ko mu gihe ubusabe bwayo butaba bwemewe, APR ishobora gufata icyemezo cyo kutitabira iryo rushanwa. BBC yandikiye APR iyisaba kugira icyo ibivugaho.

Ntibisobanutse neza niba ubu busabe bwa APR hari isano bufitanye n'ubushyamirane muri politike hagati y'u Rwanda na DRC, bwongeye gukaza umurego guhera mu mpera y'umwaka wa 2021 ubwo intambara hagati y'ingabo za DRC n'umutwe w'inyeshyamba wa M23 yongeraga kwaduka.

Kinshasa n'inzobere za ONU bashinja u Rwanda gufasha umutwe wa M23 mu kuwuha imyitozo, abasirikare, ibikoresho no kuwuha amategeko. U Rwanda rurabihakana, rukavuga ko rwashyizeho "ingamba z'ubwirinzi". Kinshasa n'Amerika bakomeje gusaba ko u Rwanda rukura ingabo zarwo ku butaka bwa DRC.

Ku rundi ruhande, Kigali n'izo raporo za ONU bashinja leta ya DRC gukorana n'umutwe w'inyeshyamba wa FDLR urwanya ubutegetsi bw'u Rwanda ukorera mu burasirazuba bwa DRC. Kinshasa irabihakana, ikavuga ko nta gahunda ya leta iriho yo gukorana na FDLR, ndetse mu byumweru bishize Kinshasa yagiranye amasezerano na FDLR aho uwo mutwe wavuze ko wemeye gushyira intwaro hasi.

Si ubwa mbere ibibazo bya politike hagati y'u Rwanda na DRC bibaye nk'ibigera no mu kibuga cy'umupira w'amaguru.

Skip Ibisomwa cane and continue reading
Ibisomwa cane

End of Ibisomwa cane

Muri Gashyantare (2) mu mwaka wa 2024, ikipe ya Rayon Sports yatangaje ko yatandukanye n'uwari umukinnyi wayo wo hagati mu kibuga, Umunye-Congo Héritier Nzinga Luvumbu, nyuma y'ikimenyetso cya politike yakoreye mu kibuga, bituma asubira iwabo.

Hari nyuma y'amasaha yari ashize ahagaritswe gukina mu gihe cy'amezi atandatu kubera ikimenyetso yakoze mu kibuga mu kwifatanya n'abiciwe mu ntambara yo gihugu cye.