FBI yashyizeho 200,000$ ku watanga amakuru yafatisha uyu mugore ivuga ko ari maneko wa Iran

Urwego rukora iperereza ku byaha imbere muri Amerika (FBI) rwatangaje igihembo cy'amadolari 200,000 (miliyoni hafi 300Frw) ku muntu watanga amakuru yatuma bafata uwahoze ari umukozi ushinzwe kurwanya iterabwoba muri Amerika ubu ushinjwa kuba maneko wa Iran.

Monica Witt w'imyaka 47, yari inzobere mu by'ubutasi mu ngabo zirwanira mu kirere za Amerika ndetse n'umukozi ushinzwe kurwanya ubutasi bw'amahanga.

Mu itangazo FBI yasohoye ku wa kane, ivuga ko Monica wahoze ari umukozi wihariye mu biro bishinzwe iperereza muri izo ngabo "yakoreye igisirikare kuva mu 1997 kugeza mu 2008, nyuma akorera leta ya Amerika kugeza mu 2010".

FBI ivuga ko "Akazi yakoze mu gisirikare no muri icyo gihe yari umukozi wa leta kamuhaye uburenganzira ku makuru y'ibanga cyane ajyanye n'ubutasi n'ubwirinzi bwa Amerika, harimo n'amazina nyakuri y'abakozi bakora ibikorwa by'ibanga mu nzego z'ubutasi za Amerika."

FBI ivuga ko Monica yahungiye muri Iran mu 2013 nk'uko bigaragara mu nyandiko z'ikirego.

Ikirego cya mbere cyatanzwe kuri we n'ubucamanza bwa Amerika mu 2019 ariko kuva icyo gihe ntibigeze bamenya aho ari cyangwa ngo babashe kumufata.

Bongeraho ko agezeyo yahaye leta ya Iran na Islamic Revolutionary Guard Corps (IRGC) amakuru yashyize mu kaga umutekano w'amakuru y'ibanga n'ubwirinzi bwa Amerika.

FBI ivuga ko Monica yavukiye mu gace ka El Paso muri leta ya Texas, ako ari umugore ufite 55kg ureshya na 1,67m, udafite andi mazina mahimbabo, uvuga neza ururimo rw'igi-Perse kandi ubu bikekwa ko atuye muri Iran.

Ashinjwa gutanga nkana amakuru yashyize mu kaga ubuzima bw'abasirikare ba Amerika bari mu butumwa hanze y'igihugu ndetse n'imiryango yabo.

Arashinjwa kandi "gukusanya amakuru ku bahoze ari bagenzi be bakoranaga muri leta ya Amerika ku nyungu za leta ya Iran kugira ngo bashobore kugirirwa nabi."

FBI yavuze ko nubwo Monica Witt yashyiriweho ikirego, akiri hanze kandi atarafatwa.

FBI yasabye abantu bose gufasha ubutabera bwa Amerika kubona no guta muri yombi uyu wahoze ari umukozi ushinzwe kurwanya ubutasi.