Liverpool yirukanye umutoza Slot iganiriza Iraola
Ahavuye isanamu, Getty Images
- Umwanditsi, Alastair Telfer, Sami Mokbel na Aadam Patel
- Igikorwa, BBC Sport
- Yatangajwe
- Igihe co gusoma: iminota 2
Umutoza mukuru Arne Slot w'ikipe ya Liverpool yirukanwe nyuma yo kuyitoza imyaka ibiri y'imikino.
Uyu Muholandi, w'imyaka 47, yafashije 'the Reds' gutsindira igikombe cya 20 cya shampiyona ya Premier League mu mwaka we wa mbere ayitoza ariko yagowe n'umwaka we wa kabiri, iyi kipe irangiza iri ku mwanya wa gatanu.
Andoni Iraola uherutse kureka gutoza Bournemouth ni we uhabwa amahirwe menshi yo gusimbura Slot.
Liverpool yegereye uwo Munya-Espagne imuganiriza ku kuyitoza.
Nubwo yabonye itike yo kuzakina Champions League mu mwaka utaha w'imikino, Liverpool yarangije shampiyona n'amanota 60 – ya mbere yo hasi cyane igize kuva mu mwaka w'imikino wa 2015-2016 ndetse irushwa amanota 25 na Arsenal yegukanye igikombe cya Premier League.
Mu itangazo basohoye, ba nyiri Liverpool, Fenway Sports Group (FSG), bagize bati: "Kuba iki cyari icyemezo kigoye kuri twe nk'ikipe ni ibintu byumvikana. Umusanzu Arne yatanze kuri Liverpool FC mu gihe amaranye na twe ni munini, ufite icyo uvuze kandi - mu buryo bw'ingenzi cyane kurusha ibindi byose ku bafana no kuri twebwe ubwacu - ni mwiza."
"Kubera iyo mpamvu, ugushimira kwacu kuri buri kintu cyose yagezeho ntigushobora kuba kwinshi cyane kurenza aha, by'umwihariko kuko [buri kintu cyose yakoze] cyashingiye ku myitwarire myiza mu kazi, ubushishozi n'ikigero cy'ubuzobere cyashimangiye kurushaho uko tumubona ko ari intyoza mu byo akora.
"Kuva tugihura bwa mbere na Arne, byahise bigaragara ko ari umuntu utemera inshingano gusa, [ahubwo] ayigira iye."
Icyemezo cyo kumwirukana cyafashwe na Michael Edwards, umuyobozi mukuru wa FSG, na Richard Hughes, umuyobozi wa Liverpool ushinzwe imikino.
Iraola, w'imyaka 43, ni umwe mu batoza bahabwa amanota menshi cyane i Burayi mu mitoreze ye ndetse azwiho imikinire yo gusatira.
Yagizwe umutoza wa Bournemouth igihe Hughes yari umuyobozi wa tekinike muri iyo kipe, umwanya yavuyeho mu 2024 ajya muri Liverpool.
Bournemouth yarangije shampiyona y'umwaka ushize iri inyuma ya Liverpool ho umwanya umwe gusa irushwa na yo amanota atatu gusa, ikatisha itike yo kuzakina Europa League mu mwaka utaha w'imikino.
Mu gihe cyose cy'umwaka w'imikino ushize, Liverpool yashimangiye ko gusimbuza umutoza mukuru bitari muri gahunda, ariko nyuma yo gusuzuma uko ibintu bimeze nyuma yuko umwaka w'imikino urangiye mu mpera y'icyumweru gishize, ubuyobozi bwa Liverpool bwemera ko icyiciro gikurikiyeho gicyeneye imikinire y'umupira w'amaguru irimo gufata iya mbere kurushaho, irimo imbaraga kurushaho ndetse irimo kunyaruka kurushaho.
Slot yasimbuye Jurgen Klopp nk'umutoza wa Liverpool mu mwaka wa 2024, nyuma yuko uwo Mudage asezeye i Anfield amaze kuyitoza imyaka icyenda.
