Dros Frecwast
BBC Radio Cymru

Wrth siarad ar Dros Frecwast bore 'ma dywedodd Elen Elis, Cyfarwyddwr Artistig yr Eisteddfod: "Mae yna arlwy eang iawn. Dwi yn ddiolchgar hefyd i bobl leol oherwydd ni wedi bod yn trefnu yr holl arlwy artistig gyda'r bobl leol a gyda phartneriaid wrth gwrs hefyd - ac mae artistiaid da yn gweithio efo ni o flwyddyn i flwyddyn.

"Da ni wedi eistedd rownd byrddau - mae pobl o gelfyddydau gwahanol wedi bod yn trafod themâu gan gynnwys enwogion, hanes a thirwedd a chynnyrch lleol,

"Mae 'na lwyth o arlwy i bawb. Ni wedi siapio amserlen ar y cyd - ac mae yna linyn cyswllt ar draws ein llwyfannau ni."

Mae ambell le ar y maes i brynu hufen iâ arbennig.

Bonnie o Abertawe yw’r cwsmer cynta'!

Roedd Jem Tynrhos a Jane Blank o Lanrhystud yn astudio'r map yn y brif fynedfa cyn mentro ar y maes. Bydd Jem ar stondin Clera ger y Tŷ Gwerin drwy'r wythnos yn cynnal sesiynau twmpath.

Mae Jane, sy'n awdures llyfrau hanesyddol, yn "edrych mlaen i grwydro'r maes, mwynhau'r awyrgylch a mynd i'r Lle Celf ynghyd â mynychu llu o ddigwyddiadau llenyddol".

“Co ni off! Mae'r Steddfod wedi dechre a fi mor falch o bawb sy' wedi bod yn rhan o’r paratoi.

"Braint yw cael bod yn llywydd a fi methu aros!” medd Mari Grug wrth gyrraedd y Maes.

Bydd Mari yn siarad yn y seremoni agoriadol am 13:45

Mae Gruffydd Rees ac Ifan, Llew a Fflur o Dryslwyn ger Llandeilo yn brysur yn y babell wyddoniaeth gydol y dydd.

Mae good vibe 'ma, medd Gruffydd wrth i'r haul dywynnu.

Mae Llantwd yng ngogledd Penfro a rhyw dair milltir o Aberteifi.

Os ydych yn gorfod teithio mewn car i'r Eisteddfod, y cyngor yw dilyn yr arwyddion 'Eisteddfod' melyn i gyrraedd y Maes. Y y cod post yw SA43 3NU.

Mae Maes B, y maes carafanau a gwersylla teuluol, Hwyrnos a maes pebyll Maes B, ynghyd â'r meysydd parcio i gyd yn agos at Faes yr Eisteddfod.

O'r gogledd a'r canolbarth:

Bydd traffig yn teithio i'r Maes ar yr A487, gan deithio i'r de o Aberystwyth, ymlaen i Synod Inn, heibio Aberteifi, cyn cyrraedd y safle, i'r gogledd o Lantwd ar yr A487.

O dde Cymru:

Bydd arwyddion clir yn cael eu gosod o gyffiniau Caerfyrddin ymlaen.

O'r ardal hon, dilynwch yr A40 i gyfeiriad cylchfan Penblewyn. Yno, cewch eich cyfeirio i gymryd yr A478 tua'r gogledd.

Parhewch hyd at y groesffordd gyda'r B4332, trowch i'r chwith a theithio tua'r gorllewin.

Dilynwch yr B4332 am tua dwy filltir, trowch i'r dde a dilyn y ffordd tuag at yr A487, nes cyrraedd y gyffordd gyda'r A487.

Ar ôl cyrraedd yr A487, ewch tua'r gogledd i gyfeiriad Aberteifi.

Parhewch am filltir nes cyrraedd y lleoliad, yn Llantwd.

Dod ar feic?

Mae hyd at 400 safle beic cloadwy wedi'u lleoli wrth ymyl y Ganolfan Groeso.

Y cyngor yw i chi gymryd gofal wrth feicio i'r Maes gan fod yr A487 yn gallu bod yn brysur.

Ffynhonnell y llun, Digwyddiadau Eisteddfod y Garreg Las

Mae yna groeso twymgalon iawn yn Llantwd

Ffynhonnell y llun, Digwyddiadau Eisteddfod y Garreg Las

Am 13:10 cystadleuaeth yr Unawd o dan 12 oed fydd ar lwyfan y Pafiliwn.

Y dasg eleni yw canu 'Fy ngardd fach i' gan J Eirian Jones.

Dyma'r olygfa o'r rhagbrawf ben bore.

Mae tair gwobr - £60, £40 a £20 - oll wedi cael eu rhoi gan Gwynfor, Sian a Rhiannon, er cof am Dad a theulu Pennar, Llandudoch.

Y beirniaid yw Catrin Aur a Jessica Robinson.

Mae'r criw yma o Grwbin newydd gyrraedd y Maes.

Mae Efan, Steffan a Dewi (y plant) wedi dod i gefnogi Cath a Buddug sy'n cystadlu heddiw gyda seindorf arian Crwbin.

Yn ôl Buddug "joio a ffindo Cyw yw plan y plant ar ôl i ni gystadlu".

Mae brass@bont yn cael paned yn y brif fynedfa ben bore cyn cystadlu yn y 4ydd adran i fandiau pres.

Dyma'r tro cyntaf i'r band o Bontarddulais gystadlu yn yr Eisteddfod.

Dywedodd Alison Gent, yr arweinydd: "Wnaethon ni benderfynu cystadlu eleni gan bod ganddon ni lawer o aelodau ifanc erbyn hyn ac i ddathlu Cymreictod Pontarddulais."

Y bandiau pres sy'n cystadlu ben bore.

Mae heddiw hefyd yn ddiwrnod y cystadleuwyr ifanc ac yn eu plith y bydd Carys o Aberteifi sy'n cystadlu ar yr unawd o dan 12.

Dyma hi'n ymarfer ben bore.

Pob hwyl i'r cystadleuwyr.

Mae Hanna a Luned o Gaerdydd wedi cychwyn gweithio ben bore.

“Dyma’r bedwaredd flwyddyn i ni weithio yn yr eisteddfod, ond ni’n edrych mlaen i fynd i Maes B ddiwedd yr wythnos,” meddai'r ddwy.

Eleni bydd y tocynnau yn cael eu sganio - wrth fynd i mewn ac allan o'r maes.

Wrth ddefnyddio'r system yma mae'r trefnwyr yn gwybod yn union faint o bobl sydd ar y Maes - ffarwel felly i'r stamp 'na ar gefn eich llaw wrth adael y maes.

Mae'r cystadlu yn dechrau am 09:00.

Y gystadleuaeth i'r Bandiau Pres Dosbarth 2/3 sydd ar y llwyfan gyntaf.

Wedi'r hir baratoi mae'r wythnos fawr wedi cyrraedd - wythnos Eisteddfod Genedlaethol y Garreg Las 2026.

Mae gohebwyr Cymru Fyw eisoes ar y maes ac fe fyddan nhw'n dod â holl gyffro'r Brifwyl i chi gydol yr wythnos ar ein llif byw.

Arhoswch gyda ni!

Ffynhonnell y llun, Sian Jenkins