Diolch am eich cwmni heddiw a gydol yr wythnos.

Mae'n gohebwyr wedi mwynhau dod â'r diweddaraf o Fôn - Eisteddfod yr Urdd gyntaf saith diwrnod o hyd.

Mae gweddill straeon y dydd ar wefan Cymru Fyw.

Mwynhewch y penwythnos a diolch am eich cwmni.

Mae wedi bod yn ddiwrnod - ac wythnos gyfan - llawn bwrlwm a hwyl, ond blinedig. Ac mae'n ymddangos bod Idris, o Grucywel, yn barod i fynd am adra!

Mae parti Mistar Urdd yn 50 yn dechre am 16.30.

Efan electro - “dj ieungaf cymru” yw’r dj.

Yn bresennol yn y parti fe fydd y Prif Weinidog Rhun ap Iorwerth, Caryl Parry Jones, Lloyd Lewis, Trystan ac Emma.

Joiwch!

Eisteddfod yr Urdd

Bob blwyddyn mae'r Urdd yn rhoi ysgoloriaeth i'r cystadleuydd mwyaf addawol yn ystod yr wythnos.

Eleni y gantores Mared Phillips o Ranbarth Penfro yw'r enillydd.

Llongyfarchiadau.

Mae Ysgol Peniel wedi dod o hyd i gysgod o'r haul er mwyn cael un ymarfer ola' cyn cystadlu ar y parti llefaru.

Mae'n olygfa drist bob blwyddyn i eisteddfodwyr, wrth i'r stondinau ddechrau cael eu tynnu i lawr ar ddiwedd wythnos.

Ond peidiwch â thristáu gormod, fe fyddan nhw'n ôl ymhen 12 mis wrth i'r Urdd ymweld â rhanbarth Gwent.

Gydag Eisteddfod yr Urdd wedi ymweld â Môn, faint wyddoch chi am yr ynys?

Rhowch gynnig ar gwis Cymru Fyw!

Eisteddfod Genedlaethol Cymru

Wrth i Eisteddfod yr Urdd ddod i ben bydd y sylw yn troi at Eisteddfod Genedlaethol y Garreg Las yn Llantwd ac mae eisoes yn argoeli i fod yn eisteddfod hynod o boblogaidd.

Ydy mae'r Orsedd ar gyfer y cadeirio eisoes yn llawn!

Ffynhonnell y llun, Eisteddfod Genedlaethol

"Ma' Sir Fôn yn le reit fawr. Dwi'n teimlo'n hapusach yn fy nghynefin a sgwennu am fy nghynefin."

Dyna eiriau Marlyn Samuel, awdur a dramodydd o Fôn wrth i'r ynys groesawu pobl yr wythnos hon i Eisteddfod yr Urdd.

Mae Marlyn yn awdur hynod o boblogaidd, sydd wedi cyhoeddi saith nofel ac mae hi hefyd yn aelod blaenllaw o Theatr Fach, Llangefni.

Fe wnaeth yr Urdd chwarae ran bwysig iawn yn ei thaith o rhoi inc ar bapur, dyma oedd ganddi i ddweud wrth Manon Steffan Ros ar ragen Llwyfan.

Gallwch ddarllen yr erthygl yn llawn yma.

Roedd yna gryn groeso i'r Prif Weinidog newydd, Rhun ap Iorwerth, yr wythnos hon wrth i'r Brifwyl gael ei chynnal ryw ddwy filltir o'i gartref.

Ef oedd y llywydd ddydd Mawrth ac roedd cryn ddiddordeb yn ei berfformiad buddugol yn Eisteddfod Genedlaethol yr Urdd 1983!

Fe ddechreuodd y Brifwyl saith diwrnod yn ôl gyda Gŵyl Triban, ond mae 'na dal amser am ychydig mwy o ganu gan y plant iau yn Yr Adlen.

Ffynhonnell y llun, Llun cyfrannydd

Fis Mai 1976 cynhaliwyd Eisteddfod yr Urdd ym Mhorthaethwy, Ynys Môn.

Hanner canrif yn ddiweddarach, mae criw y ddawns flodau'r flwyddyn honno wedi dod at ei gilydd i ail-greu llun arbennig.

Darllenwch yr hanes yma.

Ffynhonnell y llun, Llun cyfrannydd

Mae'r awyr las wedi denu'r torfeydd drwy'r wythnos, a tydi heddiw ddim gwahanol ar bnawn ola'r Steddfod.

Mae prif weithredwr yr Urdd wedi "diolch yn fawr iawn" i bobl Ynys Môn "am yr holl ymdrech" a sicrhau bod yr Eisteddfod wedi bod yn "arbennig" a "bythgofiadwy".

Dywedodd Siân Lewis bod trigolion yr ynys "wedi mynd y filltir ychwanegol i sicrhau croeso cynnes i gymaint o filoedd o blant a phobl ifanc".

Meddai: "Maen nhw wedi creu'r cyffro 'ma - peintio Ynys Môn yn goch, gwyn a gwyrdd ac mae Mr Urdd a baneri Cymru ym mhobman felly diolch yn fawr iawn iddyn nhw am yr holl ymdrech."

Roedd hi hefyd yn canmol "tîm anhygoel yr Urdd ei hun sydd o hyd eisiau esblygu cyfleoedd, nid yn unig yn y Steddfod ond ar draws yr Urdd yn gyffredinol".

Dywedodd ei bod yn "braf gweld mwy o gystadleuwyr yma yng ngogledd Cymru nag erioed o'r blaen" o ganlyniad i ymestyn yr ŵyl i saith diwrnod.

Ychwanegodd: "Parhau i dyfu wnawn ni, parhau i wrando ar leisiau pobl ifanc a sicrhau bod yr Urdd yn agor ymhellach i fwy o gynulleidfaoedd."

Does yna'r un 'Steddfod yn gyflawn heb ymweliad gan Mistar Urdd ac ydy mae e wedi bod ar y maes bob dydd.

Eleni fe ddathlodd ei ben-blwydd yn 50 a bu cryn ddathlu ar draws Cymru a mwy o ddathlu ar y maes heddiw.

Ffynhonnell y llun, Casgliad y Werin

BBC Radio Cymru

Ar hyn o bryd ar Radio Cymru mae Ifan Evans a Lisa Angharad yn cyflwyno uchafbwyntiau o Eisteddfod yr Urdd Ynys Môn 2026.

Cliciwch ar y botwm uchod.

Mae wedi bod yn hafan glyd (a heulog iawn) yng ngwlad y Medra.

Dyma gerdd groeso Gareth Evans-Jones, un o blant yr ynys a oedd yn beirniadu cystadleuaeth y Fedal Ddrama ddydd Mercher.

Ffynhonnell y llun, Llun cyfrannydd

Mae darn o dir sydd uwch y don

a'i gân yn famol, fodlon,

yn ynys nad yw'n unig,

yn llecyn glas i chwarae mig.

Dyma gartref hen chwedlau'n hoes,

lle plannodd Dwynwen gynt ei chroes,

lle crwydrodd Seiriol Wyn a Chybi Felyn

a chenedlaethau hyd bant a bryn.

Mae saith rhyfeddod byd a saith chyfandir hefyd,

ac ym Môn, bydd saith niwrnod o gelfyddyd.

Tyrd draw â'th gân â'th wên,

tyrd a'th liwiau i lywio llên,

tyrd am hufen iâ, tyrd am yr hwyl,

tyrd i groeso'r fam-ynys annwyl.

Cymer gam a chroesa'r Fenai,

dilyn llwybr aur y traethau,

a chofia, yn yr ŵyl saith niwrnod gynta',

cei hafan glyd yng Ngwlad y Medra.

Gyda'r maes mor brysur heddiw, buan iawn mae'r biniau yn llenwi - ond yn ffodus mae pobl fel Bill yno i'w gwagio nhw.

Wedi croesi afon Menai i Ynys Môn, mae'r croeso i eisteddfodwyr yn fawr wrth i ardaloedd, ysgolion, busnesau ac unigolion harddu'r fro.

A do mi gafwyd cystadleuaeth!

Llongyfarchiadau a diolch am y croeso.

Ffynhonnell y llun, Eisteddfod yr Urdd Ynys Môn