စက်တင်ဘာ ၅ ရက်သတင်းများအနှစ်ချုပ် - သတင်းလုံခြုံရေးကျိုးပေါက်မှုကြောင့် အရေးယူခဲ့တဲ့ဖြစ်စဉ်တွေရှိခဲ့တယ်လို့ ဒုတပ်ချုပ်ပြော
ဓာတ်ပုံ ရင်းမြစ်, MOI
စစ်တပ်အတွင်း သတင်းအချက်အလက် လုံခြုံရေး မကျိုးပေါက်အောင် ဂရုစိုက်ဖို့လိုသလို လုံခြုံရေးကျိုးပေါက်တဲ့ ဖြစ်စဉ်တွေမှာ ပါဝင်ပတ်သက်သူတွေကိုလည်း ပြင်းပြင်းထန်ထန် အရေးယူတာတွေ ရှိခဲ့တယ်လို့ ဒုတိယတပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ကျော်စွာလင်းက ပြောပါတယ်။
နေပြည်တော်၊ စစ်ရုံးက အရာရှိတွေကို စက်တင်ဘာ ၄ ရက်က တွေ့ဆုံချိန်မှာ သူက အဲဒီလို ပြောသွားတာပါ။
သတင်းလုံခြုံရေး ကျိုးပေါက်မှုတွေနဲ့ ပတ်သက်လို့ အရေးယူခဲ့တဲ့ ဖြစ်စဉ်ဘယ်လောက်ရှိပြီး ဘယ်လိုပြစ်ဒဏ်တွေနဲ့ အရေးယူထားတယ်ဆိုတာကိုတော့ ထည့်သွင်းပြောတာ မရှိပါဘူး။
စစ်တပ်အတွင်း လုံခြုံရေးသတင်း ကျိုးပေါက်ရင် အနည်းဆုံး ထောင်ဒဏ် ၇ နှစ်ဖြစ်ပြီး ရန်သူနဲ့ဆက်စပ်နေတာဆိုရင်တော့ အနှစ် ၂၀ ကနေ သေဒဏ်အထိ ချမှတ်တာရှိတယ်လို့ CDM တပ်အရာရှိတချို့က ရှင်းပြပါတယ်။
၂၀၂၅ ခုနှစ် ဇူလိုင်က ပြဋ္ဌာန်းခဲ့တဲ့ စစ်ဘက်ဆိုင်ရာလျှို့ဝှက်ချက်များ ထိန်းသိမ်းကာကွယ်ခြင်းဥပဒေ အရ စစ်ဘက်ဆိုင်ရာ လျှို့ဝှက်ချက်တွေကို တိုက်ရိုက်ဖြစ်စေ၊ သွယ်ဝိုက်ပြီးဖြစ်စေ နှုတ်နဲ့ပြောတာ၊ စာနဲ့ပေးပို့တာ ဒါမှမဟုတ် တခြားနည်းတစ်ခုခုနဲ့ သိရှိနိုင်အောင် လွှဲပြောင်းပေးတာတွေကို တားမြစ်ထားပါတယ်။
ဒီပြစ်မှုတွေ ထင်ရှားစီရင်ခံရရင် ထောင်ဒဏ်တစ်သက်ဖြစ်စေ၊ သေဒဏ်ဖြစ်စေ ချမှတ်ရမယ်လို့ ဥပဒေမှာ တွေ့ရပါတယ်။ ဒါ့
အပြင် ဗိုလ်ချုပ်ကြီး ကျော်စွာလင်းက ငွေကြေးလိမ်လည်မှု၊ အွန်လိုင်းလောင်းကစားမှု၊ မူးယစ်ဆေးဝါးမှုနဲ့ ကိုယ်ကျင့်တရားဖောက်ဖျက်မှုတွေကို ရှောင်ဖို့လည်း အရာရှိတွေကို တိုက်တွန်းခဲ့ပါတယ်။ တွေ့ဆုံပွဲမှာ စစ်တပ်အပေါ် သစ္စာစောင့်သိဖို့၊ စည်းကမ်းလိုက်နာဖို့နဲ့ ကိုယ်ကျင့်တရားကောင်းမွန်ဖို့တို့ကိုလည်း ပြောကြားခဲ့တယ်လို့ စစ်တပ်ရဲ့ ထုတ်ပြန်ချက်မှာ ဖော်ပြထားပါတယ်။
