ኦፕንኤአይ በደኅንነት ስጋት ምክንያት አዲስ የኤአይ ሞዴል ላለማውጣት ወሰነ

ኦፕንኤአይ በደኅንነት ስጋት ምክንያት አዲስ የሰው ሠራሽ አስተውሎት ሞዴል ለመልቀቅ የያዘውን ዕቅድ መሰረዙን አስታወቀ።

በይነ መረብ የሚያስስሰው እና መተግበሪያዎችን የሚጠቀመው አዲስ የኤአይ ሞዴል፣ የተቋሙን የጥራት ደረጃ ስላላሟላ ይፋ እንደማይደረግ የኦፕንኤአይ የደኅንነት ቁጥጥር ኃላፊ ሳቺ ጄይን ለቢቢሲ ገልጻለች።

የቻትጂፒቲ ፈጣሪው ኦፕንኤአይ የሠራቸው ሞዴሎች ያለፈው ሰኔ ላይ የአውስትራሊያ መንግሥትን ድረ ገጽ ጥሰው መግባታቸውን ይፋ አድርጓል።

ኤአይ በሰው ልጆች ደኅንነት ላይ ከጋረጠው አደጋ ጋር በተያያዘ ለሚነሱ ጥያቄዎች እንደ ማጣቀሻም እየተወሰነ ይገኛል።

የኦፕንኤአይ መሪ ሳም አልትማን እና የአንትሮፒክ መሪ ዳሪዮ አሞዲ የሰው ሠራሽ አስተውሎት እድገት እንዲረግብ አሳስበዋል።

የቴክኖሎጂ ኩባንያ በደኅንነት ስጋት ምክንያት አዲስ የኤአይ ሞዴል ላለመልቀቅ ሲወስን እምብዛም አይሰማም።

የደኅንነት ቁጥጥር ኃላፊዋ እንዳለችው ሞዴሉ በተሰጠው ወሰን እና ትዕዛዝ ውስጥ ታጥሮ ከመቆየት አንጻር ክፍተቶች ታይተውበታል።

በተጨማሪም ምን ዓይነት ሥራ እንዳከናወነ ለተጠቃሚዎች መረጃ የሚሰጥበት መንገድ ላይም ክፍተት ተገኝቷል።

"በተቋማችን ውስጥም ይሁን በተጠቃሚዎች ዘንድ ደኅንነቱ የተጠበቀ ሞዴል ማውጣት እንፈልጋለን። የደኅንነት ልኬታችን ከፍተኛ ነው" ስትልም አስረድታለች።

መስከረም ላይ የተለቀቀው ጂፒቲ 6 አስትራ የተባለው የኤአይ ሞዴል ውስብስብ የሆነ ምክንያታዊ ዕሳቤ በማሳየት እና ድርጊቶችን በራሱ በማከናወን የተካነ መሆኑ ተገልጿል። ይህም የዓመታት ምርምር ውጤት እንደሆነ ኩባንያው አስታውቋል።

የኦፕንኤአይ ሞዴሎች ላይ ክፍተቶች ላይ ከመገኘታቸው ጋር በተያያዘ የተቋሙ የደኅንነት ጥበቃ ጥያቄ አስነስቷል።

የአውስትራሊያ ጠቅላይ ሚኒስትር አንቶኒ አልባኔዝ፣ ከቁጥጥር ውጭ የሆነ ኤአይ የመንግሥት ድረ ገጾችን ጥሶ መግባቱን ተናግረዋል።

ኦፕንኤአይ ክስተቱን በቀጥታ ከማሳወቅ ይልቅ ኢሜል መላኩ ተገቢ እንዳልነበረም ገልጸዋል።

ኦፕንኤይ በተፈጠረው ነገር ማዘኑን ገልጾ ለክስተቱ "በተሻለ መንገድ ምላሽ መስጠት" እንደነበረበትም አስታውቋል።

ኦፕንኤአይ የበይነ መረብ ደኅንነት ጥበቃን ለማስጠበቅ ገንዘብ እንደሚሰጥ እና ጉዳት የደረሰባቸውን ተቋማት በቀጥታ እንደሚያግዝ ተገልጿል።

ያለፈው ሐምሌ ላይ የኦፕንኤአይ የሰው ሠራሽ አስተውሎት ሞዴል ሀጊንግ ፌስ የተባለውን ኩባንያ በይነ መረብ ጥሶ በመግባት ጥቃት መፈጸሙ ይፋ ተደርጓል።

የኤአይ ሞዴሉ በራሱ የወሰደው እርምጃ በርካቶች ስጋታቸውን እንዲያስተጋቡ ምክንያት ሆኗል።

ቺፕ የሚያመርተው ንቪዳ፣ በራሳቸው የሚንቀሳቀሱ የኤአይ ሞዴሎችን ደኅንነት ለማስጠበቅ የሚረዳ መተግበሪያ መሥራቱን ገልጿል።

መተግበሪያው ሀጊንግ ፌስ ላይ የደረሰውን የበይነ መረብ ጥቃት መከላከል የሚያስችል እንደሆነም ተጠቁሟል።

የንቪዳ ኃላፊ ጄንሰን ሀውንግ፣ ኤአይ ላይ ጥብቅ ቁጥጥር መደረግ አለበት የሚለውን ሐሳብ አይደግፍም።

በራሳቸው የሚንቀሳቀሱ የኤአይ ሞዴሎች የሚፈጥሩትን ችግር መቀልበስ የሚቻልበት መንገድ እንዳለም ይናገራል።