Паралимпиячилар ҳам ўйинларни бошлаб олди.
Қизиқ томони, айтишларича, Олимпия ўйинлари давомида чипта топиш унчалик қийин масала бўлмаган. Аммо Паралимпиада ўйинларига чипта топишимиз жуда қийин бўлди.
Айниқса, ўзбек спортчилари қатнашадиган бирор турга ёки ўзим шуғулланадиган ўтириб ўйналадиган волейболга киришни жуда истаган эдим. Бироқ ҳозирча ушбу мусобақаларга кириш имкони бўлганича йўқ.
Олимпия ўйинлари вақтида ҳар хил ғавғолардан олисроқ бўлайлик деб шаҳарни ташлаб кетган лондонликлар Паралимпия ўйинларига қайтиб келган ва чипталарни топиш ўта мушкул ишга айланган.
Паралимпия ўйинларида дунёнинг 165 давлатидан 4 мингдан ортиқ спортчи келган.
Қувонарлиси Ўзбекистон спортчилари ҳам ушбу ўйинларда иштирокини ошириб бормоқда.
Бундан саккиз йил муқаддам Афинада бўлган ўйинларда атиги бир киши Ўзбекистон шарафини ҳимоя қилган. Пекинга эса икки спортчи борган. Бироқ уларнинг бирортаси ҳам совринли ўринларни қўлга киритмаган.
Бу йил эса ўйинларда 10 ўзбекистонлик спортчи қатнашиши кутилмоқда. Бу Марказий Осиё ичида энг катта рақам. Спортчилар медалларга даъвогар эканлигини яширишмаяпти.
Бироқ танқидчилар 30 мингдан ортиқ имконияти чекланганлар спорт тури билан шуғулланадиган Ўзбекистон учун ушбу рақамлар ўта озлигини айтишади.
Марказий Осиёдан келган вакил сифатида шунга амин бўлдимки, Лондон имконияти чекланган инсонлар учун иложи бўлган барча имкониятни яратишга ҳаракат қилган.
Аравачада юрганлардан тортиб, имконияти чекланганларга нисбатан матбуотда ишлатиладиган атамаларгача йўриқнома ишлаб чиққан.
Бироқ ушбу спорт тури ва атамаларига нисбатан муносабат вақт ўтиши билан янада кескин ўзгаришлар юз тутиши мумкин деган тўхтамга келдим.
Бундан 10 йилларча муқаддам ўзимиз ҳам ногирон, соғлом спортчилар деган атамаларни ишлатиб юрган бўлсак, бугунга келиб имконияти чекланган спортчилар каби атамалар пайдо бўлди.
Ҳаттоки иккинчи томонга Би-Би-Си "имконияти чекланмаган спортчи" атамасини қўллашни тавсия қилмоқда.
Ушбу йўриқномалардан асосий мақсад имконияти чекланганларнинг чекланмаганлар билан ўзларини бирдек тутиши ва ажратишлардан ноқулайлик сезмаслиги учун шароит яратиш.
Паралимпиада ўйинлари технологиянинг ривожланиши ортидан 20-30 йилдан сўнг Олимпиада ўйинлари билан қўшилиб кетиши мумкин деган қарашлар ҳам бор.
Жанубий Африкалик енгил атлетикачи Оскар Писториуснинг протез оёқда Олимпиада ўйинларида иштирок этиши ва совринли ўринлардан бирини қўлга киритиши паралимпия ўйинларини келажакда Олимпияда ўйинларига қўшилиб кетиши мумкин деган фаразларни қўллаб-қувватлаган.
Бу йўналишдаги фикрларни қўллаб-қувватловчилар, барча спорт турлари аралашмаган тақдирда ҳам очилиш ва ёпилиш каби маросимлар ҳам Олимпиада ҳам Паралимиада ўйинлари учун бир хил вақтда ҳамда ажратилмаган ҳолда ўтиши керак деган фикрни олдинга суришади.
Ўшанда паралел олимпиада сўзларининг қисқартмасидан олинган Паралимпиада калимаси ўрнига фақатгина Олимпиада атамаси қолиши ва имконияти чекланган спортчиларни ажратмасликка қаратилган сиёсат буткул қарор топиши мумкин.
