Медведев: 'Шўроча услуб энди ишламаяпти'

Россия Президенти Дмитрий Медведов миллатга йиллик мурожаатида мамлакатда жиддий иқтисодий ислоҳотлар ўтказишга чақирган.

Унинг айтишича, шўроча услуб бундан буён иш бермаётир ва Россияни "демократик жамиятлар" асосида замонавийлаштиришга эҳтиёж бор.

Медведев жанобларининг қўшимча қилишича, Россия иқтисодий инқирозда ташқи омилларни айблай олмайди.

Россия Президенти шунингдек, мамлакат нефт ва газга боғланган иқтисодидан "янги, юқори даражали цивилизация" томон ўсиши кераклигини айтади.

"Хом ашёга асосланган ибтидоий иқтисод ўрнига биз замонавий, ўзига хос билим, янги товарлар ва технологиялар, яъни одамлар учун фойдали бўлган товарлар ишлаб чиқарадиган иқтисодни барпо этамиз", дейди у.

"Эскирган жамият ўрнига биз барча учун қарор қабул қиладиган раҳбарлар каби зиёли, эркин ва жавобгарликни ҳис қиладиган халққа айланамиз".

Медведев жанобларининг айтишича, ҳозирда бир миллиондан ортиқ россиялик ишини йўқотиши мумкин.

Айни пайтда у мамлакатдаги мавжуд ижтимоий муаммоларга диққат қаратилиши лозимлигини таъкидлайди.

Президент Медведев кўра, Россия учун "мутлақ янги асосларга эга дунёдаги энг қудратли давлатларидан бири мақомига эришиш" вақти етган.

Одатда Дмитрий Медведев маърузалари олдиндан қаттиқ сир тутилсада, унинг бу сафарги нутқи айнан шундай бўлиши олдиндан кутилганди.

Сабаби у ушбу мавзуга сентябрь ойида Россия веб саҳифаларидан бирида чоп этган мақоласида батафсил тўхталган эди.

Мақолада Президент иқтисодиётни замонавийлаштириш ва Россияни модерн ва янада демократик мамлакатга айлантиришга катта эҳтиёж борлиги ҳақида ёзганди.