Ukraina: Kievga hujum oqibatida kamida 15 kishi halok bo‘ldi. Mamlakat havo hujumlaridan qanchalik himoyalangan?

Rossiya tomonidan Ukraina poytaxti Kievga qilingan so‘nggi hujumlar oqibatida kamida 15 kishi halok bo‘lgan, dedi Kiev meri.

Ukraina Davlat favqulodda vaziyatlar xizmati ma’lum qilishicha, tun davomida shaharning turli hududlaridagi ko‘p qavatli turar joy binolari va omborxonalar zarbaga uchragan. Shuningdek, bolalar shifoxonasi va maktab ham zarar ko‘rgan.

Ukraina prezidenti Volodimir Zelenskiy halok bo‘lganlar havo mudofaa raketalari tanqisligi oqibati ekanini ta’kidladi. Kiev bu turdagi qurollarni yetkazib berish uchun g‘arbdagi ittifoqchilariga tayanadi.

Kievdagi vayron bo‘lgan ko‘p qavatli turar joy binosi oldida BBC bilan suhbatlashgan shahar meri Vitaliy Klichkoning aytishicha, Ukrainaga "o‘q-dorilar, raketaga qarshi tizimlar kerak, bizga hamkorlarimiz yordami zarur".

Klichko zarar ko‘lamini baholash uchun Solomyanskiy tumanida bo‘lgan. Uning atrofida favqulodda vaziyatlar xizmati xodimlari vayronalarda qutqaruv-qidiruv ishlarini davom ettirar, odamlar esa vayron bo‘lgan uylari tashqarisida turardi.

Ular orasida Valeriya Bondaruk ham bo‘lgan. U Ukraina janubidagi uyi bombardimon qilinganidan keyin, o‘zi va qiziga xavfsizroq bo‘ladi deb hisoblab, Kievga ko‘chib kelgan.

Endi esa bu urush davomida u ikkinchi marta o‘z uyini tark etishga majbur bo‘lgan.

Uning yotoqxonasi devoriga qadalib qolgan shisha parchasi hujum naqadar yaqin bo‘lganini ko‘rsatadi. Ularda havo hujumlaridan himoyalanish uchun yer osti panohgohi bo‘lmagani uchun u tunni yo‘lakda yashirinib o‘tkazgan.

U BBC'ga 13 yoshli qizining kelajagidan xavotirda ekanini va Ukrainani tark etish haqida o‘ylayotganini aytgan.

Ukraina parlamenti a’zosi Oleksiy Goncharenko BBC'ga bergan intervyusida Ukraina ballistik raketa hujumlaridan "mutlaqo himoyalanmagani" va havodagi nishonlarni urib tushiruvchi raketalarsiz "hech narsa qila olmasligi"ni aytdi.

BBC Radio 4'ning Today dasturiga bergan intervsida u shunday dedi, " Biz uchun bu juda og‘riqli, chunki havodagi nishonlarni urib tushiruvchi raketalarsiz har kuni odamlarimiz halok bo‘lyapti".

Zelenskiy Telegram'da yozishicha, "Ukrainada ballistik raketalarga qarshi yetarlicha himoya vositalari bo‘lmas ekan, Rossiya tinchlik haqida jiddiy o‘ylamaydi".

U shunday qo‘shimcha qildi, "Patriot majmuasi raketalari haligacha to‘ldirilgani yo‘q, chunki ular har kuni kerak. Har bir qo‘shimcha raketa odamlarimizning hayotini saqlab qoladi".

Ukraina Havo kuchlari payshanba kuni ertalab e’lon qilgan ma’lumotga ko‘ra, tungi hujumlarda qo‘llangan Rossiyaning ballistik raketalaridan birortasi ham tutib qolinmagan.

Rossiya Mudofaa vazirligi esa havo, quruqlik va dengizdan uchiriladigan qurollar yordamida harbiy ob’ektlar hamda omborxonalar nishonga olinganini bildirdi.

Ukraina Rossiyaning ballistik raketa hujumlariga qarshi kurashish uchun AQSh yetkazib berayotgan Patriot havodagi nishonlarni urib tushiruvchi raketalariga tayanib keladi. Biroq AQSh Yaqin Sharqdagi urush davomida o‘z zaxiralarining katta qismini ishlatgan va keyingi vaqtlarda Ukrainaga kamroq sonda raketa yetkazib bermoqda.

Zelenskiyning qo‘shimcha harbiy yordam so‘rab yangilangan murojaati u mashhur sobiq mudofaa vaziri Mixaylo Fedorov tomonidan to‘g‘ridan-to‘g‘ri siyosiy chaqiriqqa duch kelayotgan bir paytda yangradi. Fedorov saylov o‘tkazishga chaqirib, korruptsiya armiyani qurol-yarog‘dan mahrum qilganini da’vo qilar ekan, hukumatni keskin tanqid qildi.

Kievga qaratilgan so‘nggi hujumlar mahalliy vaqt bilan yarim tun atrofida, shahar bo‘ylab havo hujumi haqidagi sirenalar yangrashi bilan boshlandi. Shundan so‘ng Rossiya tomonidan uchirilgan taxminan 20 ta raketaning zarbasi kuzatildi.

Hujumlar oqibatida minglab ob’ektlarda elektr ta’minoti uzilib, Kiev viloyatining ayrim hududlari qorong‘ulikka cho‘mdi.

Tunda halok bo‘lganlar xotirasiga juma kuni motam kuni deb e’lon qilindi.

Solomyanskiy tumanidagi mahalliy maktab oynalari sindirib tashlangan, sport maydonlari esa vayronalar bilan qoplanib qolgan edi.

Yaqin-atrofdagi omborxona butunlay vayron bo‘lgan va yerto‘lasi ochilib qolgan. BBC muxbiriga aytilishicha, bu atrofdagi ko‘p qavatli turar joy binolarini isitish bilan ta’minlab kelgan kir yuvish va qozonxona bo‘lgan.

Chorshanbaga o‘tar kechasi amalga oshirilgan hujum Ukraina razvedkasining rahbar o‘rinbosari BBC'ga ta’riflagan, Rossiya qish oldidan hayotni qiyinlashtirish maqsadida rejalashtirayotgan hujumlarga o‘xshaydi. Bu hatto uylari vayron bo‘lmagan odamlarga ham taalluqli.

Ukraina Havo kuchlari ma’lum qilishicha, hujumda Rossiya tomonidan 168 ta dron va 44 ta raketa qo‘llangan bo‘lib, asosiy nishon Kiev bo‘lgan. Shuningdek, havo mudofaa tizimlari 146 ta dron va 39 ta qanotli raketani urib tushirgan.

31 yoshli Anastasiya Kovtun to‘qqiz qavatli binodagi vayron bo‘lgan xonadoni qoldiqlari yonida turmush o‘rtog‘i bilan o‘tirgan edi.

Boshlang‘ich sinf o‘qituvchisi Anastasiyaning aytishicha, panohgohda turgan paytida o‘z hududidagi portlash tovushlarini eshitgach, "boshim portlab ketadigandek bo‘ldi", kabi his qilgan.

"Bu o‘z uying ekanini anglash juda qo‘rqinchli, sen hech qachon navbat senga keladi deb o‘ylamaysan", dedi u BBC'ga.

Undan yana xonadoniga qaytib yashay oladimi, deb so‘ralganda, u shunday javob berdi: "Qaytib ko‘chib kirish imkoni bo‘lgan taqdirda ham, bu voqeadan keyin biz buni xohlamasdik. Agar xonadonda yana o‘n daqiqa qolganimizda, halok bo‘lishimiz mumkin edi".

Kiev viloyatining boshqa hududlarida ham hujumlar kuzatildi. Brovari va Borispil tumanlaridagi hujum oqibatida bir erkak halok bo‘ldi, yetti kishi yaralandi. Mahalliy rasmiyning aytishicha, Donetsk viloyatida bir kishi halok bo‘lgan va 11 kishi jarohat olgan.

Rossiyada Mudofaa vazirligi mamlakatning turli hududlariga yo‘naltirilgan 726 ta Ukraina droni urib tushirilganini ma’lum qildi.

Ruminiya Mudofaa vazirligi ma’lum qilishicha, bir dron Ukraina bilan shimoliy chegara orqali mamlakat hududiga kirib kelgan. Dron "aholi yashamaydigan hudud"ga qulashidan oldin havo xavfi haqidagi sirena ishga tushirilgan.

Polsha harbiylari ham o‘z havo hududini himoya qilish maqsadida "mudofaa havo amaliyotlari"ni boshlaganini ma’lum qildi.

So‘nggi haftalarda urushning har ikki tomoni keng ko‘lamli havo hujumlarini amalga oshirdi. Bu hujumlar oqibatida o‘nlab odamlar halok bo‘ldi.

Ukraina Rossiya ichkarisidagi nishonlarga qarshi hujumlarni kuchaytirdi va hafta oxirida poytaxt Moskvaga 600 ta drondan iborat to‘lqinli hujum uyushtirdi.

Bu hafta Rossiyaga qarshi amalga oshirilgan ikki alohida hujum natijasida kamida 16 kishi, jumladan bir nafar bola halok bo‘ldi.

Iyul oyidan buyon Ukraina Rossiyadagi Amazon'ga tenglashtiriladigan onlayn chakana savdo kompaniyasi Wildberries'ga tegishli ob’ektlarni bir necha bor nishonga oldi.

Ukraina Mudofaa vazirligi ma’lum qilishicha, so‘nggi hujum natijasida kompaniyaning har 10 ta logistika markazidan yettitasi yaroqsiz holga keltirilgan.

Har ikki tomon ham davom etayotgan hujumlar va zaifliklarga duch kelayotganiga qaramay, otashkesim bo‘yicha diplomatik sa’y-harakatlarda deyarli hech qanday siljish kuzatilmadi. Har ikki tomon bir-birini tinch aholini nishonga olishda ayblamoqda.

Rossiya Ukrainaga qarshi keng ko‘lamli bosqinini ilk bor 2022 yil fevral oyida boshlagan. Ayni paytda u Ukraina hududining taxminan beshdan bir qismini nazorat qilmoqda, bu hududlar asosan sharqiy chegara mintaqalarida joylashgan.

Maqolada Kievdan Izabella Juellning qo‘shimcha ma’lumotlaridan ham foydalanildi.