لائیو, اسرائیلی فوج کی چوکی پر حملہ اور دو مبینہ حملہ آوروں کی ہلاکت: نیتن یاہو کا مقبوضہ مغربی کنارے کے شہر الخلیل کے محاصرے کا حکم

لائیو کوریج

1. 44 منٹ قبلپاکستان کی سعودی عرب پر حوثیوں کے حملوں کی مذمت، علاقائی چیلنجز سے نمٹنے کے لیے مکالمے اور سفارت کاری پر زور

   ترجمان دفتر خارجہ کا کہنا ہے کہ پاکستان علاقائی چیلنجز سے نمٹنے کے لیے بات چیت پر یقین رکھتا ہے جبکہ خطے میں بڑھتی ہوئی کشیدگی کے دوران سفارتی رابطوں کا سلسلہ بھی جاری ہے۔

   پاکستانی دفترِ خارجہ کے ترجمان نے ہفتہ وار بریفنگ میں نائب وزیرِ اعظم اور وزیرِ خارجہ اسحاق ڈار کی جانب سے 18 اکتوبر کو مصر اور ایران کے وزرائے خارجہ سے الگ الگ ٹیلیفونک رابطوں کے حوالے سے بتایا کہ اس گفتگو میں خطے کی تازہ صورتحال اور باہمی تعاون پر بات چیت کی گئی۔

   ترجمان کے مطابق مصری وزیرِ خارجہ بدر عبدالعاطی سے گفتگو کے دوران دونوں رہنماؤں نے علاقائی پیش رفت پر تبادلۂ خیال کیا اور سعودی عرب پر حوثیوں کے حملوں کی مذمت کی۔

   ترجمان کے مطابق اسحاق ڈار اور مصری وزیر خارجہ نے سعودی عرب کی خودمختاری، علاقائی سالمیت اور سلامتی کے لیے اپنی حمایت اور یکجہتی کا اعادہ بھی کیا۔

   ترجمان کے مطابق دونوں رہنماؤں نے پاکستان، مصر، ترکی اور سعودی عرب پر مشتمل ریجنل فور (آر-4) تعاون کے فریم ورک کے تحت ہونے والے تعاون کا جائزہ لیا اور علاقائی امور پر رابطوں کو مزید مضبوط بنانے کے لیے اس کے آئندہ اجلاس کے انعقاد کی امید ظاہر کی۔

   ترجمان دفترِ خارجہ کے مطابق اسحاق ڈار نے ایرانی وزیرِ خارجہ عباس عراقچی سے گفتگو میں خطے کی بدلتی ہوئی صورتحال اور بغداد میں جاری اسلامی تعاون تنظیم (او آئی سی) کے وزرائے خارجہ کونسل کے اجلاس پر تبادلۂ خیال کیا۔

   انھوں نے علاقائی چیلنجز سے نمٹنے کے لیے مکالمے اور سفارت کاری کی اہمیت پر زور دیا، جبکہ دونوں رہنماؤں نے قریبی رابطے میں رہنے پر اتفاق کیا۔

   دفترِ خارجہ کے مطابق یہ رابطے سفارتی روابط، علاقائی تعاون اور تنازعات کے پرامن حل کے لیے پاکستان کے عزم کی عکاسی کرتے ہیں۔

2. ایک گھنٹہ قبلیمن کے قریب مبینہ حملے کا شکار کشتی میں سوار 14 انڈین شہری محفوظ ہیں، انڈین سفارتخانے کی تصدیق

   یمن میں انڈیا کے سفارتخانے نے اپنے بیان میں تصدیق کی ہے کہ بحیرۂ احمر میں مبینہ حملے کا شکار ہونے والی کشتی میں سوار 14 انڈین شہری محفوظ ہیں اور وہ یمن کے مغربی شہر الحدیدہ کے قریب موجود ہیں۔

   یاد رہے کہ یہ بیان ایسے وقت میں سامنے آیا ہے جب حوثی باغیوں نے دعویٰ کیا تھا کہ 22 اکتوبر کو جزیرہ جبل زقر کے قریب ایک کشتی پر حملہ ہوا ہے جس میں 14 انڈین شہری سوار تھے۔ حوثیوں نے اس حملے کا الزام سعودی عرب پر عائد کیا تھا۔

   انڈین سفارتخانے نے سوشل میڈیا پر جاری بیان میں کہا ہے کہ موصول ہونے والی اطلاعات کے مطابق تمام 14 انڈین شہری محفوظ ہیں اور الحدیدہ کے علاقے میں موجود ہیں۔

   انڈین سفارتخانے کے مطابق ان کی خیریت اور سلامتی کو یقینی بنانے کے لیے کوششیں جاری ہیں۔

   اس سے قبل سفارتخانے نے کہا تھا کہ وہ واقعے کے حالات اور حقائق جاننے کے لیے مختلف فریقوں سے رابطے میں ہے۔

   سفارتخانے کا کہنا ہے کہ 22 اکتوبر کو یمن کے ساحل کے قریب پیش آنے والے اس واقعے کی مزید تفصیلات جاننے کی کوششیں جاری ہیں، جس میں بظاہر ایک کشتی پر انڈین شہری سوار تھے۔

   یاد رہے کہ رواں برس جولائی سے حوثیوں نے بحیرۂ احمر میں ان جہازوں کے خلاف بحری ناکہ بندی نافذ کر رکھی ہے، جنھیں وہ سعودی عرب سے منسلک قرار دیتے ہیں۔

   گروپ کا کہنا ہے کہ یہ پابندیاں صرف سعودی جہازوں پر لاگو ہوتی ہیں اور آبنائے باب المندب، جو بحیرۂ احمر کا جنوبی دروازہ ہے، بین الاقوامی جہاز رانی کے لیے بدستور کھلی ہوئی ہے۔

3. ایک گھنٹہ قبلتائیوان میں شدید بارشوں اور تیز ہواؤں کا الرٹ، لہروں میں بہنے سے ایک شخص ہلاک، سینکڑوں پروازیں منسوخ

   طاقتور طوفان چیمپی تائیوان کے شمال مشرقی ساحل کے قریب پہنچ چکا ہے۔ تائیوان کے حکام کے مطابق سمندری لہروں میں بہہ جانے سے ایک شخص ہلاک جبکہ 171 افراد زخمی ہوئے ہیں۔ طوفان کے سبب ایک ہزار سے زیادہ افراد کو محفوظ مقامات پر منتقل کیا گیا ہے۔

   طوفان کی شدت کے باعث وہاں کے سکول اور دفاتر بند کر دی گئی ہیں، جبکہ پورے مشرقی ایشیا میں سینکڑوں پروازیں منسوخ کر دی گئی ہیں۔

   حکام نے خبردار کیا ہے کہ شمال مشرقی علاقوں میں ہفتے کے روم تک 90 سینٹی میٹر تک بارش ہو سکتی ہے اور اس دوران تیز ہوائیں چلنے کا امکان ہے۔

   سینٹرل ویدر ایڈمنسٹریشن کا کہنا ہے کہ بارش کی شدت ہفتے کی صبح اپنے عروج پر پہنچ سکتی ہے اور ہفتے کی شام تک شدید بارشوں کا سلسلہ جاری رہنے کا امکان ہے۔ حکام نے لوگوں کو ساحلی اور پہاڑی علاقوں سے دور رہنے کی ہدایت کی ہے۔

   طوفان کے پیش نظر جمعے کو تائیوان کے تقریباً تمام اضلاع اور شہروں میں دفاتر اور تعلیمی ادارے بند رہے۔

   شدید موسم کے باعث تائیوان کی سٹاک ایکسچینج بھی بند کر دی گئی۔ تاہم مغربی ساحل کے قریب واقع کِن مین کاؤنٹی میں معمول کے مطابق کام اور تعلیمی سرگرمیاں جاری رہیں۔

   جمعے کی سہ پہر طوفان کے جھکڑوں کی رفتار 191 کلومیٹر فی گھنٹہ ریکارڈ کی گئی۔ رواں ہفتے اپنے عروج پر چیمپی کو اس سال دنیا کا سب سے طاقتور طوفان قرار دیا گیا تھا۔

   ماہرینِ موسمیات کے مطابق طوفان تائیوان کے شمال مشرقی حصے اور جاپان کے جنوبی جزائر اوکیناوا کے قریب سے گزرنے کے بعد چین کے مشرقی ساحل کے قریب سمندر میں رہے گا اور پھر شمال مشرق کا رخ کرتے ہوئے جاپان کے مرکزی جزیرے کی جانب بڑھ سکتا ہے۔

   تائیوان، ہانگ کانگ اور جاپان کے محکمہ موسمیات کی پیش گوئی ہے کہ طوفان کا مرکز تائیوان سے ٹکرائے بغیر گزر جائے گا۔ تاہم ماہرین کا کہنا ہے کہ اگر طوفان کی رفتار سست پڑ گئی یا اس کا رخ تبدیل ہوا تو اس امکان کو مکمل طور پر مسترد نہیں کیا جا سکتا۔

   تاریخ کے طاقتور ترین ایل نینو کا اثر پاکستان اور انڈیا پر بھی پڑے گا؟

   دوسری جانب جاپان کے جنوبی صوبے اوکیناوا میں تقریباً 8,400 گھروں کی بجلی منقطع ہونے کی اطلاعات ہیں، جبکہ ملک کی چار فضائی کمپنیوں کی 160 سے زیادہ پروازیں منسوخ کر دی گئی ہیں۔

   چیمپی حالیہ عرصے میں آنے والے کئی شدید طوفانوں میں سے ایک ہے۔ ماہرین کا کہنا ہے کہ بحرالکاہل میں سپر ایل نینو کے باعث سمندر کے درجہ حرارت میں اضافہ طوفانوں کی شدت میں اضافے کا سبب بن رہا ہے۔

4. 2 گھنٹے قبلشوکت نواز میر مبینہ گرفتاری کیس، عدالت نے ایس ایچ او دھیرکوٹ کو 29 اکتوبر کو طلب

   پاکستان کے زیرِ انتظام کشمیر میں کالعدم جموں و کشمیر جوائنٹ عوامی ایکشن کمیٹی کے کور ممبر شوکت نواز میر کی مبینہ گرفتاری کے مقدمے میں عدالت نے تین درخواستیں منظور کرتے ہوئے ایس ایچ او تھانہ دھیرکوٹ کو 29 اکتوبر کو عدالت میں پیش ہونے کا حکم دیا ہے۔

   یاد رہے کہ 30 جون 2026 کو عوامی ایکشن کمیٹی نے اپنے ایک اعلامیے میں دعویٰ کیا تھا کہ شوکت نواز میر کو دھیرکوٹ کے علاقے سے گرفتار کر لیا گیا ہے۔ اس حوالے سے ایک ویڈیو بھی سوشل میڈیا پر وائرل رہی۔

   شوکت نواز میر کی بہن یاسمین میر کی جانب سے دائر ان درخواستوں پر ان کے وکیل شاہد علی اعوان نے پیروی کی۔

   شاہد علی اعوان نے سماعت سے متعلق بی بی سی اردو کو بتایا کہ پہلی درخواست میں مؤقف اختیار کیا گیا تھا کہ شوکت نواز میر کو تھانہ دھیرکوٹ کے ایس ایچ او کی موجودگی میں گرفتار کیا گیا، ان کے مطابق سوشل میڈیا پر گردش کرنے والی ایک ویڈیو میں بھی شوکت نواز میر کو ایس ایچ او اور دیگر پولیس اہلکاروں کی موجودگی میں لے جاتے ہوئے دیکھا جا سکتا ہے۔

   درخواست میں عدالت سے استدعا کی گئی تھی کہ ایس ایچ او کو طلب کرکے وضاحت لی جائے کہ ویڈیو میں دکھائی دینے والا واقعہ کیا تھا اور آیا شوکت نواز میر کو پولیس نے گرفتار کیا تھا یا نہیں۔

   دوسری درخواست میں ایک یو ایس بی میں محفوظ مواد کو عدالتی ریکارڈ کا حصہ بنانے کی اجازت طلب کی گئی تھی۔

   وکیل شاہد علی اعوان کے مطابق اس مواد میں شوکت نواز میر کی مبینہ گرفتاری کی ویڈیو اور اُس وقت کے وزیرِ قانون میاں عبدالوحید کا مبینہ بیان شامل ہے، جس میں انھوں نے شوکت نواز میر کو دھیرکوٹ سے گرفتار کیے جانے کی کارروائی کو درست قرار دیا تھا۔

   اس درخواست کو بھی عدالت نے منظور کرتے ہوئے یو ایس بی ڈیوائس کو ریکارڈ کا حصہ بنا دیا گیا ہے۔

   ’غیرقانونی حراست‘ یا ’گرفتاری کے ڈر سے مفرور‘: جوائنٹ عوامی ایکشن کمیٹی کے رہنما شوکت نواز میر کی مبینہ گمشدگی کا معمہ

   وکیل شاہد علی اعوان نے بتایا کہ تیسری درخواست سمیت تینوں درخواستوں پر حکومت کی جانب سے ایڈووکیٹ جنرل آفس کے وکلا نے اعتراضات اٹھائے تھے، تاہم عدالت نے یہ اعتراضات مسترد کرتے ہوئے درخواستیں منظور کر لیں۔

   عدالت نے ایس ایچ او تھانہ دھیرکوٹ کو 29 اکتوبر کو طلب کر لیا ہے تاکہ شوکت نواز میر کی مبینہ گرفتاری سے متعلق معاملے پر وضاحت حاصل کی جا سکے۔

   وکیل کے مطابق یاسمین میر کے بھائی گل نواز میر کو بھی اس مقدمے میں درخواست گزار بنانے کی درخواست منظور کر لی گئی ہے۔

5. 2 گھنٹے قبلفوجی چوکی پر حملے میں دو مبینہ حملہ آوروں کی ہلاکت، نیتن یاہو کا مقبوضہ مغربی کنارے کے شہر الخلیل کے محاصرے کا حکم

   اسرائیلی وزیرِ اعظم نیتن یاہو نے فوجی چوکی پر حملے کے بعد مقبوضہ مغربی کنارے کے شہر الخلیل کو مکمل طور پر بند کرنے کا حکم دیا ہے۔

   اسرائیلی وزیرِ اعظم نے یہ فیصلہ الخلیل میں اسرائیلی چوکی کے داخلی راستے کے قریب ایک فوجی چوکی پر ہونے والی فائرنگ کے بعد کیا گیا، جس میں کم از کم پانچ افراد زخمی ہو گئے۔

   اسرائیلی فوج کے مطابق، جمعے کے روز الخلیل میں ’فرش الہویٰ‘ کے داخلی راستے کے قریب ایک فوجی چوکی پر فائرنگ کرنے کے شبے میں اسرائیلی فورسز نے دو فلسطینیوں کو ہلاک کر دیا۔

   طبی عملے نے بتایا کہ مقبوضہ مغربی کنارے میں شہرِ الخلیل کے قریب ہونے والی فائرنگ کے واقعے میں کم از کم پانچ اسرائیلی زخمی ہوئے، جن میں سے دو کی حالت تشویشناک ہے۔

   اسرائیلی اخبار ’ہارٹز‘ کے مطابق، مختصر تعاقب کے بعد اسرائیلی فوج نے ان دو فلسطینیوں کو ہلاک کر دیا جن پر اس حملے میں ملوث ہونے کا شبہ تھا۔

   اسرائیلی فوج نے شہرِ الخلیل اور اس کے آس پاس کے کئی دیہات کا محاصرہ کر لیا ہے۔ ایک بیان میں فوج نے دعویٰ کیا کہ اُنھوں نے ’دو دہشت گردوں کو ہلاک‘ کر دیا ہے۔

   اسرائیلی وزیرِ اعظم کے ایکس اکاؤنٹ سے جاری کیے گئے بیان میں کہا گیا ہے کہ میں نے ابھی وزیر دفاع، آئی ڈی ایف (IDF) کے چیف آف اسٹاف، آئی ایس اے (ISA) کے ڈائریکٹر، قومی سلامتی کے مشیر اور آئی ڈی ایف کی سینٹرل کمانڈ کے کمانڈر کے ساتھ مل کر سکیورٹی صورتحال کا جائزہ لیا ہے۔

   اُنھوں نے الزام لگایا کہ ’ایسا معلوم ہوتا ہے کہ حماس بے گناہ شہریوں کے قتلِ عام کے لیے ایک بڑے حملے کی منصوبہ بندی کر رہی تھی، جس کی تصدیق بڑی مقدار میں برآمد ہونے والے اسلحے اور گولہ بارود سے ہوتی ہے۔‘

   اسرائیلی وزیرِ اعظم کا کہنا تھا کہ ’میں نے آئی ڈی ایف اور سکیورٹی فورسز کو ہدایت کی ہے کہ وہ فوری طور پر شہرِ ہیبرون (الخلیل) کا محاصرہ کر لیں اور یہودیہ اور سامریہ کی جانب سے ہونے والے دہشت گردانہ حملوں کو روکنے کے لیے اضافی حفاظتی اقدامات کریں۔‘

6. 4 گھنٹے قبلمقبوضہ مغربی کنارے میں اسرائیلی فوجی چوکی پر فائرنگ میں پانچ اہلکار زخمی، آئی ڈی ایف کا دو مبینہ حملہ آوروں کو ہلاک کرنے کا دعویٰ

   اسرائیلی فوج نے جمعہ کے روز دعویٰ کیا ہے کہ اس نے مقبوضہ مغربی کنارے کے شہر الخلیل میں اس کی چوکی پر حملے میں مبینہ طور پر ملوث دو فلسطینیوں کو ہلاک کر دیا ہے۔

   اسرائیلی فوج کے مطابق الخلیل کے علاقے فرش الہوا کے داخلی راستے کے قریب واقع ایک فوجی چوکی پر فائرنگ کے نتیجے میں کم از کم پانچ افراد زخمی ہوئے۔

   طبی ذرائع کے مطابق فائرنگ کے واقعے میں زخمی ہونے والوں میں سے دو کی حالت تشویش ناک ہے۔

   اسرائیلی اخبار ہاریٹز کے مطابق مختصر تعاقب کے بعد اسرائیلی فوج نے حملے میں ملوث ہونے کے شبے میں دو فلسطینیوں کو ہلاک کر دیا۔

   اس واقعے کے بعد اسرائیلی فوج نے الخلیل شہر اور اس کے گرد و نواح کے متعدد دیہات کا محاصرہ کر لیا ہے۔ فوج نے ایک بیان میں کہا کہ ’دو حملہ آوروں کو ہلاک کر دیا گیا ہے‘ جبکہ اسرائیلی دفاعی افواج (آئی ڈی ایف) کے اہلکار علاقے میں تلاشی کی کارروائیاں جاری رکھے ہوئے ہیں۔

7. 4 گھنٹے قبلحالات معمول پر آنے کے بعد تیل کی طلب میں یومیہ 30 لاکھ بیرل اضافہ ہو گا: آرامکو سربراہ

   سعودی عرب کی سرکاری تیل اور گیس کی کمپنی آرامکو کے صدر اور چیف ایگزیکٹو امین ناصر نے پیش گوئی کی ہے کہ خطے میں حالات معمول پر آنے کے بعد تیل کی طلب میں یومیہ تقریباً 30 لاکھ بیرل اضافہ ہو گا۔

   ان کا کہنا ہے کہ اس میں یومیہ 20 لاکھ بیرل اضافی کھپت اور بحران کے دوران مختلف ممالک کی جانب سے استعمال کیے گئے ذخائر کی بحالی کے لیے مزید 10 لاکھ بیرل یومیہ شامل ہوں گے۔

   العربیہ بزنس کو دیے گئے ایک انٹرویو میں امین ناصر کا کہنا ہے کہ خطے میں جنگ سے پیدا ہونے والے بحران کے آغاز سے اب تک تقریباً تین ارب بیرل تیل کی سپلائی متاثر ہوئی ہے۔

   آرامکو کے سربراہ کا کہنا ہے کہ اگر عالمی سٹریٹجک ذخائر سے تیل جاری نہ کیا جاتا، چین کی سمندری راستے سے تیل کی درآمدات میں کمی نہ ہوتی اور ایسٹ-ویسٹ پائپ لائن سپلائی کو برقرار رکھنے میں کردار ادا نہ کرتی تو تیل کی قیمتیں کہیں زیادہ بلند سطح تک پہنچ سکتی تھیں۔

   تیل کی برآمد کے راستوں کے بارے میں ناصر نے کہا کہ آرامکو ایسٹ۔ویسٹ لائن کی استعداد موجودہ 70 لاکھ بیرل یومیہ سے بڑھا کر ایک کروڑ بیرل یومیہ کرنے پر کام کر رہی ہے، جبکہ اضافی برآمدی راستوں کا بھی جائزہ لیا جا رہا ہے۔ انھوں نے بتایا کہ ان منصوبوں پر انجینیئرنگ کا کام بحران کے ابتدائی دنوں ہی میں شروع کر دیا گیا تھا۔

   انھوں نے مزید کہا کہ کمپنی اپنے شراکت داروں کے ساتھ مل کر سعودی عرب سے باہر خاص طور پر اپنی سب سے بڑی منڈی ایشیا میں تیل ذخیرہ کرنے کی صلاحیت کو دوگنا کرنے پر کام کر رہی ہے۔ ان کا کہنا ہے کہ اس کا مقصد سپلائی کو مزید لچک پیدا کرنا اور اسے بہتر بنانا ہے۔

8. 5 گھنٹے قبلامریکی افواج آبنائے ہرمز سے 700 کلومیٹر دور ہیں، ان کے جہاز اس علاقے میں دکھائی نہیں دیتے: پاسدارانِ انقلاب کی بحریہ کے کمانڈر کا دعویٰ

   ایرانی پاسدارانِ انقلاب کی بحریہ کے کمانڈر علی عظمایی نے دعویٰ کیا ہے کہ ’امریکی اب خلیج فارس میں موجود نہیں۔‘

   بی بی سی فارسی کے مطابق ان کا کہنا ہے کہ ’آج امریکی خلیج فارس میں موجود نہیں اور آبنائے ہرمز سے 600 سے 700 کلومیٹر دور ہیں، جبکہ اس علاقے میں ان کے جہاز دکھائی نہیں دیتے۔‘

   علی عظمایی کا مزید کہنا ہے کہ ’آبنائے ہرمز میں اب امریکہ کی کوئی جگہ نہیں رہی۔‘

   یاد رہے کہ گذشتہ روز امریکی صدر ڈونلڈ ٹرمپ نے ایران پر الزام عائد کیا تھا کہ وہ امریکی مڈٹرم انتخابات سے قبل تیل کی قیمتیں بڑھانے کے لیے بارودی سرنگوں کے دھماکوں اور آبنائے ہرمز میں جہازوں پر حملوں کے بارے میں ’جھوٹی خبریں گھڑ‘ رہا ہے۔

   امریکی صدر نے کہا کہ جنگ سے پہلے کے مقابلے میں اب آبنائے ہرمز سے زیادہ تیل گزر رہا ہے، اور اسی وجہ سے ایران تیل کی قیمتیں بڑھانے کے لیے ہر ممکن اقدام کر رہا ہے۔

   آج عالمی منڈی میں برینٹ خام تیل کی فی بیرل قیمت 113 ڈالر سے اوپر چلی گئی جو گذشتہ پانچ ماہ کے دوران اس جنس کی بلند ترین سطح ہے۔

9. 5 گھنٹے قبلامریکہ نے اسرائیل کے فضائی دفاعی نظام پر اپنے ٹیکس دہندگان کے 11 ارب ڈالر خرچ کیے: عباس عراقچی

   ایران کے وزیر خارجہ عباس عراقچی نے دعویٰ کیا ہے کہ امریکہ نے گذشتہ تین برسوں کے دوران اسرائیل کے فضائی دفاعی نظام کے لیے اپنے ٹیکس دہندگان کے 11 ارب ڈالر خرچ کیے ہیں۔

   اُن کا کہنا تھا کہ اسرائیل کے دفاع میں امریکہ نے خود اسرائیل سے بھی زیادہ انٹرسیپٹر میزائل داغے ہیں۔ اُن کے مطابق یہ کوئی باہمی فائدے پر مبنی تعلق نہیں ہے، بلکہ یہ ایک ایسا تعلق ہے جس میں ایک فریق دوسرے پر غیر متناسب حد تک انحصار کرتا ہے۔

10. 6 گھنٹے قبلسعودی عرب پر تازہ حملوں کے بعد برینٹ کروڈ 113.75 ڈالر فی بیرل کی ریکارڈ سطح پر پہنچ گیا

    سعودی عرب میں حوثیوں کے تازہ حملوں اور اس کے نتیجے میں مشرقِ وسطیٰ سے توانائی کی فراہمی میں مزید خلل کے خدشات کے باعث جمعہ کے روز تیل کی قیمتوں میں مزید اضافہ ہوا ہے۔

    برینٹ خام تیل کے فیوچر (مستقبل کے) معاہدوں کی قیمت 0.5 فیصد اضافے کے ساتھ 113.75 ڈالر فی بیرل تک پہنچ گئی ہے جبکہ امریکی ویسٹ ٹیکساس انٹرمیڈیٹ خام تیل کے فیوچر معاہدوں کی قیمت 0.7 فیصد اضافے کے ساتھ 100.13 ڈالر فی بیرل ہو گئی ہے۔

    گذشتہ روز (22 اکتوبر) کو برینٹ خام تیل چار مئی کے بعد سے اپنی بلند ترین سطح پر بند ہوا تھا۔

    یاد رہے کہ تیل تنصیبات پر حالیہ حملوں کے بعد سعودی عرب کی سرکاری تیل کمپنی آرامکو نے جمعرات کو ظہران شہر میں واقع اپنے ہیڈکوارٹر کو ممکنہ خطرے کے پیش نظر خالی کرنے کا حکم دیا تھا۔ خبر رساں ادارے روئٹرز کے مطابق یہ اقدام ایسے وقت میں کیا گیا جب دنیا کے سب سے بڑے خام تیل برآمد کنندہ ملک اور یمن میں قائم حوثیوں کے درمیان لڑائی میں شدت آ گئی۔

    مالیاتی ادارے آئی این جی کے تجزیہ کاروں نے جمعہ کو جاری کیے گئے ایک نوٹ میں کہا کہ تیل و گیس کی منڈیاں خلیج فارس میں کشیدگی کے دوبارہ بڑھنے کے خدشات پر بہت زیادہ فکر مند ہیں، کیونکہ ایسی صورتحال تیل کی سپلائی کو مزید متاثر کر سکتی ہے۔

    تجزیہ کاروں کے مطابق ’کشیدگی میں دوبارہ اور مزید اضافہ اب سب سے زیادہ ممکنہ منظرنامہ دکھائی دیتا ہے۔ یہاں تک کہ اگر حالات مزید خراب نہ بھی ہوں، تب بھی اس امکان کے باعث تیل کی قیمتوں میں جغرافیائی سیاسی خطرات کا نمایاں عنصر شامل رہنے کا امکان ہے۔‘

    حوثیوں اور یمن کی بین الاقوامی سطح پر تسلیم شدہ حکومت کی حمایت کرنے والے سعودی قیادت والے اتحاد کے درمیان جھڑپیں اس وقت سے جاری ہیں جب ایران کے حمایت یافتہ حوثیوں نے بحیرہ احمر کے دہانے پر واقع اہم تجارتی بحری گزرگاہ باب المندب کی جانب پیش قدمی کی ہے۔

    ایکس ایس ڈاٹ کامکے تجزیہ کار لنہ ٹران نے کہا کہ اس وقت نگرانی کے اہم عوامل میں سپلائی میں حقیقی خلل کی شدت اور معمول کی سرگرمیاں بحال کرنے میں درکار وقت شامل ہیں، کیونکہ یہی عناصر طے کریں گے کہ مارکیٹ سپلائی کے خطرات کے عوض کتنا اضافی پریمیم ادا کرنے کے لیے تیار ہے۔

    ان کے بقول ’اگر حملے جاری رہے اور ترسیل میں تاخیر کا سبب بنے، تو بلند قیمتوں کو مزید مضبوط بنیاد حاصل ہو جائے گی۔‘

    دوسری جانب لیبیا میں حمادہ اور تہارہ آئل فیلڈز سے زاویہ بندرگاہ تک جانے والی تیل پائپ لائن کا ایک والو بند کر دیا گیا ہے، جس کے نتیجے میں دونوں فیلڈز میں پیداوار کم ہو گئی ہے۔

11. 7 گھنٹے قبلایران امریکی وسط مدتی انتخابات سے قبل تیل کی قیمتوں میں اضافہ کرنے کی ہر ممکن کوشش کر رہا ہے: صدر ٹرمپ کا الزام

    امریکہ کے صدر ڈونلڈ ٹرمپ نے الزام لگایا ہے کہ ایران امریکی وسط مدتی انتخابات سے قبل تیل کی قیمتوں میں اضافہ کرنے کے لیے ہر ممکن کوشش کر رہا ہے۔

    صدر ٹرمپ نے اپنے سوشل میڈیا پلیٹ فارم ٹروتھ سوشل پر جاری ایک بیان میں کہا ہے کہ ایران ہر ممکن کوشش کر رہا ہے کہ امریکہ میں مڈ ٹرم انتخابات سے قبل تیل کی قیمتیں اوپر چلی جائیں۔

    انھوں نے دعویٰ کیا کہ اس کے لیے ایرانی حکام جعلی حملوں، بارودی سرنگوں اور دیگر واقعات کے دعوے بھی کر رہے ہیں۔

    انھوں مزید دعویٰ کیا کہ آبنائے ہرمز سے اس وقت ایران تنازع کے آغاز سے پہلے کے مقابلے میں زیادہ تیل گزر رہا ہے۔

    یہ بیان ایک ایسے وقت میں سامنے آیا ہے جب پاسدارانِ انقلاب نے دھمکی دی ہے کہ اگر امریکی فوج آبنائے ہرمز میں جہازوں کو سکیورٹی فراہم کرنے کا سلسلہ جاری رکھتی ہے تو مشرقِ وسطیٰ میں موجود امریکی اڈوں کو نشانہ بنایا جا سکتا ہے۔

    پاسدارانِ انقلاب نے اپنی ویب سائٹ ’سپاہ نیوز‘ پر شائع ہونے والے ایک بیان میں کہا ہے کہ ’امریکی فوج کو معلوم ہونا چاہیے کہ اگر وہ اپنی موجودہ راہ چلتے رہے تو تنازع خطے میں موجود اس کے اڈوں تک پھیل جائے گا۔‘

12. 7 گھنٹے قبلیوکرین کا روس پر کلسٹر وار ہیڈز استعمال کرنے کا الزام

    یوکرین کے صدر ولادیمیر زیلنسکی نے روس پر الزام عائد کیا ہے کہ اس نے رات بھر جاری رہنے والے حملوں میں کلسٹر وار ہیڈز استعمال کیے ہیں۔

    یوکرین کی وزارتِ خارجہ کے مطابق کئیو اور دیگر متعدد مقامات پر ہونے والے حملوں میں کم از کم چار افراد ہلاک ہو گئے۔ زیلنسکی کا کہنا ہے کہ پانچ بچوں سمیت 34 افراد بھی زخمی ہوئے ہیں۔

    یہ حملے ایسے وقت میں ہوئے جب روس نے امریکی شہری اسٹیفن ہبارڈ کو رہا کیا، جبکہ امریکی خصوصی ایلچی سٹیو وٹکوف نے روسی صدر ولادیمیر پوتن سے ملاقات کی۔ وٹکوف نے بعد ازاں پوتن کو ’انسان دوست‘ قرار دیا۔

    زیلنسکی نے ایکس پر جاری اپنے بیان میں کہا ہے کہ ’گذشتہ رات روسیوں نے کئیو کے خلاف دیگر ہتھیاروں کے ساتھ کلسٹر وارہیڈز سے لیس تین بیلسٹک میزائل بھی استعمال کیے۔‘

    انھوں نے کہا کہ ان میزائلوں کی خاص بات یہ ہے کہ ہدف کے قریب پہنچ کر فضا میں پھٹتے ہیں اور تقریباً 400 میٹر قطر کے علاقے میں ہر چیز کو نشانہ بناتے ہیں۔

    کلسٹر بموں پر 2008 میں منظور ہونے والے کنونشن آن کلسٹر میونیشنز کے تحت 100 سے زیادہ ممالک پابندی عائد کر چکے ہیں۔ یہ گولہ بارود ایک وسیع علاقے میں چھوٹے بم نما ذرات بکھیرتا ہے، جو شہری علاقوں کو بھی بلاامتیاز نشانہ بنا سکتے ہیں۔

    تاہم روس اور امریکہ دونوں اس کنونشن کے فریق نہیں ہیں۔

13. 7 گھنٹے قبلپاکستان، سعودی عرب اور برطانیہ سمیت سات ممالک کے وزارئے خارجہ کا استنبول میں اجلاس: خطے میں امن کے فروغ کے لیے سفارتی کوششوں کا جائزہ لیا جائے گا، وزارتِ خارجہ

    پاکستان کی وزارتِ خارجہ نے تصدیق کی ہے کہ جمعہ (23 اکتوبر) کے روز ترکی کے شہر استنبول میں سات ممالک کے وزرائے خارجہ کا اجلاس ہو گا۔

    وزارتِ خارجہ کی جانب سے جاری بیان میں کہا گیا ہے کہ ترکی کے وزیرِ خارجہ ہاقان فیدان کی دعوت پر نائب وزیرِاعظم و وزیرِ خارجہ سینیٹر اسحاق ڈار 23 اکتوبر کو استنبول آر فور ممالک (پاکستان، ترکی، سعودی عرب اور مصر) کے وزرائے خارجہ کے اجلاس میں شرکت کریں گے۔

    بیان میں کہا گیا ہے آر فور ممالک کے اجلاس کے بعد ای تھری ممالک جس میں برطانیہ، فرانس اور جرمنی شامل ہیں کی شرکت کے ساتھ آر فور + ای تھری وزرائے خارجہ کا مشترکہ اجلاس منعقد ہو گا۔

    پاکستانی وزارتِ خارجہ کے مطابق اس نوعیت کے فارمیٹ میں سات ممالک کا یہ پہلا اجلاس ہو گا۔

    بیان میں کہا گیا ہے کہ ان اجلاس میں خطے کی اہم پیش رفت پر غور کیا جائے گا۔ اس کے علاوہ مشترکہ چیلنجز سے نمٹنے اور خطے میں امن و استحکام کے فروغ کے لیے مربوط سفارتی حکمتِ عملیوں کا جائزہ لیا جائے گا۔

    وزارتِ خارجہ کا کہنا ہے کہ دورے کے دوران وزیرِ خارجہ اسحاق ڈار اپنے ہم منصبوں سے دوطرفہ ملاقاتیں بھی کریں گے۔

    ’پاکستان کی شرکت تعمیری سفارت کاری، علاقائی تعاون اور تنازعات کے پرامن حل کے لیے اس کے مسلسل عزم کی عکاسی کرتی ہے۔‘

14. 9 گھنٹے قبلتبت میں زلزلے سے کم از کم 16 افراد کی ہلاکت کی اطلاعات: اب تک ہم کیا جانتے ہیں؟

    • مقامی رپورٹس کے مطابق تبت کے دارالحکومت لہاسا کے شمال مشرق میں واقع ناگو کے علاقے میں 7 شدت کا زلزلہ آیا ہے۔ یہ ایک وسیع اور کم آبادی والا پہاڑی خطہ ہے۔
    • چینی سرکاری ذرائع ابلاغ کے مطابق اب تک کم از کم 16 افراد ہلاک اور درجنوں دیگر زخمی ہوئے ہیں۔
    • مقامی حکام کا کہنا ہے کہ متاثرہ علاقے میں سیکڑوں گھر منہدم ہو گئے ہیں۔
    • سڑکوں اور بجلی کی فراہمی منقطع ہو گئی ہے، جبکہ متاثرہ دیہات سطح سمندر سے تقریباً 4,800 میٹر (15,750 فٹ) کی بلندی پر واقع ہیں۔
    • یہ 2023 کے بعد علاقے میں آنے والا سب سے ہلاکت خیز زلزلہ ہے۔ 2023 میں چین کے صوبے گانسو میں 6.2 شدت کے زلزلے کے نتیجے میں 120 افراد ہلاک ہوئے تھے۔
    • سرکاری ذرائع ابلاغ کے ذریعے جاری کیے گئے ایک بیان میں صدر شی جن پنگ کا کہنا ہے کہ ’زلزلے کے نتیجے میں ملبے تلے پھنسے افراد کی تلاش اور انھیں نکالنے کے لیے بھرپور کوششیں کی جائیں، زخمیوں کو طبی امداد فراہم کی جائے اور جانی نقصان کو کم سے کم رکھا جائے۔‘
    • اب تک دستیاب زیادہ تر معلومات چینی سرکاری خبر رساں ادارے شنہوا کی جانب سے مقامی حکام اور ہنگامی خدمات کے حوالے سے جاری کی گئی ہیں۔ تبت کے بارے میں معلومات کے ذرائع محدود ہیں کیونکہ 1950 کی دہائی میں چین کے الحاق کے بعد سے اس علاقے پر سخت حکومتی کنٹرول برقرار ہے۔

15. 9 گھنٹے قبلایلون مسک نے یوکرین کے لیے سٹارلنک کی انٹرنیٹ سروس بحال کر دی ہیں: صدر ٹرمپ

    امریکی صدر ڈونلڈ ٹرمپ کا کہنا ہے کہ ایلون مسک نے یوکرین کے لیے سٹارلنک کی انٹرنیٹ سروس بحال کر دی ہیں۔

    صدر ٹرمپ کا یہ بیان یوکرین کے صدر ولادیمیر زیلنسکی کے اس شکوے کے بعد سامنے آیا تھا کہ فوجی استعمال کے لیے مسک کے سیٹلائٹ پر مبنی سٹارلنک نظام کے ذریعے فراہم کی جانے والی مختص سٹار شیلڈ نیٹ ورک کی کنیکٹیویٹی مکمل طور پر بحال نہیں ہوئی ہے۔

    مسک اس سے قبل اس بات کی تردید کر چکے ہیں کہ سروس کی رفتار میں کمی کے پیچھے ان کا ہاتھ تھا۔ اس کمی سے یوکرین کی روس پر حملوں کے لیے ڈرونز استعمال کرنے اور اپنے دفاع کی صلاحیت متاثر ہوتی ہے۔

    ٹرمپ نے اس رپورٹ پر تبصرہ کرنے سے گریز کیا کہ آیا انھوں نے مسک کو سروس پر عائد پابندیاں اٹھانے کے لیے فون کیا تھا، تاہم اس بارے میں پوچھے جانے پر انھوں نے کہا: ’مختصر بات یہ ہے کہ انھوں نے اسے بحال کر دیا۔‘

    ٹرمپ انتظامیہ اس سے قبل اس بات کی تردید کر چکی ہے کہ اس نے مسک کی کمپنی کو رسائی محدود کرنے کی ہدایت دی تھی۔

16. 23 اکتوبر 2026سعودی فوجی اتحاد کا حوثیوں کی جانب سے داغے گئے دو بیلسٹک میزائل اور ڈرونز مار گرانے کا دعویٰ

    یمن کی بین الاقوامی طور پر تسلیم شدہ حکومت کی مدد کے لیے سعودی عرب کی قیادت میں فوجی اتحاد نے دعویٰ کیا ہے کہ جمعرات اور جمعہ کی درمیانی شب حوثیوں کی جانب سے داغے گئے دو بیلسٹک میزائل اور دو ڈرونز مار گرائے ہیں۔

    سعودی فوجی افحاد کے ترجمان ترکی المالکی کا کہنا ہے کہ حوثیوں کی جانب سے ایک بیلسٹک میزائل نجران جبکہ دوسرا میزائل ریاض کی جانب داغا گیا تھا۔

    ترکی المالکی کا کہنا ہے کہ فضائی دفاعی نظام نے ان میزائلوں کا پتہ لگا کر انھیں تباہ کر دیا۔

    ترجمان کا کہنا ہے کہ اس کے علاوہ حوثیوں کی جانب سعودی عرب کے جنوبی خطوں کی جانب بھیجے گئے دو ڈرونز بھی مار گرائے گئے ہیں۔

    اس سے قبل حوثیوں نے ریاض میں واقع سعودی وزارتِ دفاع کی عمارت، شاہ فہد بین الاقومی ایئرپورٹ، ینبع میں واقع آرامکو کی ایک تنصیب اور ابھا انٹرنیشنل ایئرپورٹ پر حملوں کے دعوے کیے تھے۔

    سوشل میڈیا پلیٹ فارم ایکس پر شائع کیے گئے ایک ویڈیو بیان میں حوثیوں کے فوجی ترجمان یحییٰ سریع نے دعویٰ کیا کہ یہ حملے بیلسٹک میزائلوں اور ڈرونز کے ذریعے کیے گئے اور چاروں اہداف کو براہِ راست نشانہ بنایا گیا۔

    انھوں نے کہا ’مجرم سعودی دشمن نے اپنی جارحیت اور گذشتہ 100 دنوں کے دوران حالیہ کشیدگی کے مرحلے میں ہمارے عزیز وطن میں شہری اہداف کے خلاف 2,900 سے زیادہ فضائی اور میزائل حملے کیے ہیں۔‘

17. 23 اکتوبر 2026حوثیوں کا گذشتہ 48 گھنٹوں میں سعودی عرب پر چار حملے کرنے کا دعویٰ

    حوثیوں کے فوجی ترجمان یحییٰ سریع نے دعویٰ کیا ہے کہ ان کے گروہ نے گذشتہ 48 گھنٹوں کے دوران سعودی عرب کے اندر چار فوجی کارروائیاں کی ہیں، جن میں ریاض میں واقع سعودی وزارتِ دفاع کی عمارت، کنگ فہد بین انٹرنیشنل ایئرپورٹ، ینبع میں واقع آرامکو کی ایک تنصیب اور ابھا انٹرنیشنل ایئرپورٹ پر حملے شامل ہیں۔

    سوشل میڈیا پلیٹ فارم ایکس پر شائع کیے گئے ایک ویڈیو بیان میں سریع نے دعویٰ کیا کہ یہ حملے بیلسٹک میزائلوں اور ڈرونز کے ذریعے کیے گئے اور چاروں اہداف کو براہِ راست نشانہ بنایا گیا۔

    انھوں نے کہا ’مجرم سعودی دشمن نے اپنی جارحیت اور گذشتہ 100 دنوں کے دوران حالیہ کشیدگی کے مرحلے میں ہمارے عزیز وطن میں شہری اہداف کے خلاف 2,900 سے زیادہ فضائی اور میزائل حملے کیے ہیں۔‘

    انہوں نے مزید دعویٰ کیا ’ان حملوں کے ذریعے اس نے درجنوں جرائم کا ارتکاب کیا، جن کے نتیجے میں 562 سے زیادہ افراد ہلاک اور زخمی ہوئے، جن میں اکثریت خواتین اور بچوں کی ہے۔‘

    بی بی سی ان دعوؤں کی آزادانہ طور پر تصدیق نہیں کر سکا ہے۔

    سریع نے کہا کہ حوثی ’اپنے ملک اور عوام کے دفاع میں سعودی عرب کے اندر اپنی کارروائیاں جاری رکھیں گے۔‘

18. 23 اکتوبر 2026گوادر میں ’تعیمراتی کمپنی کے خالی کیمپ‘ پر حملہ ناکام، تین عسکریت پسند ہلاک: وزیر داخلہ کا دعویٰ, محمد کاظم، بی بی سی اردو کوئٹہ

    پاکستان کے وزیر داخلہ محسن نقوی نے دعویٰ کیا ہے کہ سکیورٹی فورسز نے بلوچستان کے ضلع گوادر میں ’تعمیراتی کمپنی کے خالی کیمپ‘ پر حملے کو ناکام بناتے ہوئے تین عسکریت پسندوں کو ہلاک کیا ہے۔

    محسن نقوی کا یہ بیان ایک ایسے وقت میں سامنے آیا ہے جب جمعرات کی شام سے ہی ضلع گوادر سے بے امنی کے واقعات کی اطلاعات گردش کر رہی تھیں۔

    تاہم وفاقی وزیر داخلہ نے اپنے بیان میں اس حملے میں کسی قسم کے جانی یا مالی نقصان کی کوئی تفصیلات نہیں دیں۔

    دوسری جانب بی بی سی اردو کو تین سینیئر سرکاری حکام نے گوادر میں تین مقامات پر نامعلوم مسلح افراد کے حملوں کی تصدیق کی ہے۔

    سرکاری اہلکاروں نے نام ظاہر نہ کرنے کی شرط پر بتایا کہ یہ حملے گوادر شہر کے قریب ایک سرکاری تعمیراتی کمپنی کے کیمپ کے علاوہ سُنٹسر اور ایران کے ساتھ واقع سرحدی علاقے گبد ریمدان 250 بارڈر پر کیے گئے۔

    ان میں سے ایک سینیئر اہلکار نے ان حملوں میں دو افراد کے زخمی ہونے کا بھی دعویٰ کیا ہے، تاہم بی بی سی اردو کسی بھی قسم کے نقصان کی آزادنہ تصدیق نہیں کر سکا ہے۔

    گوادر سے تعلق رکھنے والے ایک شہری محمد عارف نے بی بی سی اردو کو بتایا کہ انھیں گوادر شہر سے شمال میں اندازاً 15 کلومیٹر کے فاصلے پر واقع تعمیراتی کمپنی کے کمپاؤنڈ سے ایک زوردار دھماکے کی آواز سنائی دی تھی۔

    ان کا کہنا تھا کہ وہ اس علاقے سے اچھے خاصے فاصلے پر تھے، لیکن ’دھماکے کی شدت بہت زیادہ ہونے کی وجہ سے یوں لگا جیسے کہ یہ ان کے بالکل قریب ہوا۔‘

    انھوں نے بتایا کہ شہر میں صورتحال معمول کے مطابق رہی کیونکہ سکیورٹی فورسز کی کارروائی کی وجہ سے حملہ آور شہر کی جانب نہیں آسکے۔

    ایک اور شہری نے نام نہ ظاہر کرنے کی شرط پر بتایا کہ ’پہلے ایک زوردار دھماکہ ہوا اور بعد میں چھوٹے دھماکوں کے علاوہ فائرنگ کی آوازیں سنائی دیں اور فائرنگ کا سلسلہ دیر تک جاری رہا۔‘

    انھوں نے بتایا کہ دھماکے کی شدت کی وجہ سے دور واقع گھروں کے شیشے بھی ٹوٹ گئے۔

    خیال رہے 250 بارڈر کے قریب یہ حملہ ایک ایسے موقع پر کیا گیا جب پاکستانی حکام کی جانب سے سرحدی تجارت پر بعض پابندیوں کی وجہ سے گاڑیوں کی ایک بڑی تعداد یہاں موجود تھی۔

    مقامی تاجروں کے مطابق پاکستانی حکام نے گذشتہ سنیچر کو ایران کے ساتھ سرحدی تجارت کے لیے سرحد کو بند کردیا گیا۔ تاہم دو روز بعد سرحد کو ان برآمدات کے لیے کھول دیا گیا جو کہ ترکی اور وسطی ایشائی ریاستوں کے لیے تھیں۔

    تاہم بدھ سے ایران اور پاکستان کے درمیان ان گاڑیوں کو بھی آمدورفت کی اجازت دی گئی، جن میں کھانے پینے کی اشیا موجود تھیں تھیں۔

    درایں اثنا ضلعی انتظامیہ گوادر اور پولیس کی جانب سے جاری کی جانے والی ایک پریس ریلیز میں کہا گیا ہے کہ 250 بارڈر اور گرد و نواح میں امن و امان کی صورتحال قابو میں ہے اور اس حوالے سے سوشل میڈیا پر چلنے والی خبروں میں کوئی صداقت نہیں ہے۔

    بیان کے مطابق سکیورٹی فورسز اور دیگر متعلقہ اداروں نے بروقت اور مؤثر کارروائی کرتے ہوئے صورتحال کو مکمل طور پر کنٹرول میں لے لیا۔

    پریس ریلیز میں عوام سے اپیل کی گئی ہے کہ وہ غیر مصدقہ خبروں اور افواہوں پر کان نہ دھریں اور صرف پولیس اور متعلقہ سرکاری اداروں کی جانب سے جاری کردہ مستند معلومات پر اعتماد کریں۔

19. 23 اکتوبر 2026سعودی عرب نے بحیرۂ احمر میں انڈین شہریوں کو لے جانے والی کشتی کو نشانہ بنایا: حوثیوں کا الزام

    ایران کے حمایت یافتہ حوثی گروہ نے سعودی عرب پر الزام عائد کیا ہے کہ اس نے بحیرۂ احمر میں یمن کے ایک جزیرے کے قریب انڈین شہریوں کو لے جانے والی ایک کشتی کو نشانہ بنایا ہے۔

    حوثیوں کے فوجی ترجمان یحییٰ سریع کا کہنا ہے کہ اس کشتی میں 14 انڈین شہری سوار تھے اور اسے جزیرہ زقر کے قریب نشانہ بنایا گیا۔ حوثیوں کے زیرِ انتظام خبر رساں ادارے سبا نیوز ایجنسی نے 22 اکتوبر کو یہ رپورٹ شائع کی ہے۔

    دوسری جانب ریاض میں انڈین سفارتخانے کا ایک سوشل میڈیا پوسٹ پر کہنا تھا کہ اسے یمن کے ساحل کے قریب ہونے والے واقعے کی اطلاعات موصول ہوئی ہیں اور وہ اس واقعے کے بارے میں مزید تفصیلات معلوم کر رہا ہے۔‘

    سفارتخانے کا مزید کہنا تھا کہ وہ ’انڈین شہریوں کی سلامتی اور خیریت کو یقینی بنانے کے لیے ہر ممکن معاونت فراہم کریں گے۔‘

    حوثیوں کے فوجی ترجمان یحییٰ سریع کہتے ہیں کہ حوثی فورسز کشتی کے مسافروں کو بچانے کی کارروائی میں مصروف ہیں اور مزید تفصیلات بعد میں جاری کی جائیں گی۔

    انھوں نے سعودی عرب کے ’غیر ذمہ دارانہ طرزِ عمل‘ کی مذمت کی اور کہا کہ اس سے بحیرۂ احمر میں بین الاقوامی جہاز رانی کو خطرہ لاحق ہو سکتا ہے۔

    یحییٰ سریع نے بین الاقوامی برادری سے مطالبہ کیا کہ وہ ریاض کے ’عجلت پسند اقدامات‘ کو روکنے کے لیے کردار ادا کرے۔

    رواں برس جولائی سے حوثیوں نے بحیرۂ احمر میں ان جہازوں کے خلاف بحری ناکہ بندی نافذ کر رکھی ہے، جنھیں وہ سعودی عرب سے منسلک قرار دیتے ہیں۔

    گروپ کا کہنا ہے کہ یہ پابندیاں صرف سعودی جہازوں پر لاگو ہوتی ہیں اور آبنائے باب المندب، جو بحیرۂ احمر کا جنوبی دروازہ ہے، بین الاقوامی جہاز رانی کے لیے بدستور کھلی ہوئی ہے۔

20. 23 اکتوبر 2026گذشتہ روز کی اہم خبریں

    • اسرائیلی وزیرِاعظم بنیامین نیتن یاہو نے ان خبروں کو مسترد کر دیا ہے جن میں دعویٰ کیا گیا تھا کہ امریکی صدر ڈونلڈ ٹرمپ نے رواں ماہ ایران پر ممکنہ اسرائیلی حملے کے منصوبے کو روک دیا تھا۔
    • ایرانی فوج کے سربراہ میجر جنرل امیر حاتمی نے کہا ہے کہ ایرانی فوج نے اپنی ڈرون صلاحیتوں کو مزید مضبوط بنایا ہے اور وہ غیر روایتی جنگ کے لیے تیار ہے۔
    • جوائنٹ بیس اینڈریوز پر صحافیوں سے گفتگو کے دوران جب امریکی صدر ڈونلڈ ٹرمپ سے سے پوچھا گیا کہ کیا انھوں نے مذاکرات کا راستہ چھوڑ دیا ہے تو ان کا کہنا تھا کہ ’میرا خیال ہے کہ ہم مذاکرات نہیں کریں گے، لیکن جلد ہی کچھ ہو جائے گا۔‘
    • سعودی عرب کی جنرل اتھارٹی آف سول ایوی ایشن کا کہنا ہے کہ کنگ فہد انٹرنیشنل ایئرپورٹ پر بدھ کی شب ہونے والے حملے میں ہلاک ہونے والوں کی تعداد بڑھ کر دو ہو گئی ہے۔
    • دنیا بھر کی تنظیمیں پی ایچ پی پروگرامنگ لینگویج میں ایک سنگین سائبر سکیورٹی خامی کو دور کرنے کے لیے ہنگامی اقدامات کر رہی ہیں، جو ممکنہ طور پر لاکھوں ویب سائٹس کو متاثر کر سکتی ہے۔