ተወዳዳሪት ወይዘሪት ዓለም ኤርትራ ብኸመይ ልዕሊ 6 ሚልዮን ድምጺ ሓሊፋ

ኣብ ሚስ ዎርልድ 2026 ንኤርትራ ወኪላ እትወዳደር ዘላ ስኒት ሃብተኣብ ተወልደመድህን ኣብቲ ውድድር ሽዱሽተ ሚልዮን ድምጺ ህዝቢ ብምርካብ ካብ ዓለምን ኣፍሪቃን ዝለዓለ ድምጺ ኣመዝጊባ ትመርሕ ኣላ።

እዚ ዓወት እዚ ግን ብልክዕ እንታይ ማለት እዩ፣ ስለምንታይከ ብዙሕ ኣቓልቦ ስሒቡ?

ድምጺ ምርጫ ህዝቢ እንታይ ማለት እዩ?

እቲ ድምጺ ምርጫ፡ ኣብ መላእ ዓለም ዝርከቡ ደገፍቲ ንዝፈትውወን ተወዳደርቲ ድምጾም ክህቡ ዘኽእሎም መስርሕ ህዝባዊ ተሳትፎ እዩ።

ብመሰረት ወግዓዊ መድረኽ ድምጺ፡ ኣብ ምድብ ምርጫ ህዝቢ፡ ተወዳደርቲ ኣብቲ ውድድር ንኽስጉማን ኣብ መንጎ እተን ናይ መወዳእታ ደረጃ ንኽበጽሓን ይሕግዘን።

እቲ ድምጺ ምሃብ ብኢንተርነት ዝካየድ ኮይኑ፡ ካብ ዝተፈላለያ ሃገራት ደገፍቲ ክሳተፉን ብድሕሪ ወከልቶም ኰይኖም ከድምጹን የኽእሎም።

ስለምንታይ'ከ እዩ ውጽኢት ኤርትራ ትርጕም ዘለዎ?

ኣብ ዙርያ ቍጽሪ ድምጺ ስኒት ሃብተኣብ ዘሎ ኣቓልቦ ብዛዕባ ቍጽሪ ጥራይ ኣይኮነን።

ኣብ መላእ ዓለም ዝርከቡ ብድሕሪ ስኒት ኰይኖም ንዝተሰለፉ ኤርትራውያንን ደገፍታን ብሰፊሑ ዘንጸባርቕ እዩ።

ወግዓዊ መድረኽ ድምጺ ወይዘሪት ዓለም ኤርትራ ክሳብ 1 መስከረም ልዕሊ 6.2 ሚልዮን ድምጺ ረኺባ ከምዘላ የርኢ።

እዚ ቝጽሪ እዚ ከኣ ኣብቲ ውድድር ቁንጅና፡ ብድምጺ ህዝቢ ብደረጃ ኣፍሪቃ ትመርሕ ከምዘላ የመልክት።

ሓንቲ ኣብ መድረኽ ኣህጉራዊ ውድድር ስማ ዝለዓል ሃገር፡ ከምዚ ዓይነት ደረጃ ተሳትፎ ምህላው፡ ሓይልን ጥምረትን እቲ ሕብረተሰብን ዲጂታላዊ ጐስጓስን የንጸባርቕ።

ብዙሓት ኤርትራውያን ድማ ብማሕበራዊ ሚድያ ብመገዲ ስኒት ንሃገሮም ከጸውዑ ጽዑቕ ጐስጓስን ምትብባዕን ይገብሩ ኣለው።

ስኒት ሃብተኣብ ንፈለማ እዋን ወይዘሪት ኤርትራ ኣብ ሚስ ዎርልድ ኰይና ትወዳደር ስለዘላ እቲ ዛንታ ተወሳኺ ትርጕም ኣለዎ።

ተሳትፎኣ ጥራይ ንኤርትራ ኣብ ሓደ ካብቶም ኣብ ዓለምና ልዑል ኣፍልጦ ዝረኸቡ ውድድራት ጽባቐን ሰብኣውነትን ሓደ ታሪኻዊ ህሞት እዩ።

ክንዮ እቲ ውድድር፡ ስኒት ከም መምህር፡ መስራቲት ማሕበር ግብረ ሰናይ፡ ከምኡ'ውን ንዅሉ ዝሓቁፍ ትምህርትን ምትእትታው ስንኩላንን ተጣባቒት ኰይና ብዝሰርሓቶ ስራሕ እትፍለጥ።

"ጽባቐ ምስ ዕላማ" ዝብል ጕዕዞኣ፡ ንህጻናትን ስድራቤታትን ብፍላይ ድማ ኦቲዝም ንዘለዎም ዕድላት ኣብ ምስፋሕ ዘተኮረ እዩ።

ክንድዚ ደገፍ ክትረክብ ዝደረኸ ምኽንያት

ብዙሓት ተዓዘብቲ፡ ድሕሪ እቲ ልዕሊ 6 ሚልዮን በጺሑ ዘሎ ድምጺ ህዝቢ ሓያሎ ረቛሒታት ከምዘሎ ይሕብሩ።

ቀዳማይ፡ ኣብ መላእ ዲያስፖራ ዝርከቡ ኤርትራውያን፡ ነቲ ወፍሪ፡ ሃገሮም ኣብ ዓለማዊ መድረኽ ንምርኢት ዝሕግዝ ዕድል ጌሮም ይሰርሕሉ ስለዘለው ክኸውን እንከሎ፡ ጎስጓሳት ማሕበራዊ መራኸቢታት፡ ከምኡ'ውን ዝተዋደደ ናይ ምድማጽ ጻዕርታት፡ ነታ ኤርትራዊት ተወዳዳሪት ኣብቲ ውድድር ከምእትጐልሕ ገይሩዋ ኣሎ።

ካልኣይ፡ ብዙሓት ደገፍቲ ንዓወት ስኒት ከም ምንጪ ሃገራዊ ሓበን ይርእይዎ።

እቲ ውልቀ ተሳትፎኣ፡ ኣብ መላእ ዓለም ዝርከቡ ኤርትራውያን ብድሕሪ'ቲ ናይ ሓባር ዕላማ ክጥርነፉን ንሃገሮም ብዓወት ክጽንብሉን ከም ሓደ ታሪኻዊ ኣጋጣሚ ክርእዩዎ ዕድል ሂብዎም ኣሎ።

6 ሚልዮን ድምጺ ንዓወት ውሕስነት ይህብ ድዩ?

ናይ ግድን ኣይኮነን።

ድምጺ ህዝቢ ኣገዳሲ ኣካል ውድድር ወይዘሪት ዓለም ክኸውን እንከሎ፡ እቲ ሓፈሻዊ ውድድር ብብዙሕ ምድባትን ብድሆታትን እዩ ዝውሰን።

ተወዳደርቲ ኣብ ከም ሰብኣዊ ፕሮጀክትታቶም፣ ህዝባዊ ኣቀራርባ፣ ቃለ መሕትትን ካልኦት ክፋላት ውድድርን ዝኣመሰሉ መዳያት እውን ይግምገማ እየን።

ይዅን እምበር ብድምጺ ህዝቢ ኣብ ቅድሚት ምምራሕ ርኡይ ህዝባዊ ደገፍ ዘርኢ ካልእ ብልጫ እዩ።

ብዙሓት ደገፍቲ፡ እዚ ዓወት፡ ከም ሃገራዊ ኩርዓትን ሓበንን ስለዝርእዩዎ ካብ ውድድር ጽባቐ ንላዕሊ እዩ።

ኤርትራ፡ ብዜጋኣ ስኒት ሃብትኣብ ኣብ ቀዳመይ መድረኽ ውድድር ቍንጅና ዓለም ትሳተፍ ብምህላዋ ንዜጋታት ዝዓበየ ሓበን እዩ።

እቲ ንስኒት ንምድጋፍ ዝካየድ ዘሎ ጐስጓስን ድምጺ ህዝብን ንኤርትራ ኣብ መድረኽ ኣህጉራዊ ውድድራት ዝኣተወትሉ ሓደ ዓቢ ምዕራፍ ኰይኑ ኣሎ።

እቲ እናወሰኸ ዝኸይድ ዘሎ ድምር ድምጺ ህዝቢ ከኣ፡ ኣብ ሓባራዊ ዕላማ ናይ ምትእኽኻብን ምድግጋፍን ዓቕሞም ዘጕልሕ እዩ።

ኣብ መወዳእታ ስኒት ትተዓወት ኣይትተዓወት፡ ድምጺ ህዝቢ ልዕሊ ሽዱሽተ ሚልዮን ምሕላፋ፡ ኣብዚ ዓለማዊ መድረኽ ጽባቐ ቍንጅና 2026 ካብ ዝዝረበሉ ዛንታታት ሓደ ኰይኑ ኣሎ።