சென்னையில் 1,000-க்கும் மேற்பட்ட செவிலியர்கள் போராட்டம்
சென்னை ராஜரத்தினம் மைதானத்தில் நிரந்தர பணி மற்றும் வேலைப் பாதுகாப்பு உள்ளிட்ட கோரிக்கைகளை வலியுறுத்தி, தமிழ்நாடு இடைநிலை சுகாதாரப் பணியாளர்கள் சங்கம் சார்பில் உண்ணாவிரதப் போராட்டம் நடைபெற்றது. 1,000-க்கும் மேற்பட்ட செவிலியர்கள் இந்த போராட்டத்தில் ஈடுபட்டனர்.
முன்னாள் அமைச்சர் மனோ தங்கராஜூம் போராட்டத்துக்கு நேரில் ஆதரவு தெரிவித்திருந்தார்.
போராட்டத்தில் ஈடுபட்ட செவிலியர்கள் மற்றும் போராட்டத்திற்கு சட்ட ஆதரவு வழங்கி வரும் வழக்கறிஞர் வரதராஜன் ஆகியோரை காவல்துறையினர் தடுப்புக் காவலில் எடுத்தனர்.
அரசு தரப்பிலிருந்து கோரிக்கைகள் பரிசீலிக்கப்படும் என உறுதியளிக்கப்பட்டதைத் தொடர்ந்து, செவிலியர்களின் போராட்டம் நவம்பர் 3-ந்தேதி வரை தற்காலிகமாக ஒத்திவைக்கப்பட்டுள்ளதாக தமிழ்நாடு இடைநிலை சுகாதாரப் பணியாளர்கள் சங்கம் தெரிவித்துள்ளது.
கோரிக்கைகள் நிறைவேற்றப்படாவிட்டால், போராட்டம் மேலும் தீவிரப்படுத்தப்படும் என்றும் சுகாதாரப் பணியாளர்கள் சங்கத்தின் சார்பில் தெரிவிக்கப்பட்டுள்ளது.
- இது, பிபிசிக்காக கலெக்டிவ் நியூஸ்ரூம் வெளியீடு
