TOOS, Rai'sul wasaaraha Soomaaliya oo magacaabay hogaamiyaha cusub ee Koonfur galbeed

Tebin toos ah

1. 9 Daqiiqadood ka horTrump oo hadda Khudbad jeedinaya ayaa faahfaahiyay dagaalka Iiraan

   Madaxwayne Trump ayaa hadda jeedinaya khudbad uu kaga hadlayo dagaalka Iiraan.

   waxyaabaha uu ka hadlay waxaa ka mid in Iran ay qarka u saarneyd sameysashada hubka Niyukleerka.

   “Iiraan ma aysan joojin barnaamijkeeda nukliyeerka, waxayna si degdeg ah u horumarinaysay gantaallo masaafo dheer gaari kara,” ayuu yiri Donald Trump. Wuxuu sheegay inay “ku dhowaayeen oo qarka u saarnaayeen” samaynta hub nukliyeer ah.

   Donald Trump wuxuu u mahadceliyay xulafada Maraykanka ee gobolka, oo ay ku jiraan Israa’iil iyo dalalka Khaliijka.

   “Waxay ahaayeen kuwo aad u wanaagsan, mana oggolaan doono in waxyeello loo geysto ama ay fashilmaan si kastaba ha ahaatee,” ayuu yiri.

   Trump wuxuu sidoo kale xusay in Iiraan ay weerartay qaar badan oo ka mid ah dalalkan, wuxuuna sheegay in tani ay muujinayso in aanay waligeed yeelan karin hub nukliyeer ah.

   Trump wuxuu markaas xusay in uu hal bil ka soo wareegay tan iyo bilowgii howlgalka “Operation Epic Fury” ee ka dhanka ah Iiraan uu bilaabmay.

   “Caawa, ciidankii badda ee Iiraan waa la burburiyay, ciidankooda cirka waa uu burburay, hoggaamiyayaashoodii badankoodna… hadda way dhinteen,” ayuu yiri.

   “Caawa waxaan ku faraxsanahay inaan iraahdo in yoolalkii istiraatiijiga ahaa ee aasaasiga ahaa ay ku dhow yihiin in la dhammeeyo,” ayuu yiri.

2. Saacad ka horSidee Iiraaniyiintu u arkaan Khudbadaha Trump ee ku aadan dagaalka?

   Weli aad ayey u adagtahay in lala xiriiro dadka gudaha Iran ku sugan xilli ay jirto go’aan dowladeed oo internet-ka la xiro. Laakiin qaar ayaa ku guuleystay inay xiriirsadaan internet-ka iyagoo adeegsanaya internet-ka dayax-gacmeedka ee Starlink iyo habab kale, inkastoo ay bixiyaan qiimo aad u sareeya.

   Waxaan weydiinay qaar ka mid ah dadka reer Iran sida ay u arkaan khudbadaha uu Donald Trump jeediyo oo ku saabsan “war muhiim ah” oo la xiriira dagaalka Iran.

   “Waxaan u maleynayaa inuu yahay qof aan la saadaalin karin. Ma garanayo waxa aan ka filan karo, waa sida Trump oo kale. Ma rabo inuu dhammaan kaararka uu gacanta ku hayo muujiyo,” ayuu nin 30-jir ah oo ku sugan Tehran ii sheegay.

   “Si daacad ah, waan ka daalay wax walba iyo siyaasiyiinta oo dhan. Waqtigaan, waxay u muuqataa in aan dhammaanteen ku jirno masraxa,” ayay haweeney 20-jir ah oo ku sugan Tehran tiri.

   Qaar ka mid ah dadka Tehran ayaa maqlay xalay duqeymo ka yar kuwii habeenkii ka horeeyay.

   Haweeney kale oo 20-jir ah oo ku sugan Tehran ayaa tiri: “markaan si daacad ah u hadlo, habeenkii xigay waxaan dareemay rajo yar oo ku saabsan in dagaalku dhammaado oo xaaladdu degganaato. Markaas ayaan arkay in Trump laga yaabo inuu bartilmaameedsado kaabayaasha.

   “Markaan daacad u hadlo, waxaan ka daalay hadal noocan oo kale ah oo is burinaya.”

3. Saacad ka horXoghayaha guud ee Nato oo booqan doona Trump toddobaadka soo socda

   Xoghayaha Guud ee NATO, Mark Rutte, ayaa toddobaadka soo socda booqan doona Washington, DC.

   Rutte wuxuu inta uu joogo kula kulmi doonaa Madaxweynaha Mareykanka Donald Trump Aqalka Cad, sida uu xaqiijiyay sarkaal ka tirsan Aqalka Cad oo la hadlay BBC iyo warbaahineed aab bah-wadaagta nahay ee CBS.

   Afhayeen u hadlay isbahaysiga militariga reer Galbeedka ayaa wakaaladda wararka Reuters u sheegay in tani ay tahay “booqasho hore loo qorsheeyay muddo dheer.”

   Si kastaba ha ahaatee, booqashadani waxay imanaysaa kaddib markii Trump si kulul u dhaleeceeyay xulafada Yurub arrinta dagaalka Iran, isla markaana uu ku hanjabay inuu ka bixi karo isbahaysiga militariga ee Mareykanku ka mid yahay aasaasayaashiisa sanadkii 1949.

4. 2 Saacadood ka horMareykanka oo muddo 50 sano ka dib u diray cirbixiyeen hawada sare

   Hawlgalka hawada sare ee Artemis II ayaa ka duulay mar dhaw gobolka Florida ee dalka Maraykanka, isagoo afar cirbixiyeen u diray safar taariikhi ah oo ku wareegaya dayaxa, waana markii ugu horeysay oo bini’aadanku ay ka gudbaan wareega hoose ee dhulka muddo ka badan 50 sano.

   Hawlgalkan oo la bilaabay Arbacadii, ayaa ah tallaabo weyn oo ka mid ah qorshaha hay’adda hawada sare ee Maraykanka ee NASA ay ku doonayso inay bini’aadamka ku celiso dayaxa, ugu dambayntiina cirbixiyeennada loogu diro Mars.

5. 2 Saacadood ka horTrump dib u qiimeyn ku sameyn doona taageerada Mareykanka ee Nato

   Madaxweynaha Mareykanka Donald Trump ayaa “dib u qiimeynaya oo dib u eegaya” ka qaybgalka Mareykanka ee NATO, sida uu sheegay Matthew Whitaker, safiirka Mareykanka ee isbahaysiga amniga.

   Dib u eegistan ayaa saameyn ku yeelan karta taageerada Mareykanka ee Ukraine, ayuu Whitaker sheegay, ka dib markii xulafada NATO — oo u badan dalalka Yurub — ay diideen codsiga madaxweynaha ee ahaa in la diro qalab milatari oo lagu taageero marinka Strait of Hormuz.

   “Waxaan u maleynayaa in hadda ay si cad u muuqato in Madaxweynaha Trump uu dib u eegayo oo dib u qiimeynayo wax walba, ha ahaato ka qaybgalkeena NATO, ama taageerada aan siinayno dadaallada Yurub ee Ukraine,” ayuu ku yiri wareysi uu siiyay NewsNation.

6. 3 Saacadood ka horSuuqa Saamiyada Mareykanka oo sare u soo kacay ka dib hadal uu trump jeediyay

   Ka dib markii Madaxweynaha Mareykanka Donald Trump uu sheegay in Mareykanku “si dhakhso ah uga bixi doono Iran,” suuqa saamiyada Mareykanka ayaa kor u kacay Arbacadii, halka qiimaha shidaalkuna hoos u dhacay.

   Trump ayaa hadalladan jeediyay ka hor khudbaddiisa uu qorsheeyay inuu qaranka u jeediyo isla maalintaas, balse wuxuu u sheegay Reuters in Mareykanku uu dib ugu laaban karo gobolka si uu u fuliyo “weerarro kooban” haddii loo baahdo.

   Suuqa Wall Street ayaa laba maalmood oo xiriir ah kor u kacayay, iyadoo maalgashadayaashu ay saadaalinayaan in dagaalku dhammaan karo, balse qiimaha tamarta ayaa sare u kacayay bishii la soo dhaafay, taasoo keentay walaac ku saabsan sicir-barar caalami ah.

7. 3 Saacadood ka horTrump oo goor-dhaw lagu wado uu jeediyo Khudbad uu Iran uga hadlayo

   Madaxweynaha Mareykanka Donald Trump ayaa jeedin doona khudbad si weyn loo sugayo oo uu kaga hadli doono dagaalka Iran, saacadda 1:00 habeenimo (GMT).

   Madaxweynaha xisbiga Republican Party ayaa sheegay inuu shaacin doono “macluumaad aad u muhiim ah” intii lagu jiro khudbadda.

   Trump wuxuu sharaxay in qayb ka mid ah khudbaddiisu ay ku saabsan tahay muujinta sida uu uga xun yahay NATO, isagoo u arka in isbahaysigu uusan si ku filan u taageerin himilooyinka Mareykanka ee Iran.

   Sarkaal ka tirsan Aqalka Cad ayaa saadaaliyay in Trump uu mar kale xaqiijin doono qorshaha ah in dagaalka Iran lagu soo afjaro muddo u dhaxaysa laba ilaa saddex toddobaad.

8. 4 Saacadood ka horTirada Gantaalada iyo Dronis-ka lala beegsaday Imaaraadka iyo Noolasha shacabka

   Horaantii maanta, Wasaaradda Difaaca ee Imaaraadka Carabta ayaa sheegtay inay qabatay oo burburisay 35 diyaaradood oo drones ah iyo shan gantaal oo ballistic ah oo laga soo tuuray Iran.

   Tirada guud waxay hadda gaartay 2,012 drones, 438 gantaallo ballistic ah, iyo 19 gantaallo cruise ah oo la qabtay tan iyo markii dagaalku bilaabmay.

   Haweeney ku jirta da’da 40-meeyada oo ku nool Dubai ayaa ii sheegtay inay dareento dhismaheeda oo “ruxmaya” marka la qabto weerarrada, isla markaana ay ka baaqatay inay la kulanto saaxiibadeeda muddo bil ah.

   “Maalin kasta waxaan maqlaa dhawaaqyo ama qaraxyo,” ayay tiri. Waxay shalay ku jirtay balakoonka gurigeeda markii ay maqashay qaraxyo xooggan. “Marka qarax dhaco, dhismaha wuu ruxmaa… waxaan si degdeg ah ugu ordaa gudaha sababtoo ah qaraxu aad buu u xooggan yahay.”

   “Waxaan aadaa oo keliya dukaamada,” ayay intaas ku dartay. “Muddo bil ah ma aanan la kulmin saaxiibaday… waxaan ka fogaadaa meelaha bannaan. Hal bil hadda ma aanan aadin kaniisad… sababtoo ah waxaan ka walwalsanahay inaan tareen raaco.”

   Sida uu dhigayo sharciga dambiyada internet-ka ee Imaaraadka, lama oggola in la sawiro, ama la daabaco sawirrada meelaha ay ku dhaceen gantaallada ama drones-ka. Ugu yaraan hal nin oo British ah ayaa lagu soo oogay dacwad la xiriirta duubista gantaallo, halka kuwo kalena la xiray.

9. 4 Saacadood ka horHogaamiya sare oo ka tirsan dowladda Iiran oo dhaawac halis soo gaaray

   Warbaahinta Iran ayaa ku warramaysa in Kamaal Kharrazi, oo ah sarkaal sare oo loo arko inuu yahay isbedel-doon nidaamka siyaasadda Iran, uu si xun ugu dhaawacmay weerar xagga cirka ah oo lagu qaaday Tehran. Xaaskiisa ayaa la sheegay in la dilay.

   Kharrazi, oo hore u soo noqday wasiirka arrimaha dibadda, ayaa sidoo kale ahaa la-taliye u ah hoggaamiyihii sare ee hore Ali Khamenei, kaas oo la dilay saacadihii ugu horreeyay ee dagaalka.

   Madaxweynaha Mareykanka Donald Trump ayaa si joogto ah u tilmaama hoggaanka hadda ee Iran inuu yahay “mid ka macquulsan.

   Weerarkan la soo sheegay ayaa dhalinaya su’aalo ku saabsan sababta loo bartilmaameedsaday Kharrazi, iyadoo nidaamka Iran uu hadda si sii kordheysa ugu jiro gacanta kooxaha mayal adag.

10. 5 Saacadood ka horDegdeg: Rai'sul wasaaraha Soomaaliya oo magacaabay hogaamiyaha cusub ee Koonfur Galbeed

    Ra’iisul Wasaaraha Xukuumadda Federaalka ah ee Soomaaliya, Xamsa Cabdi Barre, ayaa soo saaray wareegto uu ku magacaabay Hogaamiye KMG ah oo hogaamin doona maamulka Koonfur Galbeed.

    Hogaamiyaha kmg ee Koonfur galbeed ayaa waxaa loo magacaabay Jibriil Cabdi rashid Xaaji Cabdi .

    Mr Jibriil ayaa ah rai'sul wasaare ku xigeenka labaad ee doqlada federaalka ee Soomaaliya.

11. 5 Saacadood ka horMadaxda Yurub oo mar kale cadeysay mowqofkooda dagaalka Iiraan

    Hadallada Donald Trump ee ku saabsan damaciisa ah inuu ka baxo NATO ayaa si weyn uga muuqda warbaahinta Yurub, balse hoggaamiyeyaasha siyaasadeed ee qaaradda Yurub badankood waa ay aamusan yihiin.

    Sababta? Sababtoo ah ka bixitaanka Mareykanka ee NATO waxay u noqon lahayd musiibo weyn.

    Inkasta oo quwadaha Yurub, oo ay ku jirto UK, ay dhawaan soo jeediyeen fikradda ah in la abuuro “tiir Yurub” oo ka dhex jira isbahaysiga difaaca—mid ka yar ku tiirsanaanta Mareykanka isla markaana isku filan—xaqiiqadu weli waa in ay si weyn ugu tiirsan yihiin Mareykanka, gaar ahaan dhinacyada sirdoonka, amar-bixinta iyo xakamaynta, iyo difaaca hawada.

    Mareykanka ayaa weli ah xubinta ugu weyn uguna awoodda badan NATO. Dhab ahaantii, hoggaamiyeyaasha Yurub si qarsoodi ah ayay uga rajeynayaan in Trump uusan si dhab ah uga bixin isbahaysiga difaaca.

    Waxay aaminsan yihiin inuu si buuxda u awoodo inuu sidaas sameeyo. Hore ayuu u sameeyay hadallo dhaleeceyn ah oo ku saabsan NATO, inkasta oo uu mararka qaar dib uga noqday cadaadis ama qancin awgeed.

    Laakiin markan, hoggaamiyeyaasha Yurub waxay ku adkeysanayaan mowqifkooda, taasoo ay sidoo kale ku riixayaan natiijooyinka ra’yi ururinta dadweynaha ee dalalkooda, waxayna caddeynayaan in dagaalka Iran uusan ahayn “dagaalkooda oo aysan shaqo ku lahayn” isla markaana aysan doonayn in lagu jiido rabshado.

    Dalalka NATO ee ugu dhow Ruushka, sida dalalka Baltiga, Poland, iyo dalalka Nordic, ayaa si walaac leh u eegaya waxa uu sameyn doono madaxweynaha Mareykanka.

12. 6 Saacadood ka horMadaxwaynaha Iiraan oo Warqad u diray Shacabka Mareykanka

    Warqad uu u diray “dadka Mareykanka”, Madaxweynaha Iran Masoud Pezeshkian ayaa sheegay in Iran “waligeed aysan bilaabin dagaal,” inkastoo uu sheegay inay la kulantay “qabsasho iyo duullaan joogto ah.”

    Daabacaadda warqaddan waxay timid saacado kadib markii Madaxweynaha Mareykanka Donald Trump uu sheegay in “madaxweynaha nidaamka cusub ee Iran” — isagoo aan caddeyn qofka uu ula jeedo — uu Mareykanka ka codsaday xabbad-joojin.

    Qoraal uu ku daabacay baraha bulshada, Trump wuxuu ku sheegay in Mareykanku ka fiirsan doono xabbad-joojin “marka marinka Strait of Hormuz uu furmo, xor noqdo, oo nabdoon noqdo.

    Pezeshkian warqaddiisa kuma xusin wax ku saabsan xabbad-joojin suurtagal ah.

    Wuxuu qoray in dadka Iran aysan wax colaad ah u haynin dadka Mareykanka, Yurub, ama dalalka dariska ah, isagoo ku soo gabagabeeyay in doorashada u dhexeysa “iska hor imaad iyo iskaashi” ay “qaabeyn doonto mustaqbalka jiilasha soo socda.”

13. 6 Saacadood ka horMid ka mid ah madaxda diyaaradaha Yurub oo ka digaya in shidaalkii diyaarada uu hakad galo Yurub

    Wax yar ka hor, Agaasimaha guud ee shirkadda Ryanair, Michael O’Leary, ayaa ka digay in helidda shidaalka diyaaradaha ee Yurub ay carqalad geli karto laga bilaabo bisha May haddii dagaalka Bariga Dhexe sii socdo.

    O’Leary ayaa wareysi uu siiyay Sky News ku sheegay in saameynta dagaalku ay halis gelin karto ilaa 25% shidaalka Ryanair inta u dhaxaysa May iyo June.

    Wuxuu sidoo kale sheegay in ay jirto halis ah in qiimaha tigidhada uu si weyn u kordho inta lagu jiro April, May iyo June haddii colaadda sii socoto, inkastoo qiimaha shidaalka shirkaddu hadda uu weli deggan yahay.

    Ilo dowladeed ayaa u sheegay BBC in dadka u safraya dibadda inta lagu jiro Easter aysan jirin wax walaac ah, isla markaana aan la filayn wax carqalad ah oo ku timaadda shidaalka waqtigan. Waxay sidoo kale intaas ku dareen in warshadaha shidaalka iyo dowladda ay eegayaan saadaasha sahayda lix toddobaad ee soo socda, isla markaana la diyaarinayo qorshayaal kale oo gurmad ah.

14. 6 Saacadood ka horIiraan oo caawa weerar ku qaaday Imaaradka

    Nidaamyada difaaca hawada ee Imaaraadka ayaa goor dhaw ka jawaabaya weerarro gantaallo iyo diyaarado drones ah oo Iran ka soo qaaday, sida ay sheegtay Wasaaradda Difaaca.

    Xafiiska Warbaahinta Dubai ayaa sidoo kale sheegay in nidaamyada difaaca hawada laga hawlgeliyay guud ahaan magaalada Dubai si loo qabto oo loo burburiyo weerarradaas.

15. 6 Saacadood ka horGudoomiyaha baarlamaanka Soomaaliya oo ka hadlay xaaladda Beydhabo

    Guddoomiyaha Golaha Shacabka ee Baarlamaanka Federaalka Soomaaliya Sheekh Aadan Maxamed Nuur (Madoobe) oo ku sugan Beydhabo ayaa faahfaahin ka bixiyay waxyaabihi u qabsoomay tan intii ay Beydhabo la wareegtay dowladda,

    Shir jaraa’id ah ku qabtay Magaaladda Baydhabo ayaa sheegay in kulamo ay la yeeshen dhinacyada kala duwan ee bulshada Beydhabo ku sugan.

    Waxaa uu intaa ku daray in imika ay qorshaynayaa qabashada kulamo dib-u heshiisiin ah ka dib-na doorasho loo gudbo.

    Waxaa uu gudoomiye Adan Madoobe sidoo kale sheegay in ay amreen in ay sii shaqeeyaan maamulkii horey ee jiray iyo hay'adihii dowladda ay sii wataan howshooda.

    Guddoomiyaha Golaha Shacabka ee Baarlamaanka Federaalka Soomaaliya Sheekh Aadan Maxamed Nuur (Madoobe) ayaa sidoo kale ku booriyay wasiiradii dowladdii hore ay xafiiska sii joogaan oo ay sii shaqeeyaan ilaa doorasho ay kak dhacdo oo la helo wasiiradii badali lahaa.

16. 7 Saacadood ka horMareykanka oo sheegay inuu duqeeyay in ka badan 12,300 oo bartilmaameedyo Iran

    Warbixin uu mar dhaw soo saary Mareykanka ayaa lagu sheegay inuu tan iyo intii uu dagaalka bilaabmay la beegsaday in ka badan 12,300 bartilmaameed oo Iran ah, oo ay ku jiraan xarumaha taliska iyo xakamaynta, goobaha gantaallada ballistic-ga, iyo bakhaarro lagu kaydiyo hubka.

    Sidoo kale, in ka badan 155 maraakiib oo ay Iran leedahay ayaa la sheegay in la “waxyeelleeyay ama la burburiyay,” sida uu sheegtay xarunta taliska dhexe ee Mareykanka ee (Centcom).

    Warbixintu waxay sidoo kale xustay noocyada diyaaradaha loo adeegsaday in ka badan 13,000 duulimaadyo dagaal tan iyo markii dagaalku bilaabmay — kuwaas waxaa ka mid ah diyaaradaha dagaalka ee F-22 Raptor iyo F-35 Lightning II, iyo sidoo kale diyaaradaha bambaanooyinka sida B-1 Lancer, B-2 Spirit, iyo B-52 Stratofortress.

17. 7 Saacadood ka horIiraan oo weerartay Garoonka Diyaaradaha caalamiga ee Kuwait

    Ciidamada dabdamiska Kuwait ayaa damiyay dab xoogan oo ka kacay haamaha shidaalka ee garoonka diyaaradaha Kuwait.

    afhayeen u hadlay dowladda ayaa sheegay in aysan jirin wax khasaare ah oo ka dhashay, balse waxaa waxyeelo soo gaartay agab.

    Taangiyadan ayaa waxaa saaka duqeeyay diyaaradaha aan duuliyaha lahayn ee loo yaqaan Drones-ka, iyadoo Iran ay ka aargoosatay weeraro ka dhacay gacanka Khaliijka.

18. 8 Saacadood ka horMilitariga Ingiriska oo Diyaardo aan duuliye lahayn soo riday

    Wasaaradda gaashaandhigga Britain ayaa sheegtay in ciidamada Britain ay xalay soo rideen 10 diyaaradood oo nooca aan duuliyaha lahayn ee Iran ay soo tuurtay.

    Ciidamada lidka diyaardaha ayaa waxay ku garaaceen madaafic diyaradahan oo sida wasaaradu shegtay soo gashay "goob halis ah iyada oo aan faahfaahinin halka ay ku taal goobtaasi.

    Diyaaradaha dagaalka UK, oo ay ku jiraan Typhoons iyo F-35, ayaa sii wada howlgalladooda difaac ee Qubrus, Urdun, Bahrain, Qatar iyo Imaaradka,, ayay intaa ku dartay wasaaradda gaashaandhiga Uk,

19. 8 Saacadood ka horShan qeybood oo uu dagaalka Iiraan ka saameynayo Soomaaliya

    Colaadaha Bariga Dhexe ayaa weli sii xoogaysanaya ka dib markii Maraykanka iyo Israa'iil ay weeraro ballaaran ku qaadeen dalka Iiraan, kuwaas oo lagu dilay hoggaamiyaha sare ee dalkaas 28-kii Febraayo.

    Iiraan ayaa kaga jawaabtay weerarro ay ku qaadday Israa'iil iyo dowladaha xulafada la ah Maraykanka ee Khaliijka.

    Degganaansho la'aanta Bariga Dhexe ayaa sababtay inay saameyn ku yeelato dhaqaalaha caalamka.

    Iiraan ayaa lagu eedeeyay inay weerartay maraakiib marayay Khaliijka, taasoo keentay in si rasmi ah loo xiro Marinka Hormuz—oo ah marin muhiim ah oo ay marto ku dhowaad 20% saliidda caalamka.

    Trump ayaa dib u dhigay hanjabaaddiisii hore ee ahayd inuu weerarayo xarumaha korontada iyo kaabayaasha tamarta ee Iiraan ilaa ay Iiraan furto marinkaas, isagoo cuskanaya wax uu ku tilmaamay wadahadallo "wanaagsan" oo "miro dhal ah". Si kastaba ha ahaatee, Iiraan ayaa dafirtay inay wax wadahadallo ah dhaceen.

    Sii akhri....

20. 1 Abriil 2026War deg deg ah, 'Waa been aan sal iyo raad lahayn': Iran oo u jawaabtay Trump

    Wasaaradda arrimaha dibadda ee Iran ayaa sheegtay in hadalka Madaxweyne Donald Trump ee ah in dalkiisa uu codsaday xabbad joojin ay tahay "been aan lahayn sal iyo raad toona".

    TV-ga qaranka Iran ayaa soo xigtay hadalka sida uu yiri afhayeenka wasaaradda arimaha dibada ee Iran Esmaeil Baqaei.

    Waxay timid ka dib markii Trump uu mar hore ku sheegay boggiisa bulshada in "madaxweynaha maamulka cusub" ee Iran, oo uusan magacaabin, uu codsaday xabbad-joojin, uuna tixgelin doono "marka Hormuz Strait uu furan yahay, xorna yahay".