Coutinho oo heshiis cusub u saxiixay Liverpool

Weeraryahanka Liverpool, Philippe Coutinho, ayaa saxiixay heshiis uu shan sano oo dheeraad ah kula sii joogi doono kooxda Liverpool, kaasoo uu todobaadkii ku qaadanayo lacag dhan £150,000.

Waxa uu noqonayaa laacibka ugu mushaarka badan naadigaasi.

24 jirkan u dhashay Brazil ayaa 2013-kii Liverpool uga soo biiray Inter Milan, asagoo markaa ay kula soo wareegtay £8.5 milyan. Heshiiska cussub ayaa u sahlaya in uu kooxdaasi sii joogo ilaa 2022-ka.

Coutinho ayaa 163 kulan oo uu u saftay Liverpool waxa uu u dhaliyay 34 gool.

"Waa naadi aan aad ugu mahadnaqayo, waana taasi sababta aan ugu faraxsanahay joogitaankiisa," ayuu Coutinho u sheegay barta internet-ka ee Liverpool.

Coutinho ayaa lala xiriirinayay dalab la sheegay in uu ugu yimid kooxda haysata horyaalka Spain ee Barcelona.

Laacibkan ayaa ka mid ah ciyaartooyda laf-dhabarka u ah kooxda ku dheesha garoonka Anfield.

Tababaraha Liverpool, Jurgen Klopp, ayaa rumaysan in heshiiskan uu muhiim u yahay kooxdiisa.