Laacibiinta asal ahaanta Soomaaliga ah ee cayaaraya Koobka Adduunka 2026

Soomaaliya waligeed uma soo bixin Koobka Adduunka, laakiin tartanka sannadkan ka furmay Waqooyiga Ameerika waxaa garoomada dhexdooda ka ciyaari doona laacibiin qaababka kala duwan u sita hiddaha Soomaaliyeed. Inkastoo ay matalayaan dalal kale haddana dhalinyaradda Soomaaliyeed iyo dhamaan bulshada isirka Soomaaliga ahi si un ugu jiro dhiigooda, waxay laacibiintaas ku fiirinayaan indho boholyow walaalnimo wata.

Xulka Qatar waxaa u ciyaaraya sannadkan laba ka mid ah ciyaartoydaas dhiiga Soomaaliyeed ku jiro. Midka koowaad waa Akram Afif, oo ku dhashay caasimadda Dooxa, ayna dhaleen aabbe Soomaali ah iyo hooyo Yamani ah. Afif waa udub-dhexaadka weerarka xulka Qatar oo ay aad ugu tiirsan yihiin.

Waa 29 sano jir, wuxuu waayihiisa ciyaareed ee kooxaha ku qaatay Al Sadd, marka laga reebo xilliyo hore oo uu amaah ugu maqnaa dalalka Spain iyo Belgium. Wuxuu door muhiim ah ka qaatay koobabkii xiriirka ahaa ee xulka Qatar ka guulaystay Koobka Asia, isagoo dhaliyay saddex gool oo rigoorayaal ah kulankii ay 3-1 uga badiyeen Jordan finalkii u dambeeyay bishii Febraayo 2024.

Wuxuu sidoo kale go'aamiyay isreeb-reebkii ay ugu soo baxeen World Cup-ka. Laadkiisii xorta ahaa waxaa madax ku dhaliyay Boualem Khoukhi markii ay socotay ciyaartii ay 2-1 uga badiyeen xulka Isutagga Imaaraadka Carabta bishii Oktoobar ee la soo dhaafay, taas oo ahayd natiijadii Qatar usoo dirtay Koobka Adduunka markii ugu horreysay oo ay ku timaado dadaalkeeda ka dib markii ay martigalin ku heshay ka qeyb-galka koobka adduunka sanadkii 2022.

Ciyaaryahanka labaad waa Yusuf Abdurisag oo isna garabka weerarka uga ciyaaraya Qatar. Wuxuu ku dhashay Soomaaliya, wuxuuna jiraa 26 sano.

Akadeemiyada Al Sadd ayuu kasoo baxay, wuxuuna hadda amaah ku joogaa Al-Wakrah. Waxaa lagu daray liiska 26-ka ciyaartoy ee Qatar ku metelaya tartankan ee uu doortay tababare Julen Lopetegui bilowgii bishii Juun. Wuxuu saftay markii Qatar ay difaacaneysay Koobka Asia, wuxuuna kooxda ugu aaddan yahay abuurista weeraro toos ah oo dhanka midig ah.

Qatar waxay kulankooda ugu horreeya ee Group B kula ciyaari doonaan dalka Switzerland magaalada Santa Clara maalinta Sabtida, ka dibna waxay Canada ku wajihi doonaan magaalada Vancouver iyo Bosnia-Herzegovina oo ay isku arkayaan magaalada Seattle.

Taha Ali ayaa isna kamid ah laacibiinta isirka Soomaaliyeed leh ee cayaaraya Koobka Adduunka. Wuxuu ku dhashay Stockholm, waxaana dhalay waalidiin Soomaali ah, wuxuu lix sano ka hor ciyaarayay kubadda gudaha ee (futsal) loo yaqaano, iyo heerarka hoose ee kubadda cagta.

Wuxuu u soo gudbay kooxaha Sollentuna, Örebro iyo Helsingborg ka hor inta aysan Malmö FF la saxiixan bishii Janaayo 2023, wuxuuna kooxda la qaaday horyaalka Allsvenskan bishii November ee sanadkaas.

Graham Potter ayaa u yeeray 27-jirkan isagoo ku daray xulka Sweden 12-kii May, iyadoo uu kaliya hal kulan u saftay xulka, kaas oo ahaa saaxiibtinimo ay la ciyaareen Estonia bishii Janaayo 2024. Potter ayaa isaga ka doortay labada ciyaartoy ee ka ciyaara La Liga ee Williot Swedberg iyo Roony Bardghji, doorashadaas oo dhalisay falanqayn xoogan oo dhanka saxaafadda Sweden ah.

Taha Ali wuxuu qayb ahaan kaga jawaabay su'aalahaas kulankii saaxiibtinimo ee ugu dambeeyay ee ay la ciyaareen Greece, isagoo beddel ku soo galay si uu gacan uga geysto dhalinta goolka labaad ee Sweden ciyaar ku dhammaatay 2-2.

Mar la weydiiyay waxa ay uga dhigan tahay in loo qaatay Koobka Adduunka, wuxuu yiri; "Waxaan rabaa inaan sameeyo inta karaankayga ah oo dedaal ah."

Sweden waxay u baahatay wareegga isreeb-reebka dheeriga ah (play-offs) si ay u soo gasho wareegga u dambeeya, iyagoo bishii Maarso ka badiyay Ukraine ka dibna Poland. Waxay kulanka ugu horreeya la ciyaari doonaan Tunisia 15-ka Juun.

Laba magac oo kale ayaa aad ugu dhex daafay dhex warbaahinta Soomaalida kuwaas oo isirkooda Soomaalinimo ay u baahan tahay caddeyn sax ah.

Mukhtar Ali, oo ka cayaara khadka dhexe ee akadeemiyada Chelsea, ayna dhaleen waalidiin Soomaali ah sida la sheegay, una ciyaarayay Saudi Arabia tan iyo 2017.

Isagu ma aadayo tartanka: ciyaaryahankan oo ka tirsan Al-Ettifaq laguma darin xulkii ugu dambeeyay ee Saudi Arabia ee la shaaciyay bishan.

Sidoo kale laacibka khadka dhexe ee Tunisia, Anis Ben Slimane ayaa sidoo kale lagu sheegay inuu leeyahay hidde Soomaali ah, laakiin taariikhdiisa nololeed ee la daabacay waxay diiwaangelisay oo kaliya isir Tunisian ah, sheegashadaasna ma aha mid la xaqiijiyay.

Waxaa xusid mudan in tartanka Koobka Adduunka sannadkan uu Soomaalida ugu jiray shakhsi ay hadda dunida badankeed aad uga xumaatay in laga reebay. Waa Cumar Cabdulqaadir Cartan, oo ah garsooraha Soomaaliyeed ee loo doortay wareegga u dambeeya, ahaana garsooraha sanadka ee raga CAF ee 2025, kaas loo diiday inuu galo dalka Mareykanka, wuxuuna seegi doonaa taariikhdii uu ku noqon lahaa markiisii ugu horreysay ee uu ka soo muuqdo Koobka Adduunka.

Guddiga Olombikada Soomaaliya, iyo Xiriirka Kubadda Cagta ee Soomaaliya ayaa si fagaare ah u taageeray garsooraha ka dib go'aankii loogu diiday gelitaanka Mareykanka.

Xulka qaranka Soomaaliya laftiisa wuxuu wax ka dhisayaa dadka qurbajoogta ah ee soo saaray ciyaartoydan. In ka badan kala bar ka mid ah kooxda Ocean Stars ee qaranka Soomaaliya waxay ku dhasheen dibadda, dib-u-dhiska ayaan wali horseedin u-soo-bixitaankii ugu horreeyay ee Koob Adduun ay kaga qeyb-gali lahaayeen.

Inta ay taasi ka dhacayso, ciyaartoyda ku jira xulalka Qatar iyo Sweden ayaa ah kuwa ugu dhow ee kubadda cagta Soomaaliya ku gaari karto masraha ugu weyn dunidan ee lagu soo bandhigo xirfadlayaasha cayaarta loogu jaceylka badan yahay adduunka ee kubadda cagta.