'ස්වාමීනි, මොහු පතෝල කරලක් නෙමෙයි...හොඳ රංගන ශිල්පියෙක්': සුරේෂ් සලේ ගැන දිලීප පීරිස් අධිකරණයේදී කරුණු දක්වයි

පාස්කු ඉරුදින ත්‍රස්ත ප්‍රහාර සිද්ධිය සම්බන්ධයෙන් සිදු කරන විමර්ශනවලට අදාළව අපරාධ පරීක්ෂණ දෙපාර්තමේන්තුව භාරයේ රඳවා සිටින රාජ්‍ය බුද්ධි සේවයේ හිටපු ප්‍රධානී සුරේෂ් සලේ විශේෂඥ මානසික වෛද්‍ය මණ්ඩලයකට ඉදිරිපත් කර වාර්තාවක් කැඳවන ලෙස සෞඛ්‍ය සේවා අධ්‍යක්‍ෂ ජනරාල්වරයාට නියෝගයක් නිකුත් කරන ලෙස කෙරුණු ඉල්ලීම පිළිබඳ නියෝගය ලබන ජූනි 10 වන දා ප්‍රකාශයට පත්කරන බවට කොළඹ කොටුව මහේස්ත්‍රාත් අධිකරණය නියම කර තිබේ.

සුරේෂ් සලේ වෙනුවෙන් ඔහුගේ නීතිඥවරුන් ඉදිරිපත් කළ මෝසමකට අනුව මෙම නඩුකරය අද (ජූනි 04) කොළඹ කොටුව මහේස්ත්‍රාත් පසන් අමරසේන ඉදිරියේ කැඳවනු ලැබිණි.

එහිදී මෝසම පිළිබඳ කරුණු දැක්වූ සුරේෂ් සලේ වෙනුවෙන් පෙනී සිටි ජනාධිපති නීතීඥ ෂවින්ද්‍ර ප්‍රනාන්දු අධිකරණය හමුවේ කරුණු දක්වමින් 2026 වසරේ මාර්තු මස 24 වන දා මෙම අධිකරණයේ පූර්වගාමී මහේස්ත්‍රාත්වරයා අපරාධ පරීක්ෂණ දෙපාර්තමේන්තුවේ රඳවා සිටි සිය සේවාදායකයා පරීක්ෂාවට ලක් කිරීමෙන් අනතුරුව ඔහු පිළිබඳව වෛද්‍ය වාර්තාවක් කැඳවන ලෙස නියෝගයක් නිකුත් කළ බව සඳහන් කළේ ය.

'අත්අඩංගුවට ගන්න කලින් මානසික රෝගී තත්ත්වයක් තිබුණේ නැහැ'

මේ අතර, සැකකාර සුරේෂ් සලේ වෙනුවෙන් පෙනී සිටි ජනාධිපති නීතිඥ ෂවින්ද්‍ර ප්‍රනාන්දු පැවසුවේ, වෛද්‍ය වාර්තාවට අනුව වෛද්‍යවරුන් කිසිදු නිර්දේශයක් ඉදිරිපත් කර නොමැති බව ය.

සැකකරු අධිකරණ මානසික වෛද්‍ය, පෝෂණවේදී, අක්ෂි වෛද්‍ය යනාදී වෛද්‍ය විශේෂඥයින් වෙත ඉදිරිපත් කර තිබෙන බව ද ජනාධිපති නීතිඥවරයා සඳහන් කළේ ය.

"එම වෛද්‍ය මණ්ඩලය ඉදිරිපත් කළ වාර්තාවේ වෛද්‍යවරුන් විසින් කර තිබෙන නිර්දේශ මේ දක්වා ක්‍රියාත්මක වී නෑ. පෝෂණවේදී වෛද්‍යවරයා ඔහුට දිය යුතු ආහාර ලැයිස්තුවක් දීලා තිබෙනවා. විනාඩි 30ක් එළියට දාන්න කියලත් තියෙනවා. ඒවා ක්‍රියාත්මක වෙලා නෑ. ඔහු අත්අඩංගුවට පත්වීමට පෙර මානසික රෝගී තත්ත්වයක් තිබුණේ නෑ. ඔහු දැන් දැඩි මානසික පීඩනය සහ දැඩි සාංකාව වැනි රෝගී තත්ත්වයන්ට ගොදුරු වෙලා තිබෙනවා. එහි ප්‍රතිඵලයක් ලෙස ඔහු සියදිවි නසා ගැනීම වැනි ප්‍රවණතාවකට යොමු වීමේ හැකියාවක් තිබෙන බවත් වෛද්‍යවරු සඳහන් කර තිබෙනවා," යනුවෙන් පැවසීය.

වැඩිදුරටත් කරුණු දැක්වූ ජනාධිපති නීතිඥවරයා "ස්වාමීනි, මේ වෛද්‍ය වාර්තාව අනුව පැහැදිලි යි ඔහු වධහිංසාවට භාජනය වී තිබෙන බව. ඒ වෛද්‍ය වාර්තාවේ ස්ථාන හතක ඒ පිළිබඳව සඳහන් වෙනවා. දැන් ඔහු රඳවාගෙන සිටින ස්ථානය ආරක්ෂිත නොවන බවත් එහි සඳහන් වෙනවා. එම ස්ථානයේ රෝගියාව කළමනාකරණය කිරීමට නොහැකි නිසා ප්‍රතිකාර ලබාදීමටත් හැකියාවක් නැහැ. එහි ප්‍රතිඵලයක් ලෙස සැකකරු සිය දිවි නසා ගැනීමේ සම්භාවිතාව උග්‍ර වී තිබෙන බවත්, වෛද්‍යවරු සිය වාර්තාවේ ප්‍රකාශ කර තිබෙනවා. ස්වාමීනි... මේ අවස්ථාවේ ඔහු සිටිය යුත්තේ අපරාධ පරීක්ෂණ දෙපාර්තමේන්තුවේ නෙවෙයි. රෝහලක තමයි ඔහු සිටිය යුත්තේ. මේක අපේ අදහසක් නෙවෙයි. ස්වාධීන වෛද්‍ය මතයක්," යනුවෙන් සඳහන් කළේ ය.

"ස්වාමීනි... මේ සැකකරු මානසික වෛද්‍ය පරීක්ෂණයේදී සඳහන් කරලා තිබෙනවා, මම ඉන්නේ අඩි හයයි හතරේ කාමරයක කියලා. එතන මීයන්ගෙන් කරදර තිබෙනවා. විදුලි පංකාවක් නෑ. සුදු පාට ඇඳුම් ඇඳගත්ත පිරිසක් ඇවිල්ලා මට ඇඳුම් ඉවත් කරන්න කිව්වා. ඊට පස්සේ සියලු රැඳවියන් ඉදිරිපිට පරීක්ෂාවට ලක් කලා. මට අත් දික් කරන්න කිව්වා. ඉතිරි දේවල් කියන්න ලැජ්ජ යි. මම සතෙක් ද? අවුරුදු තිස් හතක් රාජ්‍ය සේවයේ හිටපු නිලධාරියෙක්. මට නෝට් බුක් එකක් දෙන්නෙ නෑ. විමර්ශන නිලධාරීන් හොඳට සලකනවා. ඒක මට සහනයක්," යනුවෙන් ප්‍රකාශ කර ඇති බවත් පැවසීය.

මෙම පුද්ගලයා අත්අඩංගුවට ගන්නා අවස්ථාවේදී ඔහුට මානසික වශයෙන් රෝගී තත්ත්වයක් නොතිබූ බවත්, වර්තමානයේ ඔහු සිටින්නේ අපරාධ පරීක්‍ෂණ දෙපාර්තමේන්තුව භාරයේ බවත් පෙන්වා දුන් ජනාධිපති නීතිඥවරයා, අපරාධ පරීක්ෂණ දෙපාර්තමේන්තුව භාරයේදී ඔහු ස්ථිර වශයෙන් ම වධහිංසාවලට භාජනය වී ඇති බව මෙම වෛද්‍ය වාර්තාව මගින් පෙනී යන බව ද ජනාධිපති නීතිඥවරයා මෙහිදී අවධාරණය කළේ ය.

මෙම තත්ත්වය යටතේ කෲර වධ හිංසාවට එරෙහි සම්මුති පනත යටතේ විමර්ශන නිලධාරීන්ගේ අත්අඩංගුවේදී යම් පුද්ගලයෙකු වධ හිංසාවලට භාජනය වන අවස්ථාවක එම පුද්ගලයා වෙනත් ස්ථානයක රඳවා තබන ලෙස නියෝග නිකුත් කිරීමට මහේස්ත්‍රාත්වරයෙකුට බලය තිබෙන බවත් ජනාධිපති නීතිඥවරයා අධිකරණය හමුවේ පැවසුවේය.

මෙම තත්ත්වය පොලිස්පතිවරයාට වාර්තා කරන ලෙසත්, පොලිස්පතිවරයා මේ සිද්ධිය පිළිබඳ විමර්ශනය කළ යුතු බවත් පෙන්වා දුන් ජනාධිපති නීතිඥවරයා, ඉන්පසුව නීතිපතිවරයා ස්වාධීනව කරුණු පරීක්ෂා කර බලා හිංසනයට වගකිවයුත්තන්ට එරෙහිව නඩු පැවරිය යුතු බවත් සඳහන් කළේ ය.

කෙසේ වෙතත්, අද නීතිපතිවරයා පෙනී සිටින්නේ අපරාධ පරීක්ෂණ දෙපාර්තමේන්තුව සමග බවත් එය කනගාටුදායක තත්ත්වයක් බවත් ඔහු එහිදී පැවසුවේ ය.

එමනිසා මෙහිදී සාධාරණයක් ඉටු වේ ද යන සැකය මතු වන බවත්, මෙවැනි ක්‍රියා හරහා සමස්ත නීතිපති දෙපාර්තමේන්තුව ම මහජනතාව අතර අපකීර්තියට පත්වන බවත් ඔහු පෙන්වා දුන්නේ ය.

'මොහු පතෝල කරලක් නෙවෙයි. ස්වාමීනි.. මොහු හොඳ රංගන ශිල්පියෙක්'

ඉන් අනතුරුව අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් අධිකරණය හමුවේ කරුණු දක්වමින් කියා සිටියේ සැකකාර සුරේෂ් සලේට පවුලේ සාමාජිකයින් සමග සම්බන්ධ වීමට අවස්ථාව සලසා ඇති අතර, ඔහුට අවශ්‍ය ආහාරපාන සපයා ඇති බව ය.

"ස්වාමීනි...මේ වෛද්‍ය මණ්ඩලය මේ සැකකරු පරීක්ෂා කළේ මැයි මස හතර වෙනි දා. වාර්තාව ඉදිරිපත් කළේ මැයි මස 18 වන දා. මේ සැකකරුව සෑම බදාදා දිනයක ම ඔහුගේ නීතිඥවරු හමුවෙනවා. බිරිඳ සහ දරුවා මුණගැසෙනවා. ඒ වගේ ම සෑම සිකුරාදා දිනක ම ස්ථාවර දුරකතනයෙන් මේ සැකකරුට ඔහුගේ බිරිඳට, දරුවාට සහ මවට කතා කිරීමට අවස්ථාව සලසා දී තිබෙනවා. ඉතින් ජනාධිපති නීතිඥවරයා සඳහන් කරන ආකාරයට මේ සැකකරුට වධ හිංසා කරලා තිබුණා නම් ඔහු ඒ බව ඔවුන්ට ප්‍රකාශ නොකළේ ඇයි? මේක කුමන්ත්‍රණකාරී ලෙස ඉදිරිපත් කළ මෝසමක්. අද සුරේෂ් සලේගේ රිට් පෙත්සම අභියාචනාධිකරණයේ කැඳවනවා. ඒ නිස යි මේ මෝසම ඊයේ ඉදිරිපත් කළේ. මේ හරහා අද දින අභියාචනාධිකරණය ඔවුන්ගේ වේදිකාවක් බවට පත් කරගන්න උත්සහ කරලා තිබෙනවා," යනුවෙන් පැවසීය.

වැඩිදුරටත් කරුණු දැක්වූ අතිරේක සොලිසිටර් ජනරාල්වරයා, "මේ මානසික වෛද්‍ය වාර්තාව සම්පූර්ණයෙන් ම මා ප්‍රතික්ෂේප කරනවා. මේ වාර්තාව දීපු වෛද්‍යවරයාට එරෙහිව අධිකරණ නියෝගයකුත් තියෙනවා. මේ සැකකාර සුරේෂ් සලේ මේ වෛද්‍ය පරීක්ෂණයට මුහුණ දීලා තිබෙන්නේ හඬමින්. ස්වාමීනි මේගොල්ලෝ බුද්ධි අංශ නිලධාරීන්. යුද්දෙට ගිහිල්ලා වෙඩි තියපු අය නෙවෙයි. මේගොල්ලෝ මිනිස්සුන්ගේ මොළ හෝදන කට්ටිය. 2017 - 2019 කාලසීමාව තුළ ස්වයංඝාතක බෝම්බ කරුවන් 08 දෙනෙකු බැලන්ස් කරපු පුද්ගලයෙක් මෙයා. එහෙම පුද්ගලයෙක් හඬයි ද? ස්වාමීනි. මොහු පතෝල කරලක් නෙවෙයි. ස්වාමීනි.. මොහු හොඳ රංගන ශිල්පියෙක්. ඔහුට ඔස්කාර් සම්මානය දෙන්න ඕනෙ. ඔහු වෛද්‍යවරුන්ට ප්‍රකාශ කරලා තිබෙනවා පිරිසක් ඇවිල්ලා ඔහුගේ ඇඳුම් ගලවන්න කිව්වා කියලා. පස්සේ පිරිසක් කකුල්වලට පහර දුන් බවත් ඔහු කියලා තියෙනවා. ඉතුරු ටික කියන්න ලැජ්ජ යි කියලත් සඳහන් කරලා තියෙනවා. ඒත් පහර දුන්නේ කවුද කියලා කියලා නෑ. ඔච්චර දෙයක් කිව්වට පස්සේ තවත් මොනව ද ලැජ්ජ වෙන්න තියෙන්නේ ස්වාමීනි. වෛද්‍ය වාර්තාවේ සඳහන් වනවා ඔහුට කෙටි අමතක වීම් තිබෙන බවට. මේක සාමාන්‍ය තත්වයක්. ඕනෑ ම අපරාධකාරයෙකුට ඒක තියෙනවා. CID අත්අඩංගුවේ ඉන්නකොට එයාලට මතක නෑ. එළියට ආවට පස්සේ මතක තියෙනවා. එනිසා මේවා පිළිගන්න බැහැ," යනුවෙන් පැවසුවේ ය.

එහිදී වැඩිදුරත් කරුණු දැක්වූ අතිරේක සොලිසිටර් ජනරාල්වරයා සුරේෂ් සලේගේ රෝගී තත්ත්වයන් සම්බන්ධයෙන් වෛද්‍ය වාර්තාවේ දක්වා තිබෙන කරුණු පිළිබඳව ද දක්වමින් "ස්වාමීනී.... මේ පුද්ගලයාට අවපීඩනය, කාංසාව වැනි රෝගී තත්ත්වයන් තිබෙන බව වෛද්‍ය වාර්තාවේ සඳහන් කරලා තිබෙනවා. මේවා සාමාන්‍යයෙන් අපරාධකරුවෙකුට තිබෙන රෝගී තත්ත්වයන්. මේක නිර්මාණය කරපු වෛද්‍ය වාර්තාවක්. ඔහුට කිසි ම රෝගයක් නෑ. අත්අඩංගුවේදී ඔහුට එග් රයිස්, බිත්තර රොටි, ෆිශ් ඔයිල්, කිරි පැකට් ,කිරි ටොපි සේරම ලබා දීලා තියෙනවා. ඒවා එකක්වත් කියන්නේ නෑ. මේ වාර්තාව ඉදිරිපත් කළ වෛද්‍යවරයාගේ වාර්තාවක් පිළිගන්න බෑ. මීට පෙර ටිකිරි ජයතිලක විනිසුරුතුමා ඔහුගේ වාර්තාවක් ප්‍රතික්ෂේප කරලා තියෙනවා," යනුවෙන් පැවසීය.

වැඩිදුරටත් කරුණු දැක්වූ අතිරේක සොලිසිටර් ජනරාල්වරයා, "මේ සැකකරු වෛද්‍ය පරීක්ෂණයේදී ප්‍රකාශ කරලා තිබෙනවා "ආයේ මට එතනට යන්න බෑ. මට මැරෙන්න හිතෙනවා" යනාදී වශයෙන්. ස්වාමීනි... මේක සාමාන්‍යයෙන් ඕනෑ ම අපරාධකාරයෙකුට පවතින මානසික තත්ත්වයක්. සියදිවි නසා ගැනීමේ මානසිකත්වයක් එනවා. ඇතැම් අය මේ පුද්ගලයාව සියදවි නසා ගැනීමේ තත්ත්වයට පත් කරන්න උත්සහ කරනවා. අපි ඒකට ඉඩ දෙන්නේ නෑ. අධිකරණයට ඉදිරිපත් කර තිබෙන මේ වෛද්‍ය වාර්තාවේ වෛද්‍යවරු අත්සන් කරලත් නෑ. අධිකරණ වෛද්‍ය නිලධාරියා මේ සැකකරු පරික්ෂාවට ලක් කරලත් නෑ. අධිකරණ වෛද්‍ය නිලධාරියාගේ අත්සනත් නැහැ." යනුවෙන් පැවසූ අතර තමන්ට මෙම වෛද්‍ය වාර්තාව පිළිගත නොහැකි බවත් සෞඛ්‍ය සේවා අධ්‍යක්‍ෂ ජනරාල්වරයා මාර්ගයෙන් නව වෛද්‍ය වාර්තාවක් මෙම සැකකරු සම්බන්ධයෙන් කැඳවීමට නියෝගයක් නිකුත් කරන ලෙසත් අවසානයේදී අධිකරණයෙන් ඉල්ලා සිටියේය.

'සෞඛ්‍ය සේවා අධ්‍යක්ෂ ජෙනරාල්වරයාගේ වාර්තා පිළිගන්න බැහැ'

ඉන් අනතුරුව විත්තිකරු වෙනුවෙන් පෙනී සිටි ජනාධිපති නීතිඥ ශවින්ද්‍ර ප්‍රනාන්දු අධිකරණය හමුවේ කරුණු දක්වමින් සඳහන් කළේ, සෞඛ්‍ය සේවා අධ්‍යක්ෂ ජෙනරාල්වරයා මාර්ගයෙන් කැඳවන වාර්තා තමන්ට පිළිගත නොහැකි බව ය.

"ස්වාමීනී... සෞඛ්‍ය සේවා අධ්‍යක්ෂ ජනරාල්රවයා මාර්ගයෙන් කැඳවන වාර්තාවක් අපට පිළිගන්න බෑ. මොක ද ඔහු දේශපාලන පත්වීමක්. වාර්තාවක් කැඳවනවා නම් අධිකරණ වෛද්‍ය නිලධාරියා මාර්ගයෙන් වාර්තාවක් කැඳවිය යුතුයි. අනික මේ මෝසම පිටුපස කිසිම කුමන්ත්‍රණයක් නැහැ." යනුවෙන් එහිදී ඔහු පැවසුවේය.

ඉන් අනතුරුව පාස්කු ප්‍රහාරයෙන් මිය ගිය සහ වින්දිතයින් බවට පත්වූ පුද්ගලයින් වෙනුවෙන් පෙනී සිටි ජනාධිපති නීතීඥ රියෙන්සි අර්සකුලරත්න අධිකරණය හමුවේ කරුණු දක්වමින් කියා සිටියේ, අද දින අධිකරණය හමුවේ ඉදිරිපත් කර තිබෙන වෛද්‍ය වාර්තාව අධිකරණ වෛද්‍ය නිලධාරියා විසින් ඉදිරිපත් කරන ලද වාර්තාවක් නොවන බව ය.

මෙම පුද්ගලයාට ඇතැයි කියන රෝගී තත්ත්වයන් සාමාන්‍ය අත්අඩංගුවට පත්වන ඕනෑ ම පුද්ගලයෙකුට පවතින මානසික තත්ත්වයක් යැයි පෙන්වා දුන් ජනාධිපති නීතිඥවරයා, මෙම සැකකරු සිදු කර තිබෙන කටයුතු අනුව මෙවැනි තත්ත්වයක් ඇති විය හැකි බව ද සඳහන් කළේය.

සියලු පාර්ශව ඉදිරිපත් කළ කරුණු සලකා බැලූ මහේස්ත්‍රාත්වරයා මෙම නඩුව යළි ලබන 10 වන දා කැඳවීමට නියම කළ අතර එදින මෙම ඉල්ලීම් සම්බන්ධ නියෝගය නිකුත් කරන බව ද පැවසුවේ ය.