Nigeria major political parties timetables for primaries ahead of 2027 general elections

Two major political parties for Nigeria don drop timetable for wen dem dey plan to run dia own primaries ahead of di general elections for 2027.

Di ruling All Progressive Congress (APC) bin release dia revised timetable and schedule of activities wia dem bin adjust timeline wey dem go take do screening, primaries, appeals and related internal party processes.

Dem do dis one for announcement wia dem share di account numbers for pipo wey wan buy expression of interest and nomination forms.

Dem tok say di reasons behind di revision of di timetable na sake of di May Day public holiday.

Meanwhile, di opposition wey don enta many court kasala recently, di African Democratic Congress (ADC) don also drop timetable for dia primary elections dis year.

Inside one statement by di party National Publicity Secretary Bolaji Abdullahi, ADC say di timetable dey reflect di party commitment, internal democracy, orderliness and full compliance wit electoral guidelines.

On di mata on weda dem go fit field any candidates for di next election, dem bin don tok for statement say "legal impediment no dey to our participation for di 2027 elections and any suggestions against dat na move to mislead kontri pipo and kill di morale around our party."

ADC also claim say dem be di "primary opposition platform for Nigeria and we dey take dat responsibility seriously."

ADC timetable for primaries

Sale of nomination forms - May 5 to May 10, 2026

Submission of completed forms - May 11 to May 13, 2026

Screening of aspirants - May 14 to May 15, 2026

Publication of screening results - May 17, 2026

Appeals on results - May 18 and May 19, 2026

Primary elections for State Houses of Assembly, House of Representatives, and Senate seats - May 21, 2026

Govnorship primaries - May 22, 2026

Presidential primaries - May 25, 2026

National Executive Committee meeting - May 26, 2026

Special National Convention - May 27, 2026

APC revised primaries timetable

Sale of forms - May 2 to May 4, 2026

Submission of completed forms and accompanying documents - May 4 to May 5, 2026

Screening of aspirants - May 6 to May 8, 2026

Presidential screening - May 9, 2026

Publication of screening results - May 11, 2026

Screening appeals - May 12 to May 13, 2026

House of Representatives primaries - May 15, 2026

Senate primaries - May 18, 2026

State House of Assembly primaries - May 20, 2026

Govnorship primaries - May 23, 2026

Presidential primaries - May 25, 2026

Dis dey come afta di Independent National Electoral Commission reveal dia timetable for di 2027 general elections.

Di time table give political parties between April 23 and May 30 to conduct dia primaries, and resolve all disputes wey fit come up within dat time.

Election campaigns for presidential and National Assembly elections go start for August 19 while campaigns for govnorship and state House of Assembly go begin on September 9.