Inec release full list of Presidential candidates for Nigeria 2027 election

Di Independent National Electoral Commission (Inec) don release di full list of all di presidential candidates wey dey contest for di 2027 election.

Na Inec secretary, Rose Oriaran-Anthony, bin make di announcement wia she sign di candidate list for Inec portal.

According to di revised timetable, di presidential and National Assembly elections go now hold on January 16, 2027, while di govnorship and state House of Assembly elections go now hold on February 6, 2026.

Di release of i presidential candidate list na in line wit Electoral Act 2026 wey outline all di guidelines for di general elections.

Based on di guidelines of di Electoral Act 2026, parties wey no submit dia candidate names or list no fit contest for di election.

E don dey confam say na 18 presidential candidates and vice from 18 political parties dey contest for di January 2027 election.

According to di list, na only two female presidential candidates go contest- dem be Ada Elizabeth Fredrick Okwori of National Democratic Party (NDP) and Nkem Esther Okereke of National Rescue Movement (NRM).

Di list also get four female vice-presidential candidates - from YPP, LP, DLA and APP.

Howeva, of all di 18 presidential candidates, na Atiku Abubakar of di African Democratic Congress (ADC) be di oldest at 79 years old, followed by Bola Tinubu of di All Progressives Congress (APC) at 74 years old.

Na di vice candidate to Donald Duke of PRP, Rabiu Kabiru be di oldest running mate at 80 years old.

Di presidential and vice candidate - Adebisi Moses Olusoji and Abubakar Nafisat Usaku, of dinewly registered Democratic Leadership Alliance (DLA), na di youngest by age at 35 years.

Since di appointment of Professor Joash Amupitan (SAN) as di new Chairman of di Independent National Electoral Commission (Inec) for October 2025 by di National Council of State, di 2027 election na one of im first general elections.

From Bola Tinubu of di All Progressives Congress (APC) to Peter Obi of di Nigeria Democratic Congress (NDC), Atiku Abubakar of di African Democratic Congress (ADC) and odas - we compile di full list of all di 2027 presidential candidates and dia running mates.

Full list of 2027 presidential candidates and dia running mates

Action Alliance (AA)

Candidate: Rufai Adekunle Omo-Aje

Running mate: Shehu Hussaini

Action Democratic Party (ADP)

Candidate: Abbas-Bin Aliyu

Running mate:Ike Chinazam

Action Peoples Party (APP)

Candidate: Yusuf Kabiru

Running mate: Ofordile Peace Egobia

African Action Congress (AAC)

Candidate: Sowore Omoyele

Running mate: Magashi Haruna Garba

During dia primary election, Omoyele Sowore emerge as di presidential candidate for AAC.

Omoyele Sowore na journalist, human rights activist wey bin don follow contest for Nigeria presidential election.

E don chop plenti arrest and detention ova di years.

Im be di RevolutionNow leader for Nigeria and publisher of Sahara Reporters news platform.

Nigeria govment bin arrest Sowore for August 2, 2019 say im commit treason.

Dem later release am for 5, December afta e spend more dan three months for detention, only to re-arrest am inside court less dan 12 hours later.

On 13 December, 2019, Attorney General of Nigeria and Minister of Justice, Abubakar Malami bin take ova di case of Sowore from di kontri Department of State Services.

According to AAC, na 34,522 registered active members dem get across Nigeria.

African Democratic Congress (ADC)

Candidate: Abubakar Atiku

Running Mate: Amaechi Chibuike Rotimi

Atiku Abubakar na di flagbearer of Africa Democratic Congress (ADC) for di 2027 presidential election.

During di primary, Atiku get total of 1,846,370 votes, to defeat im rivals, former Rivers State govnor Rotimi Amaechi (504,117) and businessman Mohammed Hayatu-Deen (177,120).

Atiku na man wey don tey for politics. Im don attempt to be president several times for different political parties.

Im be former Vice President of Nigeria and PDP Presidential Candidate for 2023 election wia e come second.

2027 go be about di seventh time wey Atiku go seek to become Nigeria president afta e first show interest for 1993 even though e no get im party ticket at di time.

Di Adamawa State-born businessman contest general elections for 2007, 2011, 2019 and 2023 elections.

APC

Tinubu Bola Ahmed

Running mate:Shettima Kashim

Bola Tinubu na di incumbent president of Nigeria under di All Progressives Congress (APC) afta dem declare am winner of di last 2023 presidential election.

Again for 2027 election, APC don announce Tinubu as di winner of di presidential primaries wey make am di party flagbearer.

Oga Tinubu emerge victorious wit total of 10,999,162 votes, while im opponent Stanley Osifo secure 16,503 votes.

Asiwaju Bola Tinubu na former Lagos state govnor, southwest Nigeria.

Di two term govnor of Lagos bin also serve as senator during di brief third republic for Nigeria.

Dis go be im second time to contest di presidential election.

Na im party currently dey for office so dat one make dem di party to beat.

Im vice presidential candidate for 2023 na former Borno State govnor Kashim Shettima.

APM

Makinde Oluseyi Abiodun

Running mate: Musa Lawal Daura

Oyo State Govnor Seyi Makinde become di presidential candidate for Allied Peoples Movement (APM) for 2027 general elections.

Dem announce am during di Presidential Primary Election and Unveiling Ceremony wia party members and stakeholders endorse am as di party presidential candidate for di 2027 general elections.

E become elected Govnor of Oyo State on 10, March 2019, and later re-elected for anoda four years.

Bifor e enta politics, e be engineer and businessman wia e serve as Group Managing Director of Makon Group Nigeria Limited, wey e create.

Makinde say im vision as President of Nigeria na to work to reform national security architecture so dat states no go dey helpless for moments of crisis.

BP

Candidate: Adenuga Sunday

Running mate: Mustapha Usman Turaki

DLA

Candidate: Adebisi Moses Olusoji

Running mate: Abubakar Nafisat Usaku

LP

Candidate: Okereke Sunday Chibuzo

Running mate: Konto Hajja Bintu

NDP

Candidate: Okwori Ada Elizabeth Fredrick

Running mate: Chukwuemeka Uchenna Anthony

NRM

Candidate: Okereke Nkem Esther

Running mate: Sulaiman Nasir Muhammed

Nigeria Democratic Congress (NDC)

Candidate: Obi Peter Gregory

Running mate: Musa Mohammed Rabiu Kwankwaso

Nigeria Democratic Congress (NDC) confam Peter Obi as dia presidential candidate.

Peter Obi na former govnor of Anambra State for southeastern Nigeria wia im get strong record. E also get active support base for social media.

Im be former candidate of di Labour Party for di 2023 general elections wit im vice Yusuf Baba-Ahmed, wey be former senator from Kaduna State.

Dis go be di third time wey di former two-term govnor go dey ontop presidential ticket as e serve as running mate to Atiku Abubakar of di PDP for 2019 elections, and presidential candidate for 2023, and now for anoda party as flagbearer.

Obi first comot Labour Party to join ADC, bifor e later come go NDC.

Obi announce former Kano govnor Rabiu Kwankwaso as im running mate, during di party special convention.

Peoples Democratic Party (PDP)

Candidate: Onor Sandy Ojang

Running mate: Umaru Babangida

For Peoples Democratic Party (PDP), some internal crisis first divide dem into two factions, and di two groups bin nominate presidential candidate each.

Howeva, on Tuesday, 26 May 2027, di PDP faction wey di current Minister of di Federal Capital Territory, Nyesom Wike, dey support, nominate one former senator, Sandy Onor, as dia consensus presidential candidate.

For di event for di PDP national secretariat for Abuja, chairman of dia screening committee, Samuel Ortom, tok say Onor na di outstanding candidate wey dem sure say e go take di party to victory.

Anoda faction say dem wan affirm former president Goodluck Jonathan as dia candidate.

Finally, for di Inec list of Presidential candidate, na Sandy Onor dey confam as PDP flagbearer.

PRP

Candidate: Duke Donald

Running mate: Rabiu Kabiru

Former govnor of Cross River State, Donald Duke, na di presidential candidate of di People's Redemption Party (PRP).

Di primary election bin hold on 27, May 2026, and according to di result announced by di PRP national chairman Hakeem Baba-Ahmed.

Duke gada 6,499 votes to defeat im opponent Kingsley Yakubu, wey only get 2,699 votes.

Social Democratic Party (SDP)

Candidate: Adebayo Adewole Ebenezer

Running mate: Bugaje Usman Muhammed

Nigerian politician and lawyer Adewole Adebayo na di presidential candidate of di Social Democratic Party (SDP) for di 2027 general elections.

Di party bin submit im name give di Independent National Electoral Commission (Inec) as di presidential flagbearer of di party for di election on 9 May.

SDP say for di convention and direct primary election wey dem conduct peacefully and successfully for Abubakar Tafawa Balewa Stadium, Bauchi, Adebayo bin emerge as di sole aspirant and e secure majority support from delegates and party members.

Young Progressives Party (YPP)

Candidate: Agada Peter Ada

Running mate: Key Patience Ndidi

Zenith Labour Party

Candidate: Nwanyanwu Daniel Daberechukwu

Running mate: Hassan Khalid