More dan 30 children die for Pakistan afta school roof collapse
Wia dis foto come from, Getty Images
More dan 34 pipo, including 33 students and one teacher, don die afta di roof of one school collapse for Peshawar, Pakistan, Lady Reading Hospital tok-tok pesin Mohammad Asim tell BBC.
Di hospital tok say 33 pipo don die dead - including 32 children and a teacher - and Naseerullah Khan Babar Memorial Hospital tok say one pikin die for di hospital.
Di tok-tok pesin 19 odas injure, including five pipo wey dey for critical condition.
Asim add say most of di children sustain head injuries.
Fear dey say several children dey trapped under di rubble afta di collapse, wey occur on Thursday morning during lessons.
Many parents don land di hospital, and di hospital administration dey try get police assistance to control the crowd.
According to di tok-tok pesin, di children dey between 6 and 12 years old.
Wetin we know?
Wia dis foto come from, Reuters
Dem alert emergency services go di incident for di private Al-Khair school for Dir Colony at 08:48 (03:48 GMT) on Thursday afta lessons don start, one rescue official tok.
End of Di one wey oda users dey read well well
E tell BBC say di roof of di first-floor classroom bin collapse reach di ground-floor classroom below, wey make di ceiling to cave in as well.
"Di children for di affected classroom bin dey trapped under di debris," di official, Bilal Faizi, tok.
Di school dey located for one building wey dem dey construct on temporary basis, e get two and three-storey portions, according to emergency official Arif Khattak.
Di affected classrooms bin dey di two-storey part of di building, wey no be like say get conventional reinforced concrete roof. Instead, e get prefabricated roofing slabs.
Based on di condition of di debris, e be like say wen di roof of di upper-floor classroom collapse, di falling rubble crash through into di classroom wey dey under, and e bury anoda group of children under di debris.
Wia dis foto come from, Getty Images
Di Al-Khair school dey for one narrow street and na only one vehicle fit pass at a time - dis one mean say e dey difficult for rescue workers to reach di site and transport di pipo wey injure go hospitals.
Peshawar Lady Reading Hospital report say 32 children plus one teacher don die, while Naseerullah Khan Babar Memorial Hospital report one child dead.
One English teacher from one nearby school tok say im immediately rush go di site wit oda local residents wen e begin hear sound of sirens and di sound of ambulances.
Togeda, dem pull out more dan 20 children from di rubble, he said.
"I personally pull out six children wit my own hands. Most of dem bin still dey alive and dey tok. But later we see say dem don pass."
"Plenty blood dey," e tok. "One child say e bin dey lot of pain. Im tongue don dry up for im mouth, [and he e bin dey] ask for water."
Sohail, anoda local resident, tok say im and odas bin try to pull children from under di rubble "using shovels".
Authorities arrest school owner
Di city police chief confam say dem don arrest di school owner, and di govnor of Khyber Pakhtunkhwa don order safety audit of all schools for di province to "identify potential risks and ensure say dem take immediate corrective measures wherever necessary".
"We no fit allow di safety of our children to dey compromised," Governor Faisal Karim Kundi tok.
Four months ago, fourteen children die afta di roof of one private tuition centre near Lahore collapse.
And for August, 14 newborn babies die for fire wey rip through one neonatal unit for one hospital for di capital Islamabad, wey one inquiry discover say lack fire alarms and sprinklers.
