Naidheachdan 11:00m

Daoine gun dachaigh

Tha an àireamh dhaoine as motha riamh ann an Alba a-niste a' fuireach ann an àite-còmhnaidh eadar-amail agus iad gu h-oifigeil gun dachaigh dhaibh fhèin. A rèir an fhiosrachaidh as ùire a nochd an-diugh fhèin, bha còrr air 19,000 teaghlach - no neach - a' faighinn àite-còmhnaidh aig ùghdarrasan ionadail na h-Alba sa Mhàrt, 10% a bharrachd na an-uiridh. Bha an àireamh chùisean de dhaoine gun dachaigh uile gu lèir air èirigh mun aon mheud, suas gu cha mhòr 35,000. Bha an àireamh chloinne ann an àiteachan-fuirich eadar-amail suas cuideachd - gu còrr air 10,700.

Fiachan Riaghaltas na RA

Bha aig Riaghaltas na Rìoghachd Aonaichte ri barrachd airgid na bhathas a' sùileachadh a ghabhail air iasad anns an Lùnastal, agus e aig £18.3bn. Tha sin suas cha mhòr £3bn bhon aon mhìos an-uiridh. Tha e coltach gu bheil teachd-a-steach an riaghaltais fhèin tro chìsean air èirigh, ach tha cuideachd na tha aca ri phàigheadh airson airgead fhaighinn air iasad - an riadh a tha ri phàigheadh air - air fàs. Tha mar a tha an atmhorachd air a bhith ag èirigh cuideachd air cur ri na cosgaisean aca.

Àrd-choinneamh an UN

Bidh am Prìomhaire a' coinneachadh ris a' Cheann-suidhe Trump airson a' chiad uair an-diugh, agus an dithis a' frithealadh àrd-choinneamh nan Dùthchannan Aonaichte. Thuirt Andy Burnham gun robh e airson rudan air am b' urrainn aontachadh a lorg, agus gu bheil an càirdeas eadar an dà dhùthaich cho làidir 's a bha e riamh.

Neo-eisimeileachd

Bidh miann an SNP airson referendum eile air neo-eisimeileachd na h-Alba air a dheasbad aig Holyrood feasgar, ann an deasbad a tha air a chur air adhart leis an riaghaltas fhèin. Tha dùil gum faigh iad taic air a' bhòt air a' ghluasad aca bho Phàrtaidh Uaine na h-Alba, a' ciallachadh gum faigheadh e aonta na pàrlamaid. Tha mar bu chòir an leithid de dh'iarrtas a làimhseachadh le riaghaltas na Rìoghachd Aonaichte air deasbad às ùr adhbharachadh bho chionn ghoirid.

Sgoiltean eileanach

Tha comhairlichean nan Eilean Siar an-diugh a' deasbad am bu chòir cead a thoirt dha ath-sgrùdadh cunbhalach air staid thogalaichean sgoile air feadh na sgìre. Tha mòran de na sgoilean a th' aca meadhanach ùr ach tha feadhainn eile gu math nas sine agus feumach air obair càiridh. Bidh comataidh an fhoghlaim cuideachd a' coimhead ri comharran dheuchainnean sgoilearan nan Eilean Siar air a' bhliadhna-sa. Bha iad sin nas fheàrr aig ìre Nàiseanta 5, agus ann an deuchainnean Sàr-Àrd-Ìre, ach bha comharran sìos airson deuchainnean na h-Àrd-Ìre fhèin.