Ọ na-atọ m ụtọ ma ndị mmadụ kpọọ m onye Igbo - Genoveva Umeh

Aha onyonyo, Ịbụ onye Igbo bụ njirimara m ji eme nganga - Genoveva Umeh
Ọ na-atọ m ụtọ ma ndị mmadụ kpọọ m onye Igbo - Genoveva Umeh
    • Onye dere ya, Chinonso Ugorji
    • Ndị mere akụkọ a, Journalist
    • Onye dere ya, Chinonso Orji Nnachi
    • Ndị mere akụkọ a, Video Journalist
  • Mgbe e biputara ya

Onye na-eme ejije a ma ama bụ Genoveva Umeh ekwuola na ịsụ asụsụ Igbo na-atọ ya nnukwu ụtọ maka na ọ na-echetara ya mgbọrọgwụ ya nakwa njirimara ya.

Genoveva Umeh kpughere nke a oge ya na BBC News Igbo nwere mkparịtaụka.

O kwuru na ọ bụ nne na nna ya kụziiri ya ka e si asụ asụsụ Igbo, dịka o kwukwara na ga-akụziri ụmụ ya asụsụ Igbo ka ha na ndị ọzọ nweeike na-enwe mkparịtaụka nke ọma.

"Nne na nna m na-asụ Igbo nke ọma. Ha na-etinyekwa ilu ma ha na-ekwu okwu. Ụbọchị niile, otu ilu ga-apụtarịrị ha n'ọnụ. Obere ihe ha asị "ngwere amaghị ihe...... narị ikuku".

"Ilu ha na-atụ ka nkụ ma ha na-asụkwa ya nke ọma. Oge m nọ Enugwu, anyị na-asụ Igbo dịka ezinaụlọ, oge anyị gakwara Lọndọn, anyị na-asụ Igbo n'ụlọ. A na-asụkwara m Igbo ma anyị pụọ, ọ bụrụ na ha achọghị ka onye ọzọ nụ ihe anyị na-ekwu. Ọ dịịrị m ezigbo mfe ịsụ ya, ma ọ na-emekwa ka m mata njirimara m nke ọma."

"Ọ bụrụ na m mụta ụmụ, aga m agba ezigbo mbọ ime ka ha mụta asụsụ Igbo, ka ha na mama nnukwu ha na ụmụnne ha ndị ọzọ nweeike na-enwe mkparịtaụka. Ọ na-atọ ụtọ n'obi ma ọ bụrụ na mmadụ ghọta gị oge ị na-ekwu okwu. Igbo m adịchaghị mma mana aga m agba mbọ hụ na ha gara ụlọakwụkwọ ha ga-anọ mụta ya," ka Genoveva Umeh gwara anyị.

Skip Akụkọ ndị ọzọ yiri ya and continue readingAkụkọ ndị ọzọ yiri ya

End of Akụkọ ndị ọzọ yiri ya

Genoveva Umeh kwuru na ya bụ onye Anambara Steeti mana a mụrụ ya n'Enugwu, ọ gaa ụlọakwụkwọ praịmarị na St Cyprain's Primary School nakwa Command Day Primary School. Ọ gụkwara klaasị mbụ nke sekọndịrị n'ụlọakwụkwọ Command Day Secondary School dị n'Enugwu tupu nne na nna ya akpọrọ ya gaa Lọndọn.

Ọ sịrị na ya gụrụ maka iwu na mahadum tupu ọ lọghachi Lagọs ma banye ebe a na-azụ ndị chọrọ ime ejije.

"Mgbe m malitere ime ihe nkiri, nne na nna m sịrị m buru ụzọ gụchaa akwụkwọ maka na ọ bụ ya ga-enyere m aka ịgate aka na ndụ. Ọ bụ ya ka m jiri gaa mahadum, gụọ maka iwu ma were asambodo m nye ha, sịzie ha ka e mesịa. Ka ọ gachara otu izuụka m gụchara akwụkwọ, m lọta Legọs".

"Tupu m mee ejije 'Blood Sisters 1', agara m ọzụzụ n'Ebony Life Creative Academy dị na Legọs. Edebanyere m aha ma banye n'agba nke mbụ," Ka Genoveva Umeh kọọrọ anyị.

O kwuru na ndị kpaliri mmụọ ya ime ejije gụnyere Genevieve Nnaji na Adesua Etomi, ebe ọ ga-amasịkwa ya ka ya na Genevieve Nnaji na Patience Ozokwor mekọọ ejije Igbo.