Me ya sa manyan kwamandojin sojin Amurka ke ajiye aikinsu?

Murabus ɗin Sakataren Rundunar Sojin ƙasa ta Amurka, Dan Driscoll, ya sake tayar da muhawara kan yadda ake tafiyar da harkokin ma'aikatar tsaron ƙasar ta Pentagon.

Kodayake Sakataren Tsaron ƙasar, Pete Hegseth ya kori ko ya sauke manyan jami'an soja da na gwamnati da dama a cikin watannin baya-bayan nan, masu suka sun ce saɓanin ra'ayin da ke fitowa fili yanzu ba wai kawai ya ta'allaka ne kan goyon baya ko adawa da manufofin gwamnati ba.

A maimakon haka, suna cewa saɓanin ya kuma shafi yadda waɗannan jami'ai ke kallon salon jagoranci da kuma yadda Hegseth ke yanke shawara.

Sauye-sauyen sun shafi wasu daga cikin manyan shugabannin rundunonin sojin Amurka.

Daga cikin waɗanda aka sauke akwai:

Murabus ɗin Driscoll ya fi jan hankali saboda yana daga cikin mutanen da Shugaba Donald Trump ya naɗa, sannan kuma na kusa da Mataimakin Shugaban Ƙasa JD Vance.

A baya Fadar White House ta yaba da rawar da ya taka wajen taimakawa aiwatar da wasu manufofin gwamnatin Trump.

Sai dai saɓanin da ya shiga tsakaninsa da Sakataren Tsaro Pete Hegseth ya ƙara tsananta har ya kai ga yanke shawarar yin murabus daga mukaminsa.

To amma mene ne ainihin musabbabin wannan saɓani da ya kai ga raba gari tsakanin mutanen biyu?

Rikicin ƙashin kai ko saɓani a rundunar soji?

Bisa rahotanni daga kafofin yaɗa labarai daban-daban na Amurka, babban abin da ya haddasa saɓani tsakanin Dan Driscoll da Pete Hegseth shi ne salon jagoranci da kuma yadda ake yanke muhimman shawarwari a Ma'aikatar Tsaro ta Amurka.

Rahotannin sun ce Driscoll ya sanar da Shugaba Donald Trump damuwarsa game da wasu matakan da Hegseth ya ɗauka, ciki har da shawarar sauke wasu manyan kwamandojin rundunar sojin ƙasar daga mukamansu.

A cewar kafofin yaɗa labaran, wannan matakin ya fusata Hegseth, lamarin da ya ƙara tsananta saɓanin da ke tsakaninsa da Driscoll.

Sai dai masu sa ido kan harkokin tsaro suna ganin rikicin ba wai tsakanin mutane biyu kawai ya tsaya ba.

A ganinsu, ya kuma bayyana yadda ake samun bambancin ra'ayi kan yadda ya kamata a tafiyar da rundunar sojin Amurka da kuma aiwatar da sauye-sauyen da gwamnatin Trump ke son yi a ma'aikatar tsaro.

Wannan ne ya sa murabus ɗin Driscoll ya zama abin da ya ja hankalin masu nazarin siyasa da harkokin tsaro, domin yana iya nuna irin ƙalubalen da ke tattare da aiwatar da manyan sauye-sauye a ɗaya daga cikin muhimman hukumomin gwamnatin Amurka.

A cewar wasu rahotanni, Driscoll ya yi imanin cewa Hegseth na ci gaba da jinkirta ko kuma rage ƙarfin wasu daga cikin tsare-tsaren gyaran da aka tsara yi a harkokin soji.

Hakan ya ƙara tsananta saɓanin da ke tsakaninsu, lamarin da daga ƙarshe ya bayar da gudunmawa ga shawarar Driscoll ta yin murabus.

Saukarsa daga muƙamin ya sake haifar da tambayoyi kan alƙiblar shugabanci a ma'aikatar tsaron Amurka, Pentagon, da kuma yadda za a ci gaba da aiwatar da sauye-sauyen da ake son yi wa rundunar sojin ƙasar a cikin lokaci mai zuwa.

An kuma ambaci yaƙin da Amurka ke yi da Iran a matsayin wani abu da ya ƙara haifar da saɓani tsakanin shugabannin biyu.

Driscoll da wasu masu suka sun nuna damuwa cewa manyan sauye-sauye a jagorancin rundunar soji yayin da ake gudanar da ayyukan soja na iya kassara ƙarfin rundunar wajen jagoranci, haɗa kai da kuma tafiyar da ayyukanta yadda ya kamata.

A halin da ake ciki, jaridar The Washington Post ta wallafa rahoto da ta bayyana a matsayin "giɓin shugabanci" a wasu sassa na rundunar sojin Amurka.

Rahoton ya kuma ce sauye-sauyen shugabanci da ake yawan yi sun haifar da rashin tabbas da damuwa a tsakanin wasu manyan hafsoshin sojin ƙasar.

Me Hegseth yake nema?

Wasu masu nazari na ganin cewa batun ya wuce saɓanin ra'ayi ko rashin jituwa tsakanin Pete Hegseth da Dan Driscoll kaɗai.

A cewarsu, Sakataren Tsaron Amurka Pete Hegseth na ƙoƙarin ƙarfafa tasirinsa a matakai daban-daban na yanke shawara da tsara manufofi a ma'aikatar tsaron ƙasar, Pentagon.

A wannan mahallin, wasu masu sharhi na kallon sauya kwamandoji da manyan hafsoshin soja a matsayin wani ɓangare na yunƙurin sake fasalin tsarin shugabancin rundunar sojin Amurka, ko da kuwa hakan zai haifar da ficewar wasu manyan jami'ai tare da maye gurbinsu da waɗanda ba su da ƙwarewa irin tasu.

Rahotanni da dama sun kuma nuna cewa, baya ga goyon bayan manufofin gwamnatin Trump, ikon jami'an soja na daidaita kansu da salon jagoranci da hanyoyin aiwatar da manufofin Hegseth na daga cikin muhimman abubuwan da ke tasiri kan makomarsu a Pentagon.

A wannan yanayi, muhawarar da ke ƙara ɗaukar hankali ba ita ce ko manyan hafsoshin soja suna goyon bayan manufofin gwamnati ko a'a ba.

Maimakon haka, tambayar ita ce: zuwa wane matsayi ne za su iya saɓa wa dabaru da shawarwari da abubuwan da Ministan Tsaro ya fifita ba tare da hakan ya jefa mukamansu cikin haɗari ba?

Shin Pentagon na rasa kimarsa ta cin gashin kai?

Tsawon shekaru, gwamnatocin Amurka da suka gabata sun kasance suna dogaro da shawarwari daga ƙwararrun hafsoshin soja da manyan jami'an ma'aikatar tsaro, ko da kuwa waɗannan shawarwarin sun saɓa da ra'ayin shugabannin siyasa.

A ƙarƙashin wannan tsari, ana sa ran kwamandojin soja da masana harkokin tsaro su gabatar da ra'ayoyinsu cikin buɗaɗɗen yanayi da ƙwarewa, ba tare da la'akari da ko Ministan Tsaro ko Shugaban Ƙasa za su ji daɗin waɗannan ra'ayoyin ba.

Da zarar an cimma matsaya ta ƙarshe, ana kuma sa ran dukkan hukumomin tsaro su aiwatar da ita.

Sai dai wasu masu nazari na gargaɗin cewa yawan sauye-sauyen da aka yi wa manyan jami'ai a baya-bayan nan na iya yin barazana ga wannan al'ada.

A cewar waɗannan masu ra'ayi, idan hafsoshin soja da masana harkokin tsaro suka fara jin cewa bayyana ra'ayin da ya saɓa da na shugabannin siyasa na iya jefa muƙamansu cikin haɗari, za su iya ƙin gabatar da ƙimantawa ko shawarwarin da ba su dace da abin da manyansu ke son ji ba.

Masu nazarin sun ce haɗarin irin wannan yanayi shi ne shugabannin siyasa, ciki har da shugaban ƙasa, za su iya rasa samun madadin ra'ayoyi da kuma kimantawa masu zaman kansu da za su taimaka musu wajen auna zaɓuɓɓuka daban-daban kafin su yanke muhimman shawarwarin tsaron ƙasa.

A wannan mahallin ne murabus ɗin Dan Driscoll ya sake haifar da sabbin tambayoyi.

Idan mutum da aka taɓa kallonsa a matsayin abokin siyasa na Donald Trump ya kasa ci gaba da aikinsa, wasu masu nazari na tambayar ko zuwa wane matsayi hafsoshin soja da sauran shugabanni a Pentagon za su iya bayar da ƙwararrun shawarwari da suka saɓa da dabarun Sakataren Tsaro ko manufofin Fadar White House ba tare da fargabar illa ga makomarsu ta aiki ba.