IKIBIRIRAHO, Amerika ntirashira hasi mu bitero vyayo kuri Irani, mu gihe Trump yaburiye uguhora ingabo zishwe

Amakuru y'ikibiriraho

Bernard Bankukira , Gildas Yihundimpundu & Didier Bikorimana

1. Iminota 12 irahezeLiban: Igisirikare catangaje irungikwa ry’abasirikare mu "karere k’igerageza" inyuma y'uko ingabo za Israel zihavuye

   

   Ahavuye isanamu, Reuters

   Igisirikare ca Liban cavuze ko catanguye kurungika abasirikare baco mu "karere k'igerageza" (pilot zone) kari mu bumanuko bw'igihugu, inyuma y'uko ingabo za Israel zihavuye hisunzwe amasezerano ahagarariwe na Reta Zunze Ubumwe za Amerika yashitsweko mu kwezi guheze.

   Mw'itangazo bwasohoye, ubuyobozi bw'igisirikare ca Liban bwavuze ko ku wa kabiri mu gitondo, imirwi y’abasirikare yinjiye mu gace ka Zawtar al-Gharbiyeh gaherereye mu karere ka Nabatieh.

   Ku wa mbere ku mugoroba, igisirikare ca Israel caremeje ko hatanguye gushirwa mu ngiro umugambi w’akarere k’igerageza. Uwo mugambi utegekanya ko ingabo za Israel ziva mu gice gito c'ubutaka bwa Liban zari zarigaruriye mu ntambara na Hezbollah, hamwe no kwaka ibirwanisho uwo muhari ushigikiwe na Iran.

   Ivyo bibaye mu gihe bitegekanijwe ko Perezida wa Amerika Donald Trump abonana na mugenzi we wa Liban, Joseph Aoun, i Washington. Vyitezwe ko Perezida Aoun asaba Trump gutera igitsure Israel kugira ikure ingabo zayo mu bindi bice vyose vyo mu bumanuko bwa Liban, no gufasha igisirikare c’ico gihugu kugira gishobore kugenzura neza uturere Hezbollah ifisemwo ububasha.

   Ku wa mbere, ubushikiranganji bw’imigenderanire bwa Amerika bwatangaje ko “ibikorwa vy'akarere k'igerageza" vyatanguye muri Zawtar al-Gharbiyeh no mu yindi mitumba ibiri ya Liban, ari yo Froun na Srifa, hisunzwe amasezerano y’inyabutatu ahuriweko na Israel, Liban na Amerika.

   Ubwo bushikiranganji bwavuze ko iyo ntambwe “idasanzwe” yavuye mu biganiro vyabaye mu ndwi iheze i Roma, hagati y'abaserukira Israel na Liban.

   Mu nyuma ku wa mbere, umwe mu bategetsi b'igisirikare ca Israel yemeje ko ico gisirikare kizokwigizayo ibirindiro vy’ingabo zaco muri kamwe muri utwo turere tw'igerageza kugira zihe igisirikare ca Liban akaryo ko gukora igikorwa caco.

   Ariko yavuze ko zizobandanya gucungera umutekano w'abasirikare ba IDF no kugumana uburenganzira bwo kwivuna no gukuraho ivyoshobora kubashira mu kaga.

   Izindi nkuru wosoma:

   Ikosa nyamukuru ryatumye haduka intambara ya mbere y'isi n'intambara zo mu Buseruko bwo Hagati

   Kuva ku iyicwa rya Khamenei kugeza ku iterabwoba rya Trump ryo 'gusenya Iran': Ibintu 10 by'ingenzi byabaye mu minsi 100 ya mbere y'intambara

   Ayandi makuru yacu mushobora kuyakurikira kuri YouTube kuri BBC News Gahuza

2. Haciye amasaha 2Ibitero vya Ukraine vyishe abantu icenda mu ri iyi misi ibiri

   

   Ahavuye isanamu, t.me/dsns_telegram

   Buramatari mfatakibanza w’intara wa Belgorod mu Burusiya ihana urubibe n’uburaruko bushira ubuseruko bwa Ukraine, avuga ko abasivire icenda bamaze kwicwa mu bitero vya Ukraine mu misi ibiri iheze.

   Alexander Shuvayev yavuze kandi ko hafi indege zitajamwo abadereva (drones) 200 za Ukraine zarasiwe mu kirere.

   Iri tangazo rije mu gihe Ishirahamwe Mpuzamakungu ONU rivuga ko igitigiri c’abasivire baguye mu ntambara hagati y’Uburusiya na Ukraine caduze ku rugero rurenga ica gatatu mu gice ca mbere c’uyu mwaka.

   Umukuru w’ubutumwa bwa ONU bukurikirana ivy’uburenganzira bwa muntu muri Ukraine avuga ko baharuye abasivire barenga 1.400 bo mu bihugu vyompi, Uburusiya na Ukraine, bapfuye.

   Hagati aho, impande zompi zirabandanya ziterana ibisasu, aho igisirikare ca Ukraine kirwanira mu kirere kivuga ko mw’ijoro ryakeye Uburusiya bwateye ico gihugu bukoresheje amadrone 58, 46 muri yo arasirwa mu kirere. Ni inyuma y’uko ubushkiiranganji bw’Uburusiya bujejwe kwivuna abansi butangaje ko bwakoroye amadrone 209 ya Ukraine mw’ijoro ryakeye.

3. Haciye amasaha 3CBS: Pentagon ivuga ko ingabo za Amerika hafi 100 zakomerekeye mu bitero vya Irani mu ndwi zibiri ziheze

   

   Ahavuye isanamu, US Central Command

   Abategetsi ba Reta Zunze Ubumwe za Amerika babwiye imboneshakure CBS News ko abasirikare b’Abanyamerika bashika kw’ijana100 bakomerekeye mu bitero vy’indege vyakozwe na Irani ku birindiro vya gisirikare vya Amerika mu Buseruko bwo Hagati muri uku kwezi.

   Sean Parnell, umuvugizi w’ubushikiranganji bwa Amerika bujejwe kwivuna abansi (Pentagon), yemeje ayo makuru mw’itangazo yahaye CBS News, ikimenyeshamakuru gikorana na BBC muri Amerika.

   Yavuze ko gushika ku wa 7 Mukakaro (7) 2026, abantu bashika ku 100 bari bamaze gukomereka ku rugero rutandukanye, ariko ko 96% muri bo basubiye mu bikorwa.

   Yagize ati: "Barerekanye ishaka ryo gusubira ku rugamba. Kuri benshi kwabaye uguhungabana gutoya mu mutwe”.

   Aya makuru aje mu gihe icuka kibi hagati ya Amerika na Irani kibandanya ciyongera inyuma y’ugusenyuka kw’amasezerano yo guhagarika intambara yamaze igihe gito.

   Igisirikare ca Amerika kimaze imisi 10 kidasiba kurekurira kuri Irani ibibombe ijoro ku rindi, kivuga ko intumbero y’ibi bitero ari ukurondera guhasha Irani kugira ngo ntibandanye n’ibitero vyayo ku mato y’ubudandaji aca mu Muhora wa Hormuz.

   Ku ruhande rwayo, Irani yihorera ku bihugu bibanyi muri ako karere, mu gukora ibitero ku bigo vya Amerika biri mu bihugu nka Yorodaniya, Koweit na Bahrain.

   Ayandi makuru:

   Kuva ku iyicwa rya Khamenei kugeza ku iterabwoba rya Trump ryo 'gusenya Iran': Ibintu 10 by'ingenzi byabaye mu minsi 100 ya mbere y'intambara

   Trump avuga ko adashobora kwemerera Irani ko 'itera ubwoba' Amerika

   Ayandi makuru yacu mushobora kuyakurikira kuri: YouTube kuri BBC News Gahuza

4. Haciye amasaha 5Amerika iriyamiriza Ubushinwa bwagirizwa gukomeretsa umusare wa Philippines

   

   Reta Zunze Ubumwe za Amerika zateye ivyatsi Ubushinwa, zibwagiriza ko bwakomerekeje umusare (uwutwara ubwato) wa Philippines yari mu bwato mu karere gateye impari mu Kiyaga c’Ubushinwa bw’Ubumanuko (South China Sea). Itangazo rya Amerika rivuga ko ivyakozwe n’Ubushinwa ari bibi kandi ko ari agasotoro.

   Igisirikare ca Philippines cagirije ingabo z’Ubushinwa zijejwe umutekano w’ikiyaga ko zakubise inkoni mu mutwe uno musare ku wa Mungu, igihe zegereza ubwato bw’igisirikare ca Philippines mu bikorwa vyo gucungera umutekano.

   Ubushinwa buvuga ko ico gihugu ari co casomborokeje imishamirano mu gutera umukozi wo mu ngabo z’Ubushinwa zijejwe umutekano w’ikiyaga.

   Pékin/Beijing (Ubutegetsi bw’Ubushinwa) yaciye itumako uwuserukira Philippines mu Bushinwa kuri iyi mishamirano yabaye ejo ku wa mbere.

   Harakunze kuba imishamirano hagati y’Ubushinwa na Philippines muri ako karere buri ruhande rwiyitirira. Ubushinwa buvuga ko ico gice c’ikiyaga hafi cose ari icabwo.

   Umushikiranganji wa Amerika ajejwe imigenderanire n’ayandi makungu, Marco Rubio, ari i Manille/Manila (umugwa mukuru wa Philippines) aho yagiye mu nama y’abashikiranganji bajejwe imigenderanire mw’ishirahamwe ry’ibihugu vyo mu Bumanuko bushira Ubuseruko bwa Aziya (ASEAN).

   Avuga ko yiteguriye guhura na mugenzi we w’Ubushinwa, Wang Yi, hampande y’ino nama.

   Ayandi makuru ushobora gusoma:

   Kubera iki Ubushinwa bugenda bwongereza ibirwanisho vya nikleyere?

   Menya ibihugu bitanu bishobora kuzoba biganza isi mu 2050

5. Haciye amasaha 6Ubwato bw'intambara bw'Uburusiya bwagize imyimenyerezo yo kurasa hafi y'inkombe y’igisagara ca Plymouth c’Ubwongereza

   

   Ahavuye isanamu, Getty Images

   Ubwato bw'intambara bw'Uburusiya bwakurikiranywe n'ubw'igisirikare kirwanira mu mazi c'Ubwongereza (Royal Navy), bwaragize ejo ku wa mbere imyimenyerezo yo kurasa vya muzinga, ku birometero bishika 74 mu bumanuko bwa Plymouth, igisagara c’Ubwongereza.

   Umuvugizi w’ubushikiranganji bw’Ubwongereza bujejwe kwivuna abansi avuga ko igisirikare cabwo kirwanira mu mazi cakurikiranye iyi myimenyerezo kandi ko kibandanya "gukurikiranira hagufi ibikorwa vy'ubwo bwato".

   Ubwo bwato bw'Uburusiya buzwi nka Neustrashimy bwakurikiranywe kandi n'indege y'igisirikare c'Ubufaransa. Mbere, iyo ndege yaravuganye n'ubwo bwato biciye ku maradiyo y’itumatumanako ibusaba gusigura imigambi yabwo, nk'uko BBC yabimenyeshejwe.

   BBC yahawe amakuru ko imbere y'uko ubwo bwato bw'Uburusiya butangura kurasa, bwari bwabwiye ubw'igisirikare c’Ubwongereza bucungera inkengera, HMS Tyne, ko hagiye kuba imyimenyerezo yo kurasa.

   Ubwo bwato bw'Uburusiya bwasavye HMS Tyne kwigira kure hashobora kuba hatekanye kurushiriza, kandi buno bwato bwaravyubahirije.

   Iyi myimenyerezo yo kurasa y'Uburusiya yabereye mu mazi mpuzamakungu kandi yamaze iminota 30.

   Ibi bibaye mu gihe umushikiranganji wa mbere mushasha w’Ubwongereza yaraye ashikirijwe amabanga.

   Mu kwezi guheze, abakomando b’igisirikare c’Ubwongereza kirwanira mu mazi baruriye ubwato bw'igitoro bw'Uburusiya bukorera mu kinywabi mu Muhora w’Ubwongereza (English Channel), mu gikorwa camaze amasaha atandatu, bukaba bwari bwo bwa mbere ingabo z'Ubwongereza zikoze ikintu nk’ico.

   Muri Ruheshi (6) kandi, umugabo n'umugore b'Abongereza bari mu mazi mpuzamakungu muri English Channel bahuye n'ubwato bw'intambara bw'Uburusiya bwitwa Admiral Grigorovich, buri ku birometero 37uvuye kw’izinga rya Isle of Wight.

   Ubwo bwato bwarashe amasasu yo kugabisha igihe Jane na Alan Kelvey bariko bagendesha ubwato bwabo bwo kwinezereza (yacht) mu co ubushikiranganji bw'Uburusiya bujejwe kwivuna abansi bwavuze ko ryari "isugereza riteye akaga", ariko bobo bakaba bavuze ko batari mu nzira yari gutuma bagongana n'ubwo bwato.

   Amato y’intambara y’Uburusiya arakunze kuboneka aca mu mazi mpuzamakungu muri uwo muhora, ariko mu ruhande rw’amazi ategukira Ubwongereza canke Ubufaransa.

   Ayandi makuru:

   Ibihugu vyo muri OTAN vyatangaje umugambi mushasha w'ama misire wa miriyaridi 50 z'amadorari

   Putin yasezeranyije ko nta zindi ntambara zizabaho niba Uburengerazuba bwubashye Uburusiya

   Ayandi makuru yacu mushobora kuyakurikira kuri: YouTube kuri BBC News Gahuza

6. Haciye amasaha 8Amerika ntirashira hasi mu bitero vyayo kuri Irani, mu gihe Trump yaburiye uguhora ingabo zishwe

   

   Ahavuye isanamu, US Central Command / X

   Mw’ijoro rigira cumi ubudasiba, igisirikare ca Amerika kivuga ko cagavye ibindi bitero kuri Irani, kikavuga ko ari uguhasha iki gihugu kugira ngo gihebe gutera amato aca muri wa Muhora wa Hormuz.

   Ibi bitero vyabaye inyuma y’aho Perezida Donald Trump wa Reta Zunze Ubumwe za Amerika ahigiye Irani ko azotegerezwa guhora urupfu rw’abasirikare ba Amerika.

   Mu kwihora, Irani ivuga ko yaciye irasa amato abiri atwara igitoro muri iyo nzira yo mu mazi, hamwe no ku bigo vya gisirikare vya Amerika muri Bahrain na Koweit, nk’uko bitangazwa n’itororokanirizo ry’amakuru rya reta IRNA. Perezida Masoud Pezeshkian avuga ko ubu Irani iri mu “ntambara yuzuye” na Amerika.

   Ubuyobozi bw’igisirikare ca Amerika mu karere (Centcom) bwanditse kuri X ko ivyo bitero bishasha vyagabwe ku “bigo vy’ubuyobozi bwa gisirikare, ibigo vy’ingabo zirwanira mu mazi, ibibanza birasiramwo ibisasu vya misire be n’ibirungikirwako za ndege zitajamwo abadereva [drone], hamwe ibigo vy’ingabo zirwanira mu kirere” vya Irani.

   Centcom ivuga kandi ko amato y’ubudandaji yabandanije ingendo mu Muhora wa Hormuz.

   Hagati aho, ikigo c’Ubwongereza kijejwe umutekano w’ingendo z’ubudandaji zo mu mazi (UKMTO) kivuga ko ubwato bumwe bwariko buca mu Muhora wa Hormuz bwamenyesheje ko bwarashwe igisasu kitamenyekanye, bituma abari muri bwo babuvamwo baja mu bwato bw’ubutabazi.

   Ntivyamenyekanye neza nimba ubwo bwato buvugwa na UKMTO ari bumwe muri ayo Irani yavuze ko yarashe.

   Ahandi muri ako karere, igisirikare ca Yorodaniya cavuze mu masaha yitereye y’ejo ku wa mbere ko camanuye ibisasu vya misire vya Irani bitatu, mu gihe inzamba zo kugabisha ibitero vya misire zumvikanye mu gihugu cose aburira ko hari ibitero vyariko biraza.

   Imbere y’aho, igisirikare ca Koweit cavuze ko cakoroye amadrone ya Irani.

   Bahrain na yo ivuga ko ama-drone yarungitswe na Irani yari atumbereye ubuhinga bwayo bwo kuyobora uruja n’uruza rwo mu kirere, ariko ko ingendo z’indege zitahungabanye.

   Ayandi makuru kuri iyi ntambara:

   Trump avuga ko Amerika yagavye igitero kuri Irani mu ‘guha icubahiro’ abasirikare ba Amerika bishwe

   Uburusiya burimo gufasha gute Iran mu ntambara na Leta Zunze Ubumwe za Amerika?

   Iran yarononye ibigo 20 vya gisirikare vya Amerika kuva intambara itanguye

   Ayandi makuru yacu mushobora kuyakurikira kuri: YouTube kuri BBC News Gahuza

7. Haciye amasaha 8Mwaramutse neza!

   Ikaze kuri BBC Gahuzamiryango, aho tubashikiriza amakuru yo mu karere no mu makungu mu buryo bw'aka kanya.