IKIBIRIRAHO, Ukraine ivuga ko abantu batanu biciwe mu gitero cy'Uburusiya ku iduka rinini naho abandi 67 barakomereka

Amakuru y'ikibiriraho

Didier Bikorimana

1. Iminota 54 irahezeAbiciwe mu bitero byo ku ya 11/9 muri Amerika bibutswe nyuma y'imyaka 25 bibaye

   

   Ahavuye isanamu, Getty Images

   Imihango yo kwibuka ku nshuro ya 25 abiciwe mu bitero byo ku itariki ya 11 Nzeri (9) mu 2001 muri Amerika byagabwe n’umutwe w’abahezanguni wiyitirira idini rya Isilamu wa al-Qaeda iraba uyu munsi muri Amerika.

   Ku itariki ya 11 Nzeri mu 2001, abantu 2,977 barishwe ubwo ba rushimusi bagushaga indege eshatu mu nyubako y’amagorofa ya World Trade Center mu mujyi wa New York muri Amerika no mu nyubako y’ibiro bikuru by’ingabo z’Amerika (Pentagon) muri leta ya Virginia.

   Indege ya kane yashimuswe yaguye mu murima muri leta ya Pennsylvania nyuma yuko abagenzi bahanganye n’abayishimuse.

   Ibikorwa byo kwibuka abishwe biraba n’i London mu Bwongereza mu nyubako ya Queen Elizabeth Olympic Park, guhera saa tanu z’amanywa (11:00 BST), ni ukuvuga saa sita z’amanywa (12:00) zo mu Rwanda no mu Burundi.

   Ibikorwa byo kwibuka birabera n’ahantu hatatu indege zagushijwe i New York, muri Virginia no muri Pennsylvania.

   Izindi nkuru wasoma:

   US - 11/9: Umunota ku wundi uko byagenze ku munsi wahinduye isi

   Umubyeyi wa Osama Bin Laden yavuze ku nshuro ya mbere ukuntu umuhungu we yabyirutse

   Ayandi makuru yacu mushobora kuyakurikira kuri YouTube kuri BBC News Gahuza

2. Haciye amasaha 2Netanyahu agiye kurega ikinyamakuru cyatangaje ko UAE yari yamuburiye ku gitero cyo ku itariki ya 7 y'ukwa 10

   

   Ahavuye isanamu, Reuters

   Minisitiri w’intebe wa Israel Benjamin Netanyahu yabwiye abanyamategeko ngo batangire ikirego ku isebanya ku kinyamakuru cyo muri Israel kubera amakuru cyatangaje ko umutegetsi wa Emira Zunze Ubumwe z’Abarabu (UAE) yari yamuburiye ko umutwe wa Hamas wari urimo gutegura igikorwa cya gisirikare habura iminsi ngo habe ibitero byo ku itariki ya 7 Ukwakira (10) mu 2023.

   Nkuko bikubiye muri bimwe mu bice by’igitabo byatangajwe n’ikinyamakuru Haaretz, Perezida wa UAE Sheikh Mohammed bin Zayed Al Nahyan yagiranye ikiganiro kuri telefone na Netanyahu muri Nzeri (9) y’uwo mwaka.

   Iyo nkuru ivuga ko Netanyahu yaburiwe ko Yahya Sinwar, wari umukuru wa Hamas muri Gaza icyo gihe, yari arimo gutegura igikorwa kinini cya gisirikare.

   Ibiro bya Netanyahu byavuze ko “nta kuburira kwabayeho kuri minisitiri w’intebe kuvuye muri Emira Zunze Ubumwe z’Abarabu mbere y’itariki ya 7 Ukwakira”, bivuga ko iyo nkuru iri muri gahunda y'"umugambi mubisha".

   Ikinyamakuru Haaretz, gifite amateka yo kunenga cyane uwo minisitiri w’intebe, cyavuze ko gihagaze ku itangazamakuru ryacyo ndetse cyanze icyo kirego cyo gusebanya cya Netanyahu, kivuga ko “intego yonyine [y'icyo kirego] ni ugucecekesha itangazamakuru rinenga”.

   Iyo nkuru – no kuyihakana mu burakari kwa Netanyahu, agashinja Haaretz ibinyoma – itangajwe mu gihe ibikorwa byo kwiyamamaza mu matora rusange byatangiye gushyuha. Ayo matora yo ku itariki ya 27 Ukwakira uyu mwaka afatwa na benshi nka kamarampaka izaba irimo gukorwa ku butegetsi bwa Netanyahu.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Ni gute ubutasi bwa Israel bwananiwe kuburizamo igitero gikomeye?

   Bowen: Trump na Netanyahu bashaka guhindura ishusho y'Ubuseruko bwo Hagati – ubu bashobora kwisanga mu ndyane zidahera

   Uko umukuru wa Hamas Yahya Sinwar yishwe ku wa gatatu bakamumenya ku wa kane

3. Haciye amasaha 3Ukraine ivuga ko abantu batanu biciwe mu gitero cy'Uburusiya ku iduka rinini naho abandi 67 barakomereka

   

   Ahavuye isanamu, State Emergency Service of Ukraine

   Abategetsi bo muri Ukraine bavuga ko abantu batanu bishwe naho abandi 67 barakomereka ubwo indege nto y’intambara itajyamo umupilote (izwi nka ‘drone’) y’Uburusiya yarasaga ku iduka rinini ryo mu mujyi wa Pavlohrad, mu karere ka Dnipropetrovsk, mu burasirazuba bw’icyo gihugu.

   Minisitiri w’ubutegetsi bw’igihugu wa Ukraine Ivan Vyhivskyi yavuze ko amaduka n’imodoka byarashweho muri icyo gitero cyo ku manywa cyabaye “ubwo imihanda yari yuzuyemo abantu”.

   Andi maduka abiri manini – yo mu mijyi ya Zaporizhzhia na Sumy – na yo mbere yaho muri iki cyumweru yarashweho mu bitero byo mu kirere by’Uburusiya, nkuko amakuru yo mu bitangazamakuru byo muri Ukraine abivuga.

   Uburusiya bwatangaje ko habaye igitero cya ‘drone’ yo mu mazi cya Ukraine mu mujyi w’ubukerarugendo wa Sochi mu ijoro ryo ku wa gatatu, cyakomerekeyemo abantu 28, hamwe n’impfu z’abandi bantu batatu zegetswe ku bitero bya Ukraine.

   Intambara isesuye irarimbanyije hagati y’Uburusiya na Ukraine kuva Perezida w’Uburusiya Vladimir Putin atangije igitero kuri Ukraine, ubu hashize imyaka irenga ine n’igice.

   Umuhate mushya wo kugera ku mahoro w’intumwa zoherejwe na Perezida w’Amerika Donald Trump mu mpera y’icyumweru gishize, uko bigaragara nta byinshi bifatika wagezeho, nyuma y’ibiganiro izo ntumwa zagiranye na Putin i Moscow hamwe na Perezida Volodymyr Zelensky i Kyiv.

   Izindi nkuru wasoma:

   Ayandi makuru yacu mushobora kuyakurikira kuri YouTube kuri BBC News Gahuza

   Ivy'Uburusiya na Ukraine bizoherera he?

   Zelensky avuga ko Uburusiya bwarashe ku cyicaro gikuru cy'ubutasi bwa Ukraine mu gitero cya 'drone'

   Zelensky avuga ko indege zikwiye kwirinda guca mu kirere cy'Uburusiya mu gihe Ukraine yakajije umurego mu bitero bya 'drone'

4. Haciye amasaha 3Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo bw'aka kanya.