Amavubi y'u Rwanda ntagikiniye imikino ya gicuti muri Maroc ku 'mpamvu z'umutekano'

Inyandiko gusa
Umukuru w'ishyirahamwe ry'umupira w'amaguru mu Rwanda (FERWAFA), Fabrice Shema, ahagaze akoze ikimenyetso n'ikiganza, inyuma ye hari umuryango ufunze na serire. Imbere ye, ku mpande ebyiri z'ameza, hicaye abakinnyi b'Amavubi bambaye imyenda y'icyatsi kibisi, bamuteze amatwi, bamwe bamureba. Ku meza hari igitambaro gitukura. Ku meza hariho inyobwa byoroheje, by'amazi na Fanta.

Ahavuye isanamu, FERWAFA / X

Insiguro y'isanamu, Perezida wa FERWAFA Fabrice Shema yaganiriye n'abakinnyi b'Amavubi i Kigali ku wa mbere, mbere yuko berekeza i Marrakech
    • Umwanditsi, Didier Bikorimana
    • Igikorwa, BBC Gahuzamiryango
  • Yatangajwe
  • Igihe co gusoma: iminota 2

Ishyirahamwe ry'umupira w'amaguru mu Rwanda (FERWAFA) rivuga ko imikino ya gicuti mpuzamahanga y'ikipe y'igihugu Amavubi yari iteganyijwe kubera i Marrakech muri Maroc muri uku kwezi itakihabereye, ku mpamvu z'"umutekano".

FERWAFA ivuga ko yagejejweho ubutumwa n'ubuyobozi bw'ishyirahamwe ry'umupira w'amaguru muri Maroc (FRMF) buyimenyesha ko "iyo mikino itemewe kubera impamvu z'umutekano".

Amakuru amwe avuga ko FRMF yafashe icyo cyemezo nk'ingamba yo kwirinda ubwandu bw'ikiza cya Ebola.

Abategetsi mu Rwanda bavuga ko nta Ebola iri muri icyo gihugu.

Ebola yamaze kugaragara mu bihugu bituranyi by'u Rwanda, muri Repubilika ya Demokarasi ya Congo aho iki kiza gishya cyiganje, ndetse no muri Uganda.

Itangazo rya FERWAFA rivuga ko bamwe mu bagize intumwa z'Amavubi bari bamaze kugera i Marrakech ku wa mbere w'iki cyumweru.

Abakinnyi b'iyi kipe, itozwa n'Umwongereza Stephen Constantine, ni bamwe mu bari bamaze kuhagera.

FERWAFA ivuga ko ubu imyiteguro y'Amavubi yo gushaka itike yo kuzakina imikino ya nyuma y'igikombe cy'Afurika cy'ibihugu (AFCON/CAN) cya 2027 "ikomeje nk'uko byari biteganyijwe", umwiherero w'iyi kipe ukaba ukomereje i Cairo mu Misiri kuva kuri uyu wa kane kugeza ku wa kane w'icyumweru gitaha.

Skip Ibisomwa cane and continue reading
Ibisomwa cane

End of Ibisomwa cane

Biteganyijwe ko u Rwanda rukina umukino wa gicuti na Comores ku wa gatandatu, ndetse na Tanzania ku wa kabiri, ku itariki ya 9 y'uku kwezi.

Muri iyo mikino yo gushaka itike ya CAN 2027, u Rwanda ruri mu itsinda K ruhuriyemo na Cap-Vert, Liberia na Mali.

Amakuru avuga ko icyo cyemezo cy'ishyirahamwe ry'umupira w'amaguru muri Maroc kireba n'andi makipe y'ibihugu yari yitezwe gukinirayo, arimo nk'u Burundi, Tanzania, Uganda na Madagascar.